Salm

140. Nosgnor! Salv-me dai malfasent

Ël salmista a ciama a Nosgnor d’esse liberà dai sò nemis mortaj, a lo sùplica che sò giudissi ‘d condan-a a tomba dzora ‘d soa testa ‘d lor e a fortiss soa fiusa ant la giustissia ‘d Dé. .

¹Al magìster dël còro, un salm ëd David. Nosgnor! Salv-me dai malfasent, guern-me da j’òm violent ²ch’a stan sempe lì a gabolé coma ch’a podrìo fé dël mal e a cissé ‘d guère, ³A l’han na lenga ch’a pica coma cole dle serp, e sota ij sò laver a-i é ‘d tòssi ‘d vipra^[1]. (Antërludi).

⁴Nosgnor! Guern-me da le man dij pecador; ten-me lontan da coj ch’a vorìo antrapeme. ⁵Ëd gent maléfica a l’han ëstërmà ‘d trabucèt për feme tombeje ‘ndrinta; a l’han dëstendù na rèj për ciapeme; a l’han butà ‘d ciapòire pròpi ‘ndova ch’i son sòlit passé. (Antërludi)

⁶Mi i diso a Nosgnor: Ti ’t ses mè Dé. Nosgnor! Fà atension a la vos ëd mìe sùpliche. ⁷Nòsgnor, Ti ch’it ses sovran! Ti, ch’it ses col ch’a l’ha la fòrsa për libereme! It l’has butà në scu dzora ‘d mia testa për guerneme ant ël di dla bataja. ⁸Nosgnor! Acòrdje pa lòn che j’empi at ciamo an preghiera. Përmëttje nen ch’a l’àbio ‘n bon ésit l’ora ch’am ven-o contra a l’atach. ⁹A propòsit dij nemis ch’am ëstan dantorn - che ‘l mal mnassà da soa boca a-j ciapa lor midem. ¹⁰Che ‘d brasa anfiamà a tomba dzora ‘d soa testa. Che lor a sìo campà ant ël feu o an tampe pien-e d’eva, ch’a peulo pa ëscapeie. ¹¹Che ij busiard a foson-o pa an nòst pais.

¹²I lo sai che Nosgnor a giuta coj ch’a son përseguità; chiel a farà giustissia ai pòver. ¹³Ëd sicur ij giust a rendran grassie a tò nòm; coj ch’a son giust e onest a staran an toa presensa.

Nòte

↑ Cfr. Roman 3:13.

[1] Cfr. Roman 3:13.

[1]