La Bibia piemontèisa/Testament Vej/Salm/Salm 119

←Salm 118

La Bibia piemontèisa Salm

Salm 120→

La Bìbia piemontèisa - Salm 119

Ij Salm

119. A l’han ëd boneur coj ch’a son inapontàbij an soa condòta

An cost salm, ël salmista a sélebra la Lege ‘d Dé e la guida ch’a provëdd a la vita ‘d tùit ij di ëd sò pòpol. A dà espression a soa anvìa ‘d conòsse la Lege ‘d Nosgnor an manera ancreusa tant da podèj fé esperiensa dle benedission ch’a rivo a tuti coj ch’a-j ubidisso. La strutura ‘d ës salm a l’é acròstica, visadì, minca na session as ancamin-a con na litra dl’alfabèt ebràich an soa sequensa.

(Alef) 1-8

¹A l’han ëd boneur coj ch’a son inapontàbij an soa condòta, e che a la lege 'd Nosgnor a-j van dapress. ²A l’han ëd boneur coj ch’a son fedej a l’aleansa con Nosgnor e ch’a lo sërco con tut ël cheur; ³ch’a fan gnun compërmess con ël mal e ch’a marcio mach an sij senté ‘d Nosgnor. ⁴Ti ‘t l’has dane toe ordinanse përchè ch’a sio osservà con diligensa. ⁵Che mie assion a sio sempe conform ai tò comandament! ⁶Antlora i l’avrai mai da vërgogneme cand ch’i buto a confront mia vita con ij tò comandament. ⁷Mè cheur at laudrà con sincerità^[1] cand ch’i amprendrai ch’a son giuste toe decision. ⁸A toe ordinanse mi i-j farai ubidiensa: bandon-me pa, lass-me pa sol.

ב (Bet) 9-16

⁹Coma podrà-lo ‘n giovo o na giuvna guerné la purëssa ‘d soa condòta? Ant na sola manera: s’a ubidiss a toa paròla. ¹⁰Con tut mè cheur i sërco toa presensa e favor: lass-me pa andé ‘d sa e ‘d là dëscòst dai tò precèt. ¹¹An mè cheur i l’hai guernà toe paròle për nen pëcché contra ‘d ti. ¹²Mè Signor! It benedisso: mòstr-me ij tò statù. ¹³I l’hai recità a àuta vos tùte le régole ‘d vita che ti ‘t l’has dane. ¹⁴I son arlegrame dla manera ‘d vive che toa Lege an mostra pì che s’i l’avèissa d’ògni sòrt ëd richësse. ¹⁵I l’hai medità an lòn ch’a diso ij tò comandament, e ‘l model ëd condòta ch’a comando a l’é stàit l’ogèt ëd mia atenta considerassion. ¹⁶Ij tò statù a son pròpi agreàbil: i dësmentierai mai le paròle ‘d toa istrussion.

ג (Ghimel) 17-24

¹⁷Àbie ‘d benevolensa anvers a tò servitor përchè i peussa vive e osservé toa paròla. ¹⁸Dovert-me j’euj përchè i vëdda le vrità maravijose ‘d toa Lege. ¹⁹An cost pais-sì i son mach un forësté. Scond-me pa ij tò precèt. ²⁰Mìa ànima a l’ha sèmper n’anvìa granda ‘d conòsse toe régole ‘d vita. ²¹Ti ’t arbufe coj ch’a son arogant. Coj ch’as chërdo ‘d savèjne ‘d pì e ch’a mepriso ij tò precèt a stan sota maledission. ²²I l’hai schinà vërgògna e dëspressi përchè i l’hai osservà le régole ‘d vita che ti ’t l’has dane. ²³A fussa dcò che ‘d prinsi as butèisso a parleme contra, i andrìa anans a fé ‘d toa paròla mia meditassion. ²⁴Vera, mìa gòj a sta ant ël buté an pràtica toe régole ‘d vita. Për mi a son na guida sicura.

ד (Dalet) 25-32

²⁵I stago dëstèis ant la póer: dame la vita conform a toa paròla. ²⁶I l’hai dite coj ch’a l’ero ij mè progèt e ti ‘t l’has rëspondume. Adess mostr-me coma ch’i peuda aplicheje lòn ch’a diso ij tò statù. ²⁷Fame comprende bin la significassion pràtica dij tò comandament, përché i fasa ‘d toe dotrin-e maravijose l’ogèt ëd mìa meditassion. ²⁸Ant l’aflission e ij sagrin i pioro ‘d lerme mère: ch’a sia toa paròla a tnime sù ‘d moral. ²⁹Slontan-me da le vie dla busiardarìa e fame la grassia ‘d podèj bin comprende che toa Lege a l’é na guida sicura. ³⁰I l’hai sernù ‘d marcé ant la via dla vrità. I l’hai angagiame a steje dré a toe régole ‘d vita. ³¹I stago bin tacà a toe régole ‘d vita. Nosgnor! Ch’i në sìa pa dësvërgognà. ³²Ant la via ‘d lòn ch’it l’has comandà i peudo adess fin-a core përchè ti ’t l’has dame fòrsa^[2].

ה (He) 33-40

³³Nosgnor! Mostr-me ‘l senté ‘d toe ordinanse, che mi i lo seguiterai fin-a a la fin. ³⁴Fame bin comprende toa Lege, ch’i la veulo scoté con tùt mè cheur. ³⁵Fame da guida për ël senté dij to comandament, përchè ch’a son anté ch’a sta mia gòj. ³⁶Dame tanta anvìa për toe lege, pitòst che për ambaroné ‘d sòld. ³⁷Dëstorna ij mè euj da lòn ch’a l’ha gnun valor: marcé an sël senté ‘d toa paròla am darà ‘d vita. ³⁸Compiss an mi toa promëssa e tò servent at sarà fedel. ³⁹Giùtme a chité lòn ch’ an mia vita a l’é da vërgogness-ne, përchè ch’a son bon-e toe ordinanse. ⁴⁰Varda coma ch’am piaso ij tò precèt! Arneuva mia vita con toa bontà.

ו (Vav) 41-48

⁴¹Nosgnor! Che toa misericòrdia e toa salvassion am ragionzo, conform a toe promësse. ⁴²Antlora i podrai deje na rëspòsta a coj ch’am ofendo, përchè i l’hai fiusa an lòn ch’a dis toa paròla. ⁴³Gavme pa da la boca la paròla dla vrità përchè toe régole ‘d vita a son mìa sola speransa, ⁴⁴Antlora i podrai sèmper osservé toa lege, për l’eternità. ⁴⁵Sicur i andrai anans an mìa stra, përchè i sërco ant ij tò precèt lòn ch’i l’hai da fé. ⁴⁶I l’hai gnun-a onta ‘d parlé ‘d toe régole ‘d vita fin-a an presensa ‘d rè. ⁴⁷A l’é pròpi un piasì avèj da fé con ij tò comandament, përchè i l’hai car ëd lor. ⁴⁸Ij tò comand a son degn d’onor e d’amor: për lòn ij tò statù a son l’ogèt ëd mie meditassion.

ז (Zain) 49-56

⁴⁹Arciama a la ment ëd tò servitor toa paròla, përchè a l’ha sèmpe dame speransa. ⁵⁰Toe promësse am fan arviscolé; a son lor ch’am dan consolassion an tùit ij mè sagrin. ⁵¹Ëd gent superba a chita mai ‘d fesse sbefie ‘d mi, ma mi i virerai mai le spale a toa Lege. ⁵²Toa lege antica a l’é sèmper mia meditassion: a l’é chila ch’am consola. ⁵³Am ciapa tanta flin-a cand i vardo ij pecador ch’a chito d’andeje dré a toa Lege. ⁵⁴Ij tò statù a son sèmper ëstàit ël soget ëd mìe càntiche daspërtut ch’i son andàit a vive. ⁵⁵Nosgnor! Ëd neuit i penso ai nòm ch’a fan la dëscrission ëd tò carater. A lé për lòn ch’i ubidisso con piasì a toa Lege. ⁵⁶I l’hai praticà lòn për tuta mìa vita, përchè i l’hai osservà ij to comandament.

ח (Chet) 57-64

⁵⁷Nosgnor a l’é la sorgiss ëd mìa sicurëssa. I l’hai la determinassion d’andeje dapress a toe paròle d’istrussion. ⁵⁸Con tut mè cheur i sërco tò favor. Sie misericordios con mi, coma ch’it l’has promëttù. ⁵⁹I l’hai valutà la diression ëd mìa vita e i l’hai staje dapress a toe régole. ⁶⁰I slongo ‘l pass con ubidiensa ai tò órdin: gnun artard! ⁶¹Le còrde dij pecador as ëstrenzìo a mi, ma mi i l’hai mai dësmentiame ‘d toa Lege, ⁶²I son aussame ant ël pì bel mes ëd la neuit për ringrassiete dle régole ‘d vita ch’it l’has dane. ⁶³I sarai sempe l’amis ëd la gent ch’at rispeta, ëd tuti coj che a osservo ij tò comandament. ⁶⁴Nosgnor! La tèra a l’é pien-a ‘d toa misericòrdia; ij tò statù a son la dotrin-a ch’i amprendo.

ט (Tet) 65-72

⁶⁵Nosgnor! Coma ch'a son tante le còse bon-e ch’it l’has dame! Pròpi coma ti ’t l’avìe promëttume. ⁶⁶Dame ‘d disserniment e 'nteligensa, përchè i stimo che lòn ch’it comande a sia degn ëd fiusa. ⁶⁷L’aflission a l’é stàita për mi ‘l castigh che ti ‘t l’has dame, përchè mi i andasìa un pò da sì e ‘n pò da là. Adess, contut, mi i vado dapress a la paròla ‘d toa istrussion. ⁶⁸Ti ’t ses bon e ‘t fase dël bin: mostr-me ij tò statù. ⁶⁹Ëd gent aroganta as anventa ‘d busiardarie contra ‘d mi, ma mi i vado dapress ai tò precèt con tut mè cheur. ⁷⁰A-i é ‘d gent ch’a l’ha la testa bin gorëgna e ch’a son ëd beté, ma mi i treuvo piasì an toa Lege. ⁷¹Ij mè patiment a son ëstàit bon përchè mi i amprendèissa a andeje dapress ai tò statù. ⁷²La Lege che ti 't l'has arvelà a l’ha ‘n valor pì grand che mila monede d’òr e d’argent.

י (Iod) 73-80

⁷³I son ëstàit fàit e formà da toe man. Dame 'nteligensa përchè i amprenda lòn ch’it comande. ⁷⁴Che tuti coj ch’at rispeto am vëddo e as n’arlegro, përchè mi i l’hai butà mia speransa an toa paròla. ⁷⁵I lo sai, Signor, che toe régole ‘d vita a son giuste. Cand ch’it l’has dissipliname a l’era përchè it ëm veule bin. ⁷⁶Che toa misericòrdia am sìa ‘d consolassion, conform a lòn ch’it l’has promëttù a mi ch’i son tò servitor. ⁷⁷Che mi i fasa esperiensa ‘d toa compassion e ch’i l’àbia ‘d vita, përchè toa Lege am dà pròpì piesì a ‘ndeje dapress! ⁷⁸Che la gent superba a sìa dësvërgognà përchè lor a disìo ‘d mi mach ëd maldicense; ma ij tò precèt a son mia meditassion tùit ij dì. ⁷⁹Che mi i sia ‘l compagn ëd tuti coj ch’at rispeto, tuti coj ch’a conòsso toe régole ‘d vita. ⁸⁰Che mi i sìa angagià ànima e còrp a ‘ndeje dapress ai tò statù, përch’ i sia mai dësvërgognà.

כ (Caf) 81-88

⁸¹I speto che ti ‘t ven-e a libereme, ma costa atèisa am consuma. Mia speransa, contut a resta fissa ‘nt le promësse ‘d toa paròla. ⁸²Ij mè euj a son dventà fin-a strach ant l’atèisa dël compiment ëd toa promëssa e i diso: “Cand é-lo ch’it ëm consoleras?”. ⁸³I son vnùit a esse tanme n’oiro anfumà, ma mi i l’hai mai dësmentiame dl’ubidiensa ai tò statù. ⁸⁴Cand é-lo che mi, ‘l tò servitor, ancora i l’avrai da soporté tut sossì? Cand é-lo che tì ‘t daras a coj ch’am përséguito ‘l castigh ch’a mérito? ⁸⁵A-i é ‘d përson-e pien-e ‘d bòria ch’a l’han ëscavà ‘d tampe për feme tombeie ‘ndrinta. Lor a agisso pa scond a toa lege. ⁸⁶Tùit ij tò precèt a son degn ëd fiusa. Guernme da coj ch’am përséguito sensa na rason. ⁸⁷A l’han scasi dësblame sì an sla tèra, ma mi i son arfudame ‘d bandoné ij tò comandament. ⁸⁸Dame ‘d vita neuva conform a toa misericòrdia, përchè i renda ubidiensa a le régole ‘d vita che ti ‘t l’has arvelà.

ל (Lamed) 89-96

⁸⁹Nosgnor! Toa paròla a restera ferma për l’eternità. ⁹⁰Ti ‘t dimostre toa fidelità da generassion a generassion. Ti’ t l’has stabilì la tèra e chila a resta ferma sota dij nòstri pé. ⁹¹Toe régole ‘d vita a resto vàlide ‘dcò ancheuj e a servo ij tò propòsit. ⁹²S’i l’avèissa pa trovà d’ancoragiament an toa Lege, i sarìa bin già mòrt fongà ant ij mè sagrin.⁹³Mai i dësmentierai ij tò precet, dàit che për sò mojen ti ‘t l’has arviscolame. ⁹⁴Mi i son tò fieul, salv-me! Përché i sërco ‘d conòsse toa volontà. ⁹⁵Contut che ij pecador a së stërmo për feme n'amboscà për la strà anté ch’i marcio e a vorìo masseme, i l’avrai sèmper ëd mira l’ubidiensa a toe régole ‘d vita. ⁹⁶Fin-a la përfëssion a l’ha ij sò lìmit, ma ij tò comandament a l’han gnun lìmit: a riguardo la vita antrega.

מ (Mem) 97-104

⁹⁷Òh lòn ch’i l’hai car toa lege! I penso tut ël di a chila! ⁹⁸Grassie ai tò comandament, i son pì savi che ij mè nemis, përchè ch’a son sèmper mia guida. ⁹⁹Vera, i son pì istruì che tùit ij mè magìster përchè toe régole i son costant a mediteje. ¹⁰⁰I son fin-a pì giudissios che j’ansian përchè ij tò precet i l’hai scotaje ¹⁰¹I son arfudame d’andé an sla cativa stra: i veuj vive sempe conforma a toe paròle. ¹⁰²An sossì i l’hai gnun-a intension ëd cambié idèja, përchè ch’it l’has mostramlo bin. ¹⁰³Che bon-e ch’a son toe paròle! A son pì dosse che l’amel! ¹⁰⁴Ij tò comandament am dan d’anteligensa^[3]: gnun-a maravìja ch’i l’hai pijà ‘n ghignon tute j’àutre manere ‘d vive, ch’a son da stùpid!

נ (Nun) 105-112

¹⁰⁵Toa paròla a l’é tanme ‘n ciàir pr’ ij mè pass, la lus ch’am anlùmina la stra anté ch’i marcio. ¹⁰⁶I l’hai fàit un giurament, la promëssa ch’i mantnirai: i andrai sempe dapress a lòn che ti ‘t l’has ëstabilì përchè ch’a l’é giust^[4]. ¹⁰⁷A son grève le pen-e ch’i patisso: rendme la sòrt ëd vita ch’it l’has promëttune. ¹⁰⁸Nosgnor! Aceta l’oferta ch’it faso con ij mè làver, e fà ch’i amprendo lòn che ti ‘t l’has mostrane^[5]. ¹⁰⁹Mia vita a l’é sèmper an privo, ma im dësmentio pa dë steje dapress a lòn ch’t l’has comandà an toa Lege. ¹¹⁰Ëd gent maléfica a l’ha prontame un trabucèt për feme cascheie andrinta, ma mi i pijerai nen na stra diversa da cola ch’it l’has mostrame^[6] ti. ¹¹¹L’ardità ch’i ciaperai a l’é lòn ch’a l’é scrit ant l’Aleansa: a l’é lolì ch’am dà tanta gòj. ¹¹²I compirai con tut mè cheur lòn che ti ‘t l’has decretà, dël tut e për sèmper.

ס (Samech) 113-120

¹¹³I l’hai an ghignon la gent fàussa, ma toa Lege a l’é cara a mè cheur. ¹¹⁴Ti ‘t ses mè arfugi e mè scu: mia speransa a l’é an toe paròle d’istrussion. ¹¹⁵Slontaneve da mi, vojàutri gent maléfica: mi i vado dapress ai comandament ëd mè Dé! ¹¹⁶Nosgnor! Dame l’apògg ch’it l’has promëttume! Che mia speransa am daga gnun-a delusion! ¹¹⁷Sosten-me e mi i sarai liberà: antlora ij tò statù a saran sèmpe l’ogèt ëd mia meditassion. ¹¹⁸Ti ‘t meprise tuti coj ch’a van ëdsà e ‘d là e ch’a ten-o ij tò statù an gnun-a considerassion. Ëd përson-e coma cole-lì a son fàusse e as peul pa fidess-ne. ¹¹⁹Ti ‘t dësbarasse ‘d tùit ij pecador coma dë scòrie: a l’é ‘dcò për lòn ch’i l’hai care toe régole ‘d vita. ¹²⁰Am ven la pel d’òca mach a pensé a lòn ch’a càpiterà a coj ch’a l’han gnun rispet ëd ti. A farìo bin a pijé an sël sério ij tò giudissi.

ע (Ayin) 121-128

¹²¹Mi i faso lòn ch’a l’é giust e onest. Lass-me nen ant le man ëd coj ch’a diso ‘d mi ëd faussarìe. ¹²²Garantiss-me na benedission: che la gent superba a vada pa an gir a dì ‘d faussarìe an mè cont. ¹²³La vista am ven meno ant l’atèisa ‘d toa salvassion. I l’hai n’anvìa granda ‘d vëdde compìa la vrità ‘d toe promësse. ¹²⁴Tràtme conform a toa misericòrdia, mi ch’i son tò servitor. Mostr-me coma buté an pràtica ij tò statù. ¹²⁵I son tò servitor: dame l’anteligensa ‘d comprende toe lege. ¹²⁶Nosgnor! A l’é rivà ‘l temp ch’it passe a l’assion! Varda mach vàire ch’a son coj ch’a mepriso e a contravnisso a toa Lege! ¹²⁷A l’é për costa rason ch’i l’hai car ij tò precet pì che l’òr, vera, pì che l’òr ël pì fin. ¹²⁸A l’é për costa rason ch’i osservo con diligensa ij tò comandament. Mi i l’hai an ghignon le vie dla busiardarìa.

פ (Pe) 129-136

¹²⁹Toe régole ‘d condòta a son maravijose: a l’é për lòn che mi i-j vado dapress! ¹³⁰La dotrin-a ‘d toa paròla a ‘nlumina la ment. A dà 'nteligensa a coj ch’a son malpràtich. ¹³¹I doverto la boca e i tiro ‘d sospir për la grand’ anvìa ch’i l’hai ëd vëdde butà ‘n pràtica ij tò precèt. ¹³²Virte anvers ëd mi e àbie miserìcòrdia coma ch’i ‘t fase con tuti coj ch’a rispeto tò nòm. ¹³³Guida ij mè pass ëscond toa paròla e përmet pa che ‘d cativèrie am dòmino. ¹³⁴Gavme da ‘ntorn tùit ij busiard përchè i vada dapress ai tò comandament! ¹³⁵Fà splende tò visagi a tò servitor; mostr-me ij tò statù. ¹³⁶Ëd lerme a scoro dai mè euj përchè a son tanti coj ch’a trasgredisso toa Lege.

צ (Tsade) 138-144

¹³⁷Nosgnor! Ti ‘t ses giust e toe decision a son conform a dritura. ¹³⁸Toe lege a son përfete e toe decision a son dël tut da fidess-ne. ¹³⁹I I son pien d’andignassion përchè ij tò nemis a dëspresio toe paròle. ¹⁴⁰Toe promësse a son ëstàite butà a la preuva e a son dimostrasse fedej: a l’é për lòn ch’i l’hai tacame a ti^[7]. ¹⁴¹I son pcit e dëspresià, ma mai im dësmentio dij tò comandament. ¹⁴²Toa giustissia a l’é eterna e toe istrussion a son dël tut përfete. ¹⁴³Cand ch’im trovava an privo e ant la dësgrassia ij tò comandament a j’ero mia letissia. ¹⁴⁴Toe lege^[8] a son sempe giuste: giùtme a comprendje bin parèj ch’i peussa vive.

ק (Qof) 145-152

¹⁴⁵Con tut mè cheur i t'anvocava e i disìa: “Fame la grassia, Nosgnor! I son sèmpe restà fedel ai tò statù”! ¹⁴⁶I alvava mia vos a ti e i disìa: “Salv-me përchè i ubidissa a toe régole ‘d vita”. ¹⁴⁷I’m aussava matin bonora e it ciamava agiut. An toa paròla i treuvo mia speransa. ¹⁴⁸Ëd neuit i stago dësvij e i médito toa paròla, ¹⁴⁹Scota mia vos conform a toa misericòrdia, Nosgnor. Arviscol-me scond tò giudissi. ¹⁵⁰Coj ch’am përséguito an soa malissia a son lì lì për riveme a còl; lor as ten-o lontan da toa Lege. ¹⁵¹Tutun, Signor, ti ’t ses davzin a mi, e tùit ij tò precèt a son degn ëd fiusa. ¹⁵²Fin-a da cand ch’i j’era cit l’hai conossù toe régole ‘d condòta. A dureran për sèmper.

ר (Resh) 153-160

¹⁵³Varda coma ch’i son ëstàit umilià e salv-me, përchè mi i’m dësmentio mai ëd toa Lege. ¹⁵⁴Susten-me e salv-me; arviscol-me con toa paròla. ¹⁵⁵La salvëssa as ten lontan-a dai pecador, përchè a sërco pa d’esse conform ai tò statù. ¹⁵⁶Nosgnor! Toa misericòrdia a l’é granda. Arviscol-me conform a toe régole ‘d vita. ¹⁵⁷Ij nemis ch’am përséguito e ch’am fan tribulé a son tanti. Malgré lor, mi i chito nen d’andeje dapress a toe régole ‘d vita. ¹⁵⁸Am fà scheur mach a vëdde ij traditor, përché lor a van pa dapress a toa paròla. ¹⁵⁹Nosgnor! Varda coma ch’i l’hai gòj a andeje dapress ai tò comandament! Arviscol-me conform a toa misericòrdia. ¹⁶⁰L’essensa ‘d toe paròle a l’é vrità. Tute toe régole giuste ‘d condòta a dureran an etern.

שׂ/שׁ (Sin/Shin) 161-168

¹⁶¹Ëd gent potenta am përséguita sensa rason, ma lor am fan gnun-a tëmma; i l’hai tëmma pitòst la dzubidiensa a toe paròle. ¹⁶²I m’arlegro ‘d toe paròle d’istrussion coma d‘un botin bondos. ¹⁶³I l’hai an òdio e i mepriso tute le busiardarìe, ma i l'hai car toa Lege. ¹⁶⁴It làudo set vire al di për toe giuste régole ‘d vita. ¹⁶⁵ Òhi, che toa Lege a l’àbio ant ël cheur a ‘rsèivran tanta pas e gnente a-j farà ‘ntrapé. ¹⁶⁶Nosgnor! Mi i speto toa salvassion e i ubidisso ai tò precèt. ¹⁶⁷I ubidisso a tute le régole ‘d vita ch’it l’has dane: i j’hai tute an mè cheur. ¹⁶⁸I osservo ij tò comandament, përché mìa vita a l’é sempe sota ij tò euj.

ת (Tav) 169-176

¹⁶⁹Nosgnor! Che ij mè crij d’agiut a rivo fin-a a ti. Dame l’anteligensa ‘d comprende toa paròla antrega. ¹⁷⁰Che mia sùplica a peuda rivé fin-a an toa presensa; che toa liberassion a l’àbia n’efet grand an mi, scond toe promësse. ¹⁷¹Che dai mè làver a së spantio ‘d càntiche ‘d làude, përchè ti ‘t l’has mostrame ij tò statù. ¹⁷²Che mìa lenga a canta ‘d toe paròle, përche tùit ij tò comandament a son giust. ¹⁷³Che toa man am giuta, përch’i l’hai sernù l’ubidiensa ai tò comandament. ¹⁷⁴Nosgnor! I susto toa salvëssa e toa Lege am dà tanta gòj. ¹⁷⁵Che mìa ànima a viva e at làuda; che toe régole ‘d vita am giuto. ¹⁷⁶Mi i andasìa un pò da sì e ‘n pò da là tanme na feja ch’a l’era spërdusse. Tutun, ti ’t ses ëvnùit a sërcheme përchè mi im dësmentièissa mai dij tò precèt.

Nòte

1. O “it ringrassierai an vivend coma ch’as deuv”.
2. O “përchè ti ’t l’has slargame ‘l cheur”.
3. O “ëd bon sens”.
4. O “Toe giuste decision”.
5. O “progetà”.
6. O “ij tò precèt”.
7. O “ch’it veuj tant bin”.
8. O “aleansa”.