Salm

141. Nosgnor, it sùplico: ven an pressa a giuteme!

Ël salmista a ciama a Nosgnor ch’a lo guerna dal pecà e da le machinassion dij pecator.

¹Un salm ëd David. Nosgnor, it sùplico: ven an pressa a giuteme! Fà 'tension a mia vos cand ch’a crìja agiùt. ²Aceta mia orassion coma s’a fussa ‘l fum dl’ancens^[1] ch’a riva fin-a a ti; l’ora ch’i àusso le man an preghiera coma ‘n sacrifissi dla sèira. ³Nosgnor! Buta na vardia a mia boca cand che ij mè làver as deurbo për parlé. ⁴Përmèt pa a mè cheur ëd dé fòra 'd paròle grame e fé ‘d machinassion émpie ansema a la gent ch’a veul fé ‘d mal. Bele s’a smijo ‘d ròbe bon-e, i mangerai pa lòn ch’a më smon-o. ⁵Ch’a sìo ij giust a deme ‘d patele ‘d misericòrdia cand ch’i l’hai da esse arprocià. Che l’euli përfumà dij pecator a staga bin lontan da mia testa e che mie orassion a sio sempe na testimoniansa^[2] contra 'd soa malissia ‘d lor. ⁶Ij pecator a saran campà giù dal precipissi dai sò giùdes^[3]: a sarìa pa capitaje s’a l’avèisso scotà mie paròle dosse! ⁷Parèj coma la slòira a s-ciapa la tèra, j’òss dij pecator a resteran dësparpajà ‘dnans ëd la pòrta dl’anfern^[4]. ⁸Për lòn ch’am riguarda, ij mè euj a resto fiss a ti, Signor. Press ëd ti i treuvo mia sosta, guern-me dal perìcol. ⁹Guern-me dai truch ch’a vorìo feme e dai trabucèt che ij malfator a l’han ëstërmà an sël senté andoa ch’i marcio. ¹⁰Ch’a sio ij pecator midem a esse ciapà da la rèj ch’a l’han dëstèisa për mi.

Nòte

↑ Cfr. Arvelassion 5:8.
↑ Dë ‘dnans al tribunal ëd Nosgnor.
↑ O “cap”. La strutura original dë sto vers a l’é bin complicà da comprende. Vàire version bìbliche a l’han daje d’antërpretassion diferente.
↑ O “Sheol”, ël mond dij mòrt.

[1] Cfr. Arvelassion 5:8.

[2] Dë ‘dnans al tribunal ëd Nosgnor.

[3] O “cap”. La strutura original dë sto vers a l’é bin complicà da comprende. Vàire version bìbliche a l’han daje d’antërpretassion diferente.

[4] O “Sheol”, ël mond dij mòrt.

[1]

[2]

[3]

[4]