La Bibia piemontèisa/Testament Vej/Salm/Salm 118

←Salm 117

La Bibia piemontèisa Salm

Salm 119→

Ij Salm

La Bìbia piemontèisa - Salm 118

118. Ringrassié Nosgnor, përchè chiel a l'é brav!

L'autor a ringrassia Nosgnor për la salvëssa ch'a l'ha daje e a cissa d'àutri a fé l'istess'.

¹Ringrassié Nosgnor, përchè chiel a l'é brav! Sò amor fedel a dura për sèmper^[1]! ²Che Israel a disa: "Sò amor fedel a dura për sèmper"! ³Che ij dissendent d'Aron, ij sacerdòt, a diso: "Sò amor fedel a dura për sèmper"! ⁴Che tuti coj ch'a l'han timor ëd Nosgnor a 'rpeto: "Sò amor fedel a dura për sèmper"!

⁵Ant ël pì bel mes dël perìcol i l'hai 'nvocà Nosgnor e chiel a l'ha rëspondume. Adess i son lìber. ⁶Nosgnor a l'é da mia part, I l'hai gnun-a tëmma. Còsa podrìo-ne mai feme la gent^[2]? ⁷Eh, Nosgnor a l'é da mia part, chiel am giutrà: i vardrai coj ch'am veulo mal con në sguard ëd trionf.

⁸A l'é mej trové sosta an Nosgnor che fidesse dla gent. ⁹A l'é mej trové n'arfugi an Nosgnor che fidesse dij prinsi. ¹⁰Combin che dle nassion nemise a l'avèisso anserciame, i l'hai tute butaje 'n derota con l'autorità ëd Nosgnor. ¹¹Eh, a l'han anserciame e tacame da tute le diression, ma i l'hai tute butaje 'n derota con l'autorità ‘d Nosgnor. ¹²A l'han gitame tut d'antorn tanme në scòp d'avìje; a l'han anfiamasse contra 'd mi tanme n'incendi furios, ma i l'hai butaje tute 'n derota con l'autorità 'd Nosgnor. ¹³Ij mè nemis a l'han tentà 'd tut mach për masseme, ma Nosgnor a l'ha giutame e i në son surtì fòra.

¹⁴Nosgnor a l'é mia fòrsa e mè cant ëd trionf: a l'é chiel ch'a l'ha dame vitòria^[3]. ¹⁵Canson ëd gòj e 'd vitòria a son cantà 'nt ël camp ëd coj ch'a son da la part ëd Nosgnor. Nosgnor, con sò brass fòrt ëd la drita a l'ha fàit ëd còse gloriose! ¹⁶Ël brass fòrt ëd Nosgnor a l'é alvasse an trionf. Nosgnor, con sò brass fòrt ëd la drita a l'ha fàit ëd còse gloriose! ¹⁷I meuirai pa, i vivrai për conté lòn che Nosgnor a l'ha fàit. ¹⁸A l'é vera che Nosgnor a l'ha castigame sever, ma a l'ha nen fame meuire.

¹⁹Deurbime le pòrte da 'ndoa ch'a passo ij giust, e mi i intrerai për ringrassié Nosgnor. ²⁰Cole pòrte-là a men-o a la presensa 'd Nosgnor, e ij giust a-i passo travers. ²¹It ringrassio përchè ti 't l'has ëscotà mia preghiera e 't l'has dame vitòria.

²²La pera che ij murador a l'avìo scartà a l'é dventà la pì amportanta^[4]. ²³Costa-sì a l'é l'euvra 'd Nosgnor e a l'é magnìfica da vardesse^[5]. ²⁴Sto-sì a l'é 'l di che Nosgnor a l'ha fàit: arlegromse e foma festa! ²⁵Ah, Nosgnor, dane la salvëssa^[6]! Ah, Nosgnor, dane la vitòria! ²⁶Ch'a sia benedì col ch'a ven ant ël nòm ëd Nosgnor^[7]! I l'oma benedite da la ca 'd Nosgnor! ²⁷Nosgnor a l'é Dé: chiel a splendriss dal cel. Porté la bestia da sacrifiché e gropela a l'autar. ²⁸Ti 't ses mè Dé e mi it laudrai! Ti 't ses mè Dé e mi it esaltrai! ²⁹Ringrassié Nosgnor përchè chiel a l'é brav! Sò amor fedel a dura për sèmper!

Nòte

1. Cfr. 1 Crònache 16:34; 2 Crònache 5:13; 7:3; Esdra 3:11; Salm 100:5; 106:11; 107:1; 136:1; Geremìa 33:11.
2. Cfr. Ebréo 13:6.
3. Cfr. Surtìa 15:2; Isaìa 12:2.
4. Cfr. Luca 20:17; At 4:11; 1 Pero 2:7.
5. 118:22-23 cfr. Maté 21:42; March 12:10-11.
6. O "Osana!". Cfr. Maté 21:9; March 11:9; Gioann 12:13.
7. Cfr. Maté 21:9; 23:39; March 11:9; Luca 13:35; 19:38; Gioann 12:13.