La Bibia piemontèisa/Testament Vej/Levitich/Levitich 20

←Levitich 19

La Bibia piemontèisa Levìtich

Levìtich 21→

Levìtich

20

La Bìbia piemontèisa - Levitich 20

Disposission penaj

¹Nosgnor a l’ha parlaje ancora a Mosè. A l’ha dije: ²“Dije sossì a j’Israelita: ‘Se n’Israelita opura un dij foresté ch’a stan an Israel a dovèissa dé sò fieul an sacrifissi an onor ëd Molech, a sarà condanà a mòrt. La gent ëd ël pais a l’avrà da masselo a prassà. ³Mi medésim im virerai contra na tal përson-a e i la scasserai da sò pòpol Israel, përchè an ofrend un fieul a Molech a l’ha rendù impur mè Santuari e a l’ha profanà mè nòm sant. ⁴An efet, se la gent ëd ël pais a dovèissa saré j’euj dë 'dnans ëd n’òm ch’a daga ‘n fieul a Molech e a lo condan-a nen a la mòrt, ⁵mi midem im virarai contra na tal përson-a e contra ‘d soa famija e i la tajerai fòra da sò pòpol d’Israel, ansem a tuti coj che, coma chila, as dan a l’idolatrìa e as prostituisso an rendend venerassion a ‘l Molech.

⁶Dl’istessa manera, se n’òm a va a consultesse con coj ch’a son ampossessà da lë spirit ëd Piton^[1] o con dj’andvin, lolì a sarìa l’istess che prostituisse rendend l’adorassion a d’àutri dio. Mi i lo tajerai fòra da la gent d’Israel.

⁷Conserveve sant, e i sareve sant, përchè mi i son ël Signor, vòst Dé. ⁸Guerné ‘dcò mie ordinanse e buteje an pràtica. Mi i son ël Signor ch’i veuj feve sant^[2].

⁹L’òm ch’a dovèissa maledì sò pare e soa mare a l’avrà da esse condanà a mòrt^[3]. La responsabilità ‘d soa mòrt a casca mach dzora 'd chiel: a l’avìa spuvà ‘d maledission contra sò pare e soa mare.

¹⁰Se cheidun a comëtt adulteri con la fomna ‘d n’àutr, tant l’adulter che l’adùltera a l’avran da esse condanà a mòrt^[4]. ¹¹Se cheidun as cogia con un-a dle fomne ‘d sò pare, dzonorand parèj sò pare, tùit e doi a l’avran da esse condanà a mòrt. A son lor ij responsabij ëd soa mòrt ëd lor^[5]. ¹²Se cheidun as cogia con soa nòra, tùit e doi a l’avran da esse condanà a mòrt. A l’han comëttù na përversion. A son lor ij responsabij^[6] ëd soa mòrt. ^[7].

¹³Se n’òm as cogia con n’àutr òm coma ch’as fà con na fomna, tùit e doi a comëtto n’abominassion. A l’avran da esse condanà a mòrt. A son lor ij responsabij ‘d soa mòrt ëd lor^[8].

¹⁴Se n’òm a dovèissa pijé për mojé tant la fia che soa mare, a comëtt n’ignomìnia. Tant chiel coma loràutre doe a l’avràn da esse brusà viv. A l’é parèj ch’as ampediss che na tal ignomìnia a së spantia an tra ‘d vojàutri^[9].

¹⁵Se n’òm as cobia con na bestia, a l’avrà da esse condanà a mòrt. Massé ‘dcò la bestia. ¹⁶Se na fomna a tenta 'd cobiesse con na bestia, ch’as massa la fomna e la bestia. A saran condanà a mòrt. A l’han bin merità la mòrt^[10].

¹⁷Se n’òm a pija për mojé soa sorastra da banda ‘d pare o ‘d mare - chiel a la vëdd patanùa e chila a lo vëdd patanù, a l’é na ròba da fé onta. A saran bandì da la presensa dj’àutri Israelita. L’òm ch’a l’abia avù ‘d relassion sessuaj con soa sorastra a portrà ‘l pèis ëd soa colpa^[11].

¹⁸Se cheidun as cogia con na fomna durant le mëstruassion, tùit e doi a l’avran da esse bandì dal pòpol d’Israel, a l’han consentì a lassé patanùa la sorgiss ëd ël sangh ëd la fomna^[12].

¹⁹Ch'i l'àbie pa 'd relassion sessuaj con la seure ëd vòstra mare o ‘d vòst pare. A sarìa ‘d relassion con ëd parent ëstrèit. Tùit e doi a l’avran da porté ‘l pèis ëd soa colpa ‘d lor. ²⁰Se n’om as cogia con soa magna, a dzonora sò barba. Tùit e doi a l’avran da porté ‘l pèis ëd ël sò pëccà e a meuireran stéril^[13]. ²¹Se n’òm a pija për mojé soa cugnà, a comëtt n’inmoralità. A dzonora sò frel. A l’avran pa na dissendensa^[14]”.

Esortassion

²²Guerné, donca, mie prescrission e mie lege, e buteje an pràtica. Parèj av gumiterà pa ël pais ch’iv farai intré për abiteje. ²³Copié nen le costume dij pòpoj ch’i l’hai taparaje vìa dë 'dnans ëd vojàutri. Soa manera ‘d vive ‘d lor am fà scheur. ²⁴A l’é për lòn ch’i l’hai dive: ‘Pijeve possession vojàutri ëd sò pais ëd lor; iv lo dago an ardità; a l’é ‘n pais ch’a cola ‘d làit e d’amel. Mi i son ël Signor, vòst Dé, ch’i l’hai separave da j’àutri pòpoj. ²⁵L’istess i l’eve da fé vojàutri con le bestie: i l’eve da separé la bestia pura da cola 'mpura, j’osej pur da j’ampur. Rendevne nen detestabij an tocand o mangiand ëd bestie, d’osèj o ‘d bestiòle ch’a së struso për tèra; a l’é bin mi ch’i l’hai butaje da banda përchè ch’a sìo considerà 'mpure.

²⁶Esse donca sant për mi, përchè mi i Son sant, mi, ël Signor, ch’i l’hai separave da tuti j’àutri popolj përchè i sie ij mè.

²⁷Cora che n’òm o na fomna a dovèissa esercité l’art d’evoché jë spirit dij mòrt, o ch’a fasa l’andvin, a l’avrà da esse massà a prassà. A saran responsabij lor medèsim ëd soa mòrt ëd lor.

Nòte

1. O”con ëd negromant”.
2. O “ch’iv santifico”.
3. Cfr. Surtìa 21:17; Maté 15:4; March 7:10.
4. Cfr. Surtìa 20:14; Levìtich 18:20; Deuteronòmi 5:18.
5. Cfr. Levitich 18:8; Deuteronòmi 22:30; 27:20.
6. O lét. “so sangh a sarà dzura ‘d lor”.
7. Cfr. Levitich 18:15.
8. Cfr. Levìtich 18:22.
9. Cfr. Levitich 18:17; Deuteronòmi 27:23.
10. 20:15-16, cfr. Surtìa 22:19; Levìtich 18:23; Deuteronòmi 27:21.
11. Cfr. Levìtich 18:9; Deuteronòmi 27:22.
12. Cfr. Levìtich 18:19.
13. 20:19-20, cfr. Levìtich 18:12-14.
14. Cfr. Levìtich 18:16.