La Bibia piemontèisa/Testament Neuv/Arvelassion/Arvelassion 5

Da Wikisource.
Jump to navigation Jump to search

Arvelassion ëd Gioann[modifiché]

5[modifiché]

La dovertura dël ròtol ëd bërgamin-a[modifiché]

1Peui i l'hai vëddù ant la man drita 'd col ch'a l'era stà ans sël tròno un ròtol ëd bërgamin-a scrit për dë 'dnans e për darera e fërmà con set cacèt. 2E i l'hai vëddù n'àngel poderos ch'a sclamava con na gran vos: "Chi é-lo ch'a l'é degn ëd deurbe 'l lìber e dë s-ciapene ij cacèt? 3Ma gnun a podìa deurbe 'l liber e leslo, nì ant ël cel, nì ans la tèra, nì sòta la tèra, 4Antlora i l'hai comensà a pioré fòrt[1] përchè ch'as trovava gnun ch'a fussa degn ëd deurbe 'l ròtol e 'd leslo. 5E un dj'ansian[2] a l'ha dime: "Piora nen. Varda: ël leon dla tribù 'd Giuda, l'ardité dël tròno 'd David, a l'é stàit vitorios. A l'é chiel ch'a l'é degn dë s-ciapé ij set cacèt. 6Peui i l'hai vëddù n'Agnel ch'a smijava scanà, ma che ora a stava 'n pé an tra 'l tròno e le quatr esse viv e an tra ij vint-quatr ansian. Chiel a l'avìa set còrn e set euj, ch'arpresento ij set ëspirit ëd Nosgnor mandà për tuta la tèra[3]. 7Peui a l'é vnù e a l'ha pijà 'l lìber da la man drita ëd col ch'a l'era setà an sël tròno, 8e quand ch'a l'avìa pijà 'l ròtol, ij quat esse viv e ij vint-quatr ansian a son campasse a tèra[4] dëldnans a l'Agnel. Ognidun ëd lor a l'avìa n'arpa e 'd càles d'òr pien d'ancens, ch'a son le preghiere dël pòpol ëd Nosgnor[5].

9A cantavo 'n càntich neuv ch'a disìa: "Ti 't ses degn d'arsèive ël lìber e dë s-ciapene ij cacèt, dagià ch'it ses stàit ëscanà e che tò sangh a l'ha riscatà për Nosgnor ëd gent da ògni tribù, lenga, pòpol, e nassion. 10It l'has faje vnì 'n regn e 'd sacerdòt për nòst Dé. A regneran an sla tèra". 11Peui i l'hai torna vardà e i l'hai sentù la vos ëd mijé e 'd milion ëd j'àngej ansema a le creature vive e a j'ansian, ch'a stavo dantorn al tròno. 12A l'era 'n còro poderos ch'a cantava: "A l'é degn l'Agnel ch'a l'é stàit ëscanà, d'arsèive la potensa, le richësse, la sapiensa, la fòrsa, l'onor, la glòria, e la benedission!". 13Peui i l'hai sentù la vos ëd tùit j’esse ch'a stan an cel, an sla tèra e sòta la tèra. A cantavo: "Benedission, onor, glòria e potensa a van ëd drit a col ch'a l'é stà an sël tròno e a l'Agnel për ij sècoj dij sècoj!". 14E ij quat esse viv a disìo: "Amen!", e ij vint-quat ansian a son campasse con la facia a tèra e a l'han rendù l'adorassion a col ch'a viv për ij sècoj dij sècoj.

Nòte[modifiché]

  1. O "dësconsolà".
  2. O "un dij vint-quat ansiàn".
  3. O "ch'a son mandà ant minca part ëd la tèra".
  4. O "a son anginojasse", "a son butasse an ginojon".
  5. O "dij sant".