La Bibia piemontèisa/Testament Neuv/Timot/2Timot 4

←2 Timòt 3

La Bibia piemontèisa Litre a Timòt

Tito 1→

2 Timòt

La Bìbia piemontèisa - 2 Timòt 4

4

Nunsié l’Evangeli

¹Dë 'dnans a Nosgnor Dé e a Gesù Crist, ch’a l’ha da giudiché ij viv e ij mòrt cand ch’a vnirà un bel dì a stabilì sò Regn, it suplico: ²prédica la Paròla. Dëmòrd^[1] mai: falo tant cand ch’a l’é convenient che cand ch’a podrìa esse nen convenient; rimpròcia, antërpela, esòrta coma un ch’a l’ha tanta passiensa e ch’a l’é bon ëd mostré. ³Përchè ‘l temp a vnirà che la gent a soportrà pì nen ëd sente la san-a dotrin-a; ma sicoma a-j piasrà ch’a-j gatìjo j’orije, a sërcran coj ch’a-j mostro pitòst lòn ch’a-j fà pì còmod^[2]. ⁴La vrità a la voreran pi nen sente e a daran la preferensa a coj ch’a-j conto ‘d fàule. ⁵Ti, contut it l’has da ten-e na ment ciàira^[3] an tute le situassion. Àbie nen tëmma dij patiment ch’it podrie avèj për càusa dla fede. Angagg-te ant l’evangelisassion, compiss bin tò ministeri.

⁶Për lòn ch’am riguarda, i son rivà al pont ëd smon-e mia vita tanme na libassion^[4]; l’ora ‘d mia partensa a l’é davzin-a. ⁷I l’hai fàit un bon combatiment; i l’hai finì la corsa; i l’hai goernà la fede. ⁸A l’é conservà për mi un premi - la coron-a dla giustissia, che Nosgnor, ël giust Giudes, am darà ant ël dì ‘d sò artòrn. Ël premi a l’é nen mach për mi ma për tuti coj ch’a speto con impassiensa che chiel a comparissa^[5].

Ùltime paròle ‘d Pàul

⁹Dësgagg-te ‘d ven-e bin tòst da mi. ¹⁰Përchè 'l mond a-j piasìa 'd pì, Demas^[6] a l’ha chitame e a l’é andass-ne a Tessalònica. Crescent a l’é andass-ne an Galassia, e Tito^[7] an Dalmassia. ¹¹Luca^[8] a l’é l’ùnich ch’a sia restaje con mi. Pija March e mnelo ansem a ti, përchè a l’é ùtil për mè ministeri. ¹²I l’hai ‘dcò mandà Tìchico^[9] a Èfeso. ¹³Cand ch’it vniras, pòrta con ti ël mantel ch’i l’hai lassà a Tròade^[10], da Carpo, e ij mè lìber, dzurtut mie bërgamin-e. ¹⁴Sànder^[11], ël pairolé, a l’ha fame pròpi mal: Nosgnor a-j darà lòn ch’a mérita lòn ch’a l’ha fàit^[12]. ¹⁵Pijete donca guarda da chiel, përchè a l’ha fàit fòrt oposission a mia predicassion.

¹⁶An mia prima difèisa dë 'dnans al tribunal, a l’é vnuje gnun con mi. Tùit a l’avìo bandoname. Che lolì a-j sìa nen portà a débit! ¹⁷Nosgnor, contut, a l’é stame dacant e a l’ha dame fòrsa përchè i podèissa prediché la Bon-a Neuva antrega e che tùit ij pagan a la podèisso sente. Nosgnor a l’ha liberame da la boca dij leon. ¹⁸Vera! Nosgnor am libererà ‘dcò da tute j’ansidie për ëmneme sicur an sò Regn dël cél. A chiel sia la glòria për ij sécoj dij sécoj. Amen.

¹⁹Salut-me Prisca e Aquila^[13], ansem a tuti coj ch’a vivo ant la ca d’Onesìforo^[14]. ²⁰Erasto^[15] a l’é restà a Corint, e i l’hai lassà Tròfimo^[16], ch’a l’era malà, a Mileto.

²¹Dësgagg-te 'd ven-e anans ch’a-i riva l’invern. It salutan Eubul, Pùdens, Lino, Claudia e tùit ij frej e le seur.

²²Che ‘l Signor Gesù Crist a sìa con tò spirit. Che la grassia a sìa con vojàutri.

Nòte

1. O “ansist”.
2. O “ch’a l’han veuja ‘d sente”.
3. O “it l’has da esse mzurà”.
4. N’oferta a Nosgnor.
5. O “soa manifestassion”.
6. Cfr. Colossèis 4:14; Filèmon 24.
7. Cfr. 2 Corint 8:23; Galat 2:3; Tito 1:4.
8. Cfr. Colossèis 4:14; Filèmon 24.
9. Cfr. At 20:4; Efesin 6:21-22; Colossèis 4:7-8.
10. Cfr. At 20:6.
11. Cfr. 1 Timòt 1:20.
12. Cfr. Salm 62:12; Roman 2:6.
13. Cfr. At 18:2.
14. Cfr. 2 Timòt 1:16-17,
15. Cfr. At 19:22; Roman 16:23.
16. Cfr. At 20:4; 21:29.