La Bibia piemontèisa/Testament Neuv/Roman/Roman 10

←Roman 9

La Bibia piemontèisa Roman

Roman 11→

La Bìbia piemontèisa - Roman 10

10

¹Car ij mè frej e seur, con tut mè cheur bin i vorìa che 'l pòpol d’Israel a fussa salv, e për lon i prego Nosgnor. ²I peudo rende testimoniansa che, ant la pràtica 'd soa religion, lor a son motobin diligent, ma a falisso përchè soa conossensa a l’é dëstravisà^[1]. ³A chërdo che l’esse giust dë 'dnans a Nosgnor a sia l’arzultà 'd soa osservansa rigorosa dla Lege, damentre che, a l’opòst, a l’é 'l don ëd Nosgnor^[2] e lolì lor a l’aceto nen^[3] . ⁴A l’é 'l Crist ch’a l’ha compì 'l propòsit che la Lege a l’era destinà^[4]. A l’é për lòn ch’a son considerà giust dë 'dnans a Nosgnor tuti coj ch’as fido an chiel^[5].

L’istess Signor tant pr’ ij Giudé che për j’àutri pòpoj

⁵Mosé a parla d’esse giust^[6] për ël mojen ëd l’osservansa dla Lege cand ch’a scriv: “Coj ch’a compisso le prescrission ëd la Lege a vivran mersì a lor^[7]”. ⁶Contut, la via ch’a men-a a la giustissia^[8] basà an sla fede a dis: “Dis nen an tò cheur^[9]: Chi é-lo ch’a monterà an cel^[10]?”. Lolì a l’é fene calé ‘l Crist. ⁷Opura: “Chi é-lo ch’a calerà fin-a a l’abim^[11]?”. Lolì a l’é fene monté ‘l Crist dai mòrt. ⁸An efet, la Scritura a dis: “La Paròla a l’é motobin davzin a ti, an toa boca e an tò cheur”^[12]. Col-lì a l’é pròpi 'l mëssagi riguard a la fede che nojàutri i nunsioma: ⁹s’it confesse con la boca^[13] che Gesù a l’é 'l Signor e s’it chërde an tò cheur che Nosgnor a l’ha arsussitalo dai mòrt, ti 't saras salv. ¹⁰Përchè a l’é an chërdend an tò cheur che Nosgnor at considererà giust, e a l’é an confessand con la boca ch’it saras salv. ¹¹La Scritura a dis: “Chionque a chërd an chiel a l’avrà pa da vërgogness-ne^[14]”.

¹²A-i é gnun-a diferensa, donca, an tra ij Giudé e coj ch’a lo son nen^[15], da già che parèj tùit a l’han un medésim Signor, ch’a l’é generos anvers a tuti coj ch’a lo invòco. ¹³An efet, “tùti coj che 'l nòm ëd Nosgnor a l’invòco a saran salv^[16]”.

¹⁴Ma com é-lo ch’a invocheran col ch’a l’han nen chërduje? E com é-lo ch’a chërdran an col ch’a l’han mai sentune parlé? E com é-lo ch’a na sentiran parlé s’a-i é gnun ch’a lo nunsia?^{[17] 15}E com é-lo ch’as podrà nunsielo s’a-i é gnun che për lòn a l’é stàit mandà? A l’é coma ch’a l’é scrit: “Òh coma ch’a l’é bel da vëdse quand ch’a rivo^[18] coj ch’a nunsio 'd bon-e neuve!^[19]” ¹⁶Ma nen tùit a l’han fàit ubidiensa a la bon-a neuva dl’Evangeli, përchè Isaìa, ël profeta, a dis: “Signor, chi é-lo ch’a l’ha chërdù a nòstra predicassion?^[20]” ¹⁷La fede, donca a ven dal sente, l’é a dì, dal sente la bon-a neuva riguard al Crist. ¹⁸Contut, mi i ciamo: “Ël pòpol d’Israel, ha-lo nen sentula? A l’ha bin sentula! Sò anunsi a l’ha travërsà tuta la tèra, e soe paròle fin-a ai confin dël mond!^[21]. ¹⁹Ancora i ciamo: “É-lo che 'l pòpol d’Israel a l’ha capilo? Mosé për prim a dis: “I l’hai cissave a d’esse gelos d’un pòpol ch’a l’é gnanca na nassion. I farai ch’i v’anràbie për ël mojen ëd gent sensa cognission^[22]”. ²⁰E Isaìa a riva fin-a a dì: “I son ëstàit trovà da coj ch’am sercavo nen, e i son manifestame ciàir a coj ch’a gnanca a ciamavo 'd mi^[23]”. ²¹A l'opòst, riguard a Israel, Nosgnor a l’ha dit: “Për tut ël di i l’hai tenù dëstèise mie man anvers a 'n pòpol arviros ch’a ubidiss nen^[24]”.

Nòte

1. O “sensa cognission”, “ant lòn ch'a conòsso nen le ròbe coma ch'a stan”.
2. O “a ven da Nosgnor”.
3. O “a fan finta ‘d nen savèilo”.
4. O “Crist a l’è ‘l fin dla Lege”, “ël tèrmin dla Lege”.
5. O “a tuti coj ch’a chërdo” (an lòn ch’a l’ha compì ‘l Crist).
6. O “dla giustissia”.
7. Cfr. Levitich 18:5.
8. A l’esse giust, a pòst con Nosgnor.
9. Cfr. Deuteronòmi 9:4.
10. Cfr. Deuteronòmi 30:12.
11. Cfr. Deuteronòmi 30:13.
12. 10:6-8 cfr. Deuteronòmi 30:12-14.
13. O “se franch it diciare”.
14. Cfr. Isaìa 28:16.
15. O “ij Gentij”, “j’àutre gent”.
16. Cfr. Gioel 2:32.
17. Cfr. Gioel 2:32.
18. O “Coma ch’a son bej ij pé ‘d coj ch’a nunsio la pas”.
19. Cfr. Isaìa 52:7; Nàum 1:15.
20. Cfr. Isaìa 53:1.
21. Cfr. Salm 19:4.
22. Cfr. Deuteronòmi 32:21.
23. Cfr. Isaia 65:1.
24. Cfr. Isaia 65:2.