La Bibia piemontèisa/Testament Vej/Deuteronomi/Deuteronomi 27

←Deuteronomi 26

La Bibia piemontèisa Deuteronòmi

Deuteronòmi 28→

La Bìbia piemontèisa - Deuteronòmi 27

Deuteronòmi

27

Istrussion për la Ciambrea litùrgica granda

¹Mosè e j’ansian d’Israel a l’han daje costi órdin al pòpol. A l’han dije: “Guerné tùit ij comandament che ancheuj iv dago. ²Ël di che i passereve ël Giordan për intré ant ël pais ch'ël Signor vòst Dé av dà, drissé 'd gran’ pere e deje la biaca 'd caussin-a; ³peui scrìvje dzora tute le paròle 'd costa lege, cora ch'i sareve passà për rivé a la tèra che 'l Signor vòst Dé av dà, tèra andova làit e amel a scoro, coma che 'l Nosgnor Dé dij vòst antich, a l'ha promëttùve. ⁴E ant ël moment ch'i passereve 'l Giordan, drissé an sël mont Ebal coste pere, coma che mi 'v comando, e arìssje 'd caussin-a. ⁵E ambelelà i butreve an pé pr’ ël Signor vòst Dé, n'autar che ël fer a l'àbia pa travajalo. ⁶Për fabrichelo, i podreve mach dovré ‘d pere nen travajà. Dzora ‘d cost autar i smonreve d'olocàust al Signor vòst Dé^[1], ⁷e 'dcò ëd sacrifissi ëd comunion: mangg-ne là la carn, an fasend festa an onor dël Signor, vòst Dé. ⁸Scrìvie ansima a costi ròch, an manera bin ciàira, tute le paròle 'd costa lege^[2].

⁹Peui, Mosè, compagnà dai sacerdòt levita, a l’ha parlà parèj a tuta la gent d’Israel: “Sté ciuto e scoté, Israel: d'ancheuj i seve vnùit a d’esse ‘l pòpol dël Signor, vòst Dé. ¹⁰I scotreve la vos dël Signor vòst Dé e i butreve an pràtica ij sò comandament e soe lege, che d'ancheuj mi iv dago.

¹¹An col midem di Mosè a l'ha daje st'órdin a la gent an disendje: ¹²"Le tribù ch’i dirai a l’han da benedì ‘l pòpol an sël Mont Garisim cand ch’i passereve ‘l Giordan: Simeon, Levi, Giuda, Issacar, Giusep e Beniamin^[3]. ¹³E coste àutre tribù a l’han da sté an sël Mont Ebal për pronunsié le maledission: Ruben, Gad, Aser, Zabulon, Dan e Neftali".

Dódes maledission

¹⁴Ij Levita a l’avran da parlé e a diran ad àuta vos a tuti j’òm d’Israel:^[4]

¹⁵“Ch’arsèiva na maledission chi ch’as fà n’ìdol ëscurpì o fondù, euvra d’òm, che ‘l Signor a detesta, e a l’adòra dë scondion!”. E tut ël pòpol a rëspondrà: “Àmen!”

¹⁶“Ch’arsèiva na maledission chi ch’a dëspresia sò pare o soa mare^[5]!”. E tut ël pòpol a rëspondrà: “Àmen!”

¹⁷“Ch’arsèiva na maledission chi ch’a dëspiassa le borne dla proprietà ‘d sò vzin^[6]!”. E tut ël pòpol a rëspondrà: “Àmen!”

¹⁸“Ch’arsèiva na maledission chi ch'a fà perde la stra a ‘n bòrgno^[7]!”. E tut ël pòpol a rëspondrà: “Àmen!”

¹⁹“Ch’arsèiva na maledission chi ch'a vìola ij dirit dij forësté, dj’orfanin e dle vìdoe^[8]!”. E tut ël pòpol a rëspondrà: “Àmen!”

²⁰“Ch’arsèiva na maledission chi ch’as cogia con un-a dle fomne ‘d sò pare^[9]; përchè lolì a sarìa në dzonor grev për sò pare^[10]!”. E tut ël pòpol a rëspondrà: “Àmen!”

²¹“Ch’arsèiva na maledission chi ch’as cogia con na bestia^[11]!”. E tut ël pòpol a rëspondrà: “Àmen!”

²²“Ch’arsèiva na maledission chi ch’as cogia con soa seure da part ëd mare o ‘d pare^[12]!”. E tut ël pòpol a rëspondrà: “Àmen!”

²³“Ch’arsèiva na maledission chi ch’as cogia con soa mare-madòna^[13]!”. E tut ël pòpol a rëspondrà: “Àmen!”

²⁴“Ch’arsèiva na maledission chi ch'a massa sò pròssim dë stërmà!”. E tut ël pòpol a rëspondrà: “Àmen!”

²⁵“Ch’arsèiva na maledission chi ch’as lassa soborné e a sassin-a ‘n nossent!”. E tut ël pòpol a rëspondrà: “Àmen!”

²⁶“Ch’arsèiva na maledission chi ch'a osserva pa ij comandament ëd costa lege e a-j buta nen an pràtica^[14]!”. E tut ël pòpol a rëspondrà: “Àmen!”

Nòte

1. 27:5-6 cfr. Surtìa 20:25.
2. 27:2-8 cfr. Giosué 8:30-32.
3. Cfr. Deuteronòmi 11:29; Giosué 8:33-35.
4. Cfr. Surtìa 20:4; 34:17; Levitich 19:4; 26:1; Deuteronòmi 4:15-18; 5:8.
5. Cfr. Surtìa 20:12; Deuteronòmi 5:16.
6. Cfr. Deuteronòmi 19:14.
7. Cfr. Levitich 19:14.
8. Cfr. Surtìa 22:21; 23:9; Levitich 19:33-34; Deuteronòmi 24:17-18.
9. Cfr. Levitich 18:8; 20:11; Deuteronòmi 22:30.
10. Let “...përchè a àussa la coverta 'd sò pare!”.
11. Cfr. Surtìa 22:21; Levitich 18:23; 20:15.
12. Cfr. Levitich 18:9; 20:17.
13. Cfr. Levitich 18:17; 20:14.
14. Cfr. Galat 3:10.