Anònim/Piemontèide
< Anònim
Piemontèide
[modifiché]Trovà an sla ragnà, cost'euvra fiamenga dël 2011, ch'a conta an poesìa la stòria dël Piemont, i l'oma pa riessù a trovene l'autor! Stërmà da bin an soe pàgine bandonà da vàire agn, s'as farà viv... volenté i-j arconossroma ij sò mérit! A-i é mach, a la fin ëd ës poema, sò nòm anagramà: Elvezio Rappengo! A séguita l'introdussion original. Armarché l'apressiament che l'autor a fà 'd la grafìa "dij Brandé": "La nòsta grafìa a specia l’amor për la tradission e la precision. A scapa con ësgiaj da la nuvità e da la comodità. A l’é na blëssa técnica e stòrica, ma l’òm dël di d’ancheuj a pàira nen a ’mprendla".
- "Ël di dle sënner ëd l’ùltim ann dlë scond mileni, ann consacrà da la bonànima dël Papa sant, i j’era cogià ansima a la trassa dla ca dij mè. Da là i vardava l’arch dle montagne che dal Monvis al Paradis smija ambrassé n’archèt pì cit formà dai brich che da Superga coro a Casgné. A cola mira i j’era rivà davzin al prim ters dla nòsta vita, ma sensa amor, con pòchi amis, mai gnun spatuss e la speransa për l’avnì nen pròpe drita.
- An col ëstat i l’hai ciamà d’avèj un lum da dovré contra la strachità e mes dësvij e mes an seugn con la mia ment i l’hai bogià. Set vire tre rindobià ’nco l’é ’l cont dij di ch’i l’hai passà ant l’ora fissa, cola pì càuda, sempe parèj. Ste ses ësman-e l’han sopatà e fàit cambié, chërdo për sempe, tuta mia vita.
- Doi agn pì tard, già laureà e peui marià, pairava nen a scrive tuta l’esperiensa, ma im sentìa che sté ciuto l’avrìa mach trussià ’l mè vive. Con gena tanta e fiusa pòca i son partì. Soens i scrivìa dë stërmon e tut an pressa, a vire im ëstofiava e i campava tut ant un canton. Dovèj finì a l’era un pensé grev e sempe viv.
- Mach quandi i l’hai perdù ël mè prim travaj i l’hai capì ch’i l’avrìa podù finì e ant l’ann ch’a fa già quat dòp dël mè viagi i l’hai sarà la stòria, prima ’d Natal.
- I l’avrìa finì tut s’a fussa nen che për scrive an grafìa stòrica a venta vnì un lenghista. La lenga scrita a l’é në specc ëd l’época e dla gent ch’a l’ha fissala. La nòsta grafìa a specia l’amor për la tradission e la precision. A scapa con ësgiaj da la nuvità e da la comodità. A l’é na blëssa técnica e stòrica, ma l’òm dël di d’ancheuj a pàira nen a ’mprendla.
- As capiss parèj përché a son passà àutri ani prima ’d podèj fé vëdde a n’àutra person-a l’euvra finìa. Ma ’dess i son pront e im ancamin vers la narassion dla Piemontèide".
Tàula
[modifiché]- Prima sman-a
- Sconda sman-a
- Tersa sman-a
- Quarta sman-a
- Quinta sman-a
- Sesta sman-a