La Bibia piemontèisa/Testament Vej/Naum/Naum 2

←Nàum 1

La Bibia piemontèisa Nàum

Nàum 3→

La Bìbia piemontèisa - Naum 2

2

Proclamassion ëd la dëstrussion ëd Ninive

¹[Le vardie ‘d Ninive a crijo:] “Un vastador a ven anans për atachene! Rinforsé la vardia dij rampar! Goerné la stra! Pronteve a la bataja! Cheuje tute le fòrse!”.

²Òhi! Nosgnor a stabiliss torna la glòria ‘d Giacòb, la glòria ch’a aparten a Israel! Ij nemis a l’avìo butala a sach fin-a a ravagé le tere coltivà.

Vision profetica dla crova ‘d Ninive

³Jë scu dij sò guerié a son ross, ij sò vajant soldà a son vestì dë scarlat^[1], ij chèr ëd fer a luso coma ‘d feu për tut sò assel, ant ël di ch’as buto an riga për la bataja; ij sivalié a breugio ‘d rabia; le lanse a bërluso. ⁴Për la stra ij chèr a fan ëd rabel, a scaròsso travers le piasse: a vëddje a smijo tanme ‘d fiame; a coro tanme la lòsna dë ‘d sà e ‘d là. ⁵Ël rè a crija ai sò comandant, ma lor as antrapo për la stra. J’agressor a së slanso contra dij rampar guernà sota jë scu. ⁶Ora a sfòrso le pòrte ch’a dan an sij canaj e ‘l palass a l’é ciapà da lë sparm. ⁷Ninive, l'argin-a dla blëssa, a l’é portà via an esili, le fomne ch’a la soagnavo a gëmmo tanme la plenta dle colombe, e as bato lë stòmi. ⁸Ninive a l’era tanme na vasca d’eva sèmper pien-a, ma adess a l’é dësveuidasse. A crija a coj ch’a në scapo:: “Fermeve! fermeve!”, ma gnun a torna andarera. ⁹Ij sò conquistador a crijo: “Buté a sach l’argent! Ravagé l’òr! A-i é ‘d tesòr sensa fin, ëd baron ëd ròba la pì pressiosa. ¹⁰Devastassion! Maròda! Ravagi!”. A tùit ël cheur a ven men-o, a-j tërmolo ij ginoj, jë stomi a frisson-o e tùit ij visagi a ven-o smòrt.

Sentensa an sël Leon d’Assur

¹¹Anté ch’a l’é adess la tan-a dij leon, la balma dij lionòt? Cand che ‘l leon a në surtìa, la leonëssa a-i restava con ij sò cit, e nen a-j dasìa fastudi. ¹²Ël leon a andasìa a cassa për deje da mangé ai sò cit e provëddje ‘d pijàite për soe leonësse. A ampinija ij sò arpar ëd carn frësca e soe tan-e ‘d pijàita.

Crij ëd bataja dël guerié divin

¹³“Varda! I son tò aversari, Ninive! I lo diso mi, ël Signor ëd l’Univers. I darai a le fiame tùit ij tò chèr. La spa a dvorerà ij tò lionòt. I son an camin ëd fé dësparì da la tera toe rapin-e; as sentirà pa pì la vos dij tò messagé”.

Nòte

1. Coma ant la guèra psicològica, ij guerié soens a portavo le divise colorà 'd ross sangh për feje tëmma ai sò nemis. Cfr. Esechiel 23:5-6.