La Bibia piemontèisa/Testament Vej/Naum/Naum 1

←Michea 7

La Bibia piemontèisa Nàum

Nàum 2→

1

¹Presagi a propòsit ëd Ninive ch’a l’é vnuje coma na vision a Naum d’Elcos.

La giustissia ‘d Nosgnor

²[Alef] Nosgnor a l’é ‘n Dé gelos ch’as pija l’arvangia. Nosgnor a l’é ‘l vendicator; chiel a l’é pien ëd fot! Nosgnor as pija l’arvangia dij sò aversari; a l’ha d’ameiror për ij sò nemis. ³Nosgnor as anrabia nen facilment, ma quand ch’a lo fa, chiel a manifesta tuta soa potensa. Ël colpèivol a sarà ‘d sicur castigà. [Bet] Nosgnor as fà stra ant la burian-a e ant j’oragan; le nivole a son la póer che ij sò pass a àusso. ⁴4 A mnassa ‘l mar e a lo fà sëcché; a suva tùit ij fium. [Dalet] Ij pra ‘d Basan e ‘l mont dël Carmel a stanto, ëdcà la fior dël Liban a slanghis! ⁵[He] Dëdnans a chiel le montagne a tramblo, le colin-e a biàuto, [Vav] a s’àussa la tèra dëdnans a chiel, ël mond e tuti coj ch’a jë stan. ⁶[Zain] Sò ìmpit! Chi é-lo ch’a peul sostnilo? E chi a resisterà dëdnans a soa flin-a afoà [Het] Sò furor a së spantia com ël feu e le rochere a jë së sfriso dëdnans. ⁷[Tet] Nosgnor a l’é brav; a l’é na sosta sicura ant ël dì dl’angossa. [Jod] A conòss coj ch’a l’han fiusa an chiel, ⁸ant ël moment che l’inondassion a s’avzin-a. [Caf] A riduvrà a gnente coj ch’a-j monto contra; chiel a përséguita ij sò nemis ant lë scurità.

Sentense profétiche a Giuda e a Ninive

⁹[A Giuda] Còs che i trame vojàutri contra ‘d Nosgnor? Chiel av dëstruerà con un sol colp; a l’avrà nen da manca ‘d frapé doe vire! ¹⁰A saran consumà coma ‘n baron ëd ronze o coma paja sëcca. ¹¹[A Assur] A l’é da ti ch’a l’é surtije col ch’a médita ‘l mal contra Nosgnor, l’òm dij consej gram. ¹²[A Giuda] Parèj a dis Nosgnor a coj ëd Giuda: “Ch’a sio pura potent, ch’a sio pura ‘d bon nùmer: a saran sià e a dëspariran. Ma s’i l’hai umiliate, i t’umiliarai pì nen. ¹³E asess i vado a brisé sò giov ch’at greva ansima, i s-ciapraj toe caden-e. ¹⁴[Al rè ‘d Ninive] Varda ‘l decret ëd Nosgnor contra ‘d ti: A-i sarà pì nen na rassa ch’a porterà tò nòm; i-i farai dësparì dai templ dij to dio le statue scrupije e fondùe; i vasterai toa tomba përchè ti ‘t vales pròpi gnente.

Proclamassion dla liberassion ëd Giuda

¹⁵Varda! A-i é ‘n crior ch’a cor për ij mont. Un mëssagé a nunsia la liberassion: “Vojàutri ëd Giuda! Selebré vòstre feste! Compì vòstri vot sacrà për laudé Nosgnor! Përché mai pì j’Assir, coj përvers, at invadran: lor a son ëstàit dël tut anientà.