La Bibia piemontèisa/Testament Vej/Salm/Salm 33

Da Wikisource.
Jump to navigation Jump to search

Ij Salm[modifiché]

33. Vojàutri, ij giust, aclamé ‘l Signor[modifiché]

An cost inn ël Salmista a làuda Nosgnor coma ‘l Creator ch’a l’é sovran e governa ‘l mond, e ch’a guerna e véndica coj ch’a l’han timor ëd chiel.

1Vojàutri, ij giust, aclamé ‘l Signor; vojàutri j’onest, smonje vòstre làude, ch’a-i na j’è sèmpre ‘n bon motiv[1]. 2Celebré ‘l Signor con la cetra! Canté a chiel compagnà da n’arpa! 3Arnoveje[2] ij vòstri cantich! Alveje vòstre làude con ëd mùsica sonà da bin! 4Përchè la paròla ‘d Nosgnor a l’é certa[3], chiel a resta fedel an tut lòn ch’a fà. 5Nosgnor a ten an àuta considerassion l’equità e la giustissia; la fidelità ‘d Nosgnor as estend për tuta la tera. 6A l’é con soa paròla che Nosgnor a l’ha fàit ij céj, a l’é con sò spirit[4] ch’a l’ha creà le costellassion. 7Coma s’a fussa ant un un botal chiel a-j mugia l’eva dël mar; chiel a buta j’océan an dij serbator. 8Che tuta la tèra a-j renda l’adorassion a Nosgnor; ch’a l’abio timor ëd chiel j’abitant dël mond antregh! 9A l’é stàita pro un-a soa paròla che tut a l’é anandiasse a esiste; a ‘n sò órdin tut a l’é butasse an moviment.

10Nosgnor a dësfà ij pian ëd le nassion e anienta ij progèt dij pòpoj, 11ma ij pian ëd Nosgnor a ten-o bon; chiel a manten për sèmper ij propòsit ëd sò cheur. 12Che ‘d boneur ch’a l’ha cola nassion ch’a l’ha Nosgnor coma sò Dé, col pòpol che chiel a l’ha sernù coma soa ardità!

13Nosgnor a bèica dal cél, a osserva un për un tuti j’òm. 14Dal leugh anté ch’a sta, chiel a ved bin coj ch’a pòpolo la tèra. 15A l’é chiel ch’a l’ha formà ‘l cheur uman e ch’a guarda da bin tute j’assion ëd lor.

16A l’é pa na grand’armeja ch’a peul salvé ‘l rè, nì na gran fòrsa lòn ch’a peul salvé ‘l guerié vajant. 17A l’é pa ‘l nùmer dij cavaj ch’a peul fé vaniene na vitòria; malgré soa gran fòrsa, a peul nen salvé.

18J’euj ëd Nosgnor a vijo coj ch’a-j son fedej, coj ch’a spero ant l’amor ch’a l’ha për lor. 10A-j riscata da la mòrt e a-j sostniss ant ël temp ëd la famin-a.

20Nòstra ànima as arlegra ‘d Nosgnor: chiel a l’é nòst liberator e scu. 21Nòst cheur a ‘rgiojiss ëd chiel; sò nom sant an dà fiusa. 22Nosgnor! Che tò amor an chita mai: costa-sì e la speransa ch’i butoma an ti.

Nòte[modifiché]

  1. O “ch’a conven”.
  2. O “canteje na canson neuva”. A l’é nen tant ëd canteje ‘d canson ch’a sìo neuve, ma “a-i é sèmper d’ocasion neuve për canté a chiel”.
  3. O “giusta”.
  4. O “con ël fià ‘d soa boca”.