La Bibia piemontèisa/Testament Neuv/Arvelassion/Arvelassion 6

←Arvelassion 5

La Bibia piemontèisa Arvelassion

Arvelassion 7→

Arvelassion ëd Gioann

La Bìbia piemontèisa - Arvelassion 06

6

L’agnel a s-ciapa ij prim ses cacèt

¹Apress ëd lòn i l’hai vëddù che l’Agnel a l’avìa s-ciapà un dij cacèt an sël ròtol ëd bërgamin-a, e i l’hai sentù un dij quatr esse viv ch’a disìa, con na vos ch’a smijava l’arson d’un tron: “Ven sì e varda!”. ²I l’hai campaje j’euj e i l’hai vëddù ch’a j’era ‘n caval bianch^[1], e col ch’a lo montava a l’avìa n’arch. A l’han daje na coron-a e, a l’é surtì për vince motobin ëd bataje e vagné la vitòria^[2].

³Cand che l’Agnel a l’ha s-ciapà lë scond cacèt, i l’hai sentù lë scond esse viv ch’a disìa: “Ven sì e varda!”. ⁴E a l’é surtìje n’àutr caval che sta vira a l’era ross^[3]. A col ch’a lo montava a l’é staje dàit na spa granda e ‘l podèj ëd gavé la pas da la tèra përchè j’òm as massèisso j’un j’àutri. E a l’é staje ‘d guèra e ‘d carnagi daspërtut.

⁵Cand che l’Agnel a l’ha s-ciapà ‘l ters cacèt, i l’hai sentù ‘l ters esse viv ch’a disìa: “Ven sì e varda! E a l’é surtije un caval nèir^[4], e col ch’a lo montava a l’avìa an man na balansa. ⁶E i l’hai sentù na vos ch’a vnisìa d’an mes ai quatr esse viv e ch’a disìa: “Na mica ‘d pan ëd forment o tre miche d’òrdi a costran na giornà ‘d pàga^[5] e sgairé nen l’euli d’uliva e ‘l vin!”.

⁷Cand che l’Agnel a l’ha s-ciapà ‘l quart cacèt, i l’hai sentù la vos dël quart esse viv ch’a disìa: “Ven sì e varda!”. ⁸E a l’é surtìje ‘n caval spali^[6] e col ch’a lo montava a l’avìa për nòm Mòrt, e a j'andasìa dapress l'Infern^[7], sò compagn. A l’han daje ‘d podèj dzora la quarta part ëd la tèra përchè a massèisso con la spa, la fam, la pestilensa e con le bestie sarvaje dla tera^[8].

Ël cacèt ch’a fà sinch

⁹Apress ëd lòn, cand che l’Agnel a l’ha s-ciapà ‘l cacèt ch’a fà sinch, i l’hai vëddù che sòta l’autar a j’ero j’ànime ‘d coj ch’a l’ero stàit massà për motiv ëd la Paròla ‘d Nosgnor e dla testimoniansa ch’a l’avìo dàit^[9]. ¹⁰A crijavo a tuta fòrsa an disand: “Fin-a a cand, Nosgnor sant e ch’a dis la vrità, fas-to nen giustissia e vendiches-to nen nòst sangh sù coj ch’a stan an sla tèra për lòn ch’a l’han fane? ¹¹E a l’é staje dàit na vesta bianca a pr’un e a l’han dije ch’as dago pas ancora pr’ un pò ‘d temp, fin-a a tant ch’a sìa compì ‘l nùmer dij sò compagn e fratej che, coma lor, a l’avìo da esse massà për giontesse a lor.

Ël cacèt ch’a fà ses

¹²Apress ëd lòn, cand che l’Agnel a l’ha s-ciapà ‘l cacèt ch’a fà ses, i l’hai vëddù ch’a l’é vnuje ‘n gran taramòt^[10]. Ël sol a l’é restà nèir com ël carbon^[11] e la lun-a a l’é dventà rossa coma s’a fussa ‘d sangh^[12]; ¹³Le stèile dël céla son drocà an sla tèra coma s'a fusso ‘d fìj verd ch’a dròco për tèra da ‘n fijé sopatà pr’ un gran vent. ¹⁴Ël cel a l’é anrolasse coma na bergamin-a, e tute le montagne e j'ìsole a son ëstàite bogià da sò leugh^[13]. ¹⁵Peui ij rè dla tèra, coj ch’a conto^[14], ij generaj, jë sgnor, le përsonalità^[15], jë s-ciav e le përson-e lìbere, tùit a son andàit a stërmesse ant le balme e an tra ij ròch dle montagne^[16]. ¹⁶E a disìo a le montagne e ai ròch: “Croéne a còl, e stërmene da la facia ‘d col^[17] ch’a l’é setà an sël tròno e da l’ira dl’Agnel, ¹⁷përchè a l’é rivà ‘l gran dì dl’ira, e chi é-lo ch’a podrìa sostnila^[18]?”.

Nòte

1. Cfr. Sacharìa 1:8; 6:3,6.
2. O “com un vincitor a l’é surtì për vince”.
3. Cfr. Sacharìa 1:8; 6:2.
4. Cfr. Sacharìa 6:2,6.
5. O “un dné”.
6. O “color ëd la sënner”.
7. O “Hades”, “tomba”.
8. Cfr. Esechiel 14:21.
9. O “pr’ esse stàit fedej a soa testimoniansa ‘d lor
10. Cfr. Arvelassion 11:13; 16:18.
11. Let. “nèir coma ‘n sach fàit ëd pèil ëd cavra”. An piemontèis as podrìa ‘dcò disse: “nèir com ël tabaro dël diav”. Cfr. Isaia 13:10; Gioel 2:10,31; 3:15; Maté 24:29; March 13:24:25; Luca 21:25.
12. Cfr. Gioel 2:31.
13. Cfr. Isaia 34:4; Arvelassion 16:20.
14. O “Ij prinsi”.
15. O “ij potent”.
16. Cfr. Isaia 2:19,21.
17. Cfr. Osea 10:8; Luca 23:30.
18. O “dzorvive”. Cfr. Gioel 2:11; Malachìa 3:2.