La Bibia piemontèisa/Testament Vej/Levitich/Levitich 18

←Levitich 17

La Bibia piemontèisa Levìtich

Levìtich 19→

Levìtich

18

La Bìbia piemontèisa - Levitich 18

Relassion sessuaj proibìe

¹Nosgnor a l’ha parlaje ancora a Mosè. A l’ha dije: ²Fà savèj sòn a j’Israelita: ‘Mi i son ël Signor vòst Dé. ³Copié nen le pràtiche dël pais d’Egit andova ch’i seve stàit, nì cole dël pais ëd Canan, anté ch’iv farai intré: imité pa le costume ‘d costi pòpoj. ⁴I scotreve lòn che mi iv comando, i fareve ubidiensa a lòn ch’i l’hai decretà për vojàutri. I son mi ël Signor, vòst Dé. ⁵I osservreve donch ij mè decret e mie decision. Tuti coj ch’a-j butran an pràtica a trovran la vita^[1]. Mi i son ël Signor.

⁶Che gnun ëd vojàutri as acòsta a un dij sò parent ëstrèit^[2] për avejne ‘d relassion sessuaj^[3]. Mi i son ël Signor.

⁷Fé nen disonor a vòst pare avend ëd relassion sessuaj con vòstra mare. A l’é vòstra mare: faje nen disonor.

⁸Avèje pa ‘d relassion sessuaj con le fomne ‘d vòst pare: it farie disonor ëdcò a chiel^[4].

⁹Avèje pa ‘d relassion sessuaj con vòstra sorastra da la banda ‘d pare o ‘d mare^[5], ch’a sìa nassùa antëcà o fòra: faje nen disonor.

¹⁰Avèje pa ‘d relassion con la fija ‘d vòst fieul o ‘d vòstra fija. A sarìa l’istess vòst disonor.

¹¹Avèje pa ‘d relassion sessuaj con la fija ‘d na fomna ‘d vòst pare: a l’é vòstra sorastra.

¹²Avèje pa ‘d relassion sessuaj con la seure ëd vòst pare. A l’é na parenta strèita ‘d chiel.

¹³Avèje pa ‘d relassion sessuaj con la seure ëd vòstra mare. A l’é na parenta strèita ‘d chila.

¹⁴Dzonora nen ël frel ëd vòst pare avend ëd relassion sessuaj con soa fomna. A l’é vòstra magna^[6].

¹⁵Avèje pa ‘d relassion sessuaj con vòstra nòra. A l’é la fomna ‘d vòst fieul: Avèje pa ‘d relassion sessuaj con chila^[7].

¹⁶Avèje pa ‘d relassion sessuaj con vòstra cugnà. A l’é la fomna ‘d vòst frel^[8].

¹⁷Pijé nen na fomna e soa fija për feje dventé tut’e doe vòstre mojé, e gnanca la fija ‘d sò fieul o ‘d soa fija^[9]. A son parente stréite ‘d chila: a sarìa n’ansest.

¹⁸Pijé nen për mojé la seure ëd vòstra fomna mentre ch’a l’é an vita, le relassion an tra ‘d lor a podrìo provoché ‘d rivalità.

¹⁹Acòsteve pa a na fomna për avejne ‘d relassion sessuaj antramentre che chila a l’ha soe mëstruassion^[10]. A l’é 'mpura da la mira ritual.

²⁰Avèje pa ‘d relassion sessuaj con la fomna d'un dij vòstri compaisan israelita^[11]: it restries ampur.

²¹Sacrifiché gnun dij vòst fieuj an campandlo ant ël feugh an onor ëd Molech^[12]. It profanries ël nòm ëd vòst Dé. Mi i son ël Signor.

²²Iv cogereve pa con n’òm parèj coma ch’iv cogie con na fomna. A l’é n’abominassion^[13].²³Avèje nen ëd rapòrt sessuaj con ëd bestie. It restries ampur. Che gnun-a fomna as eufra për cobiesse con na bestia: a l’é na përversion^[14].

²⁴Rendreve pa 'mpur con gnun-e dë ste pràtiche-sì. Sossì a l’é lòn ch’a fan le nassion ch’i l’hai taparaje via dë 'dnans ëd vojàutri. ²⁵Sò pais ëd lor a l’é dventà 'mpur. Për lòn i-j ciamerai cont ëd coste colpe, e ‘l pais a gumiterà ij sò abitant. ²⁶Vojàutri, a l’opòst, tant ij nativ che ij foresté ch’a stan an mes ëd voi, i osservereve ij mè decret e mie decision e i comëttreve gnun-e ‘d coste abominassion. ²⁷Coj ch’a vivìo ant ël pais anans ëd vojàutri, a-j comëttìo, e ‘l pais a l’é restane 'mpur. ²⁸Artorné pa a profanelo, përchè ‘l pais a podrìa bin gumité 'dcò vojàutri coma ch’a l’ha gumità coj ch’a-i j’ero anans. ²⁹Përchè tuti coj ch’a comëtto ‘d abominassion parìja a saran bandì dal pòpol d’Israel. ³⁰Nopà, vojàutri i guernereve ij mè comandament e i copiereve gnun-a dle abominassion ch’as fasìo anans ëd vojàutri. Rendevene nen impur ëdcò vojàutri. Mi i son ël Signor, vòst Dé.

Nòte

1. Cfr. Ezechiel 18:9; 20:11-13; Luca 10:28; Roman 10:5; Galat 3:13.
2. O “dl’istess tò sangh”.
3. O “dësquatandje la nudità”.
4. Levitich 20:11; Deuteronòmi 22:30; 27:20.
5. Cfr. Levìtich 20:17; Deuteronòmi 27:22.
6. 18:12-14 cfr. Levìtich 20:19-20.
7. Cfr. Levìtich 20:12.
8. Cfr. Levìtich 20:21.
9. Cfr. Levìtich 20:14; Deuteronòmi 27:23.
10. Cfr. Levìtich 20:18.
11. Cfr. Levìtich 20:10.
12. Cfr. Levìtich 20:1-5.
13. Cfr. Levitich 20:13.
14. Cfr. Surtìa 22:19; Levìtich 20:15-16; Deuteronòmi 27:21.