La Bibia piemontèisa/Testament Neuv/Maté/Maté 24

←Maté 23

La Bibia piemontèisa Maté

Maté 25→

La Bìbia piemontèisa - Matè 24

Maté

24

La dëstrussion dël Templi

¹Antant che Gesù a sortìa da le cort dël Templi, ij sò dissépoj a son avzinasse a chiel per feje beiché le fabriche dël Templi. ²E Gesù a-j dis: "Vëddeve tute ste còse? Iv diso la vrità, ch'a-i sarà lassà 'mbelessì gnanca na pera ch'a sia nen tirà giù".

Ij segn ëd la fin dël mond

³Antant ch'a stava setà an sla colin-a dj'uliv, ij sò dissépoj a son ëvnù da chiel an privà e a l'han dije: "Dis-ne 'n pòch, cand ch'a l'é che còste còse a rivëran e coma sarà 'l segn ëd toa vnùa e dla fin dël mond?". ⁴Gesù a-j rispond: "Pijé guarda d'esse nen angabiolà da gnun, ⁵përchè a saran tanti coj ch'a vniran a mè nòm e ch'a diran: "Ël Crist a l’é mi!’", e a dëstravieran pì d'un. ⁶I sentëreve parlé 'd guère e vos ëd guère, ma pijé guarda d'esse nen sbaruvà da lolì, përché a venta che ste còse a rivo, ma a sarà ancora nen la fin. ⁷Na nassion as levërà contra n'àutra nassion, e 'n regn contra n'àutr regn; e a-i sarà 'd famin-a e 'd taramòt an vàire leugh. ⁸Tut sòn a sarà mach coma ‘l prinsìpi dij dolor ëd na pajolanta ch’a l’ha da partorì.

La përsecussion dij dissépoj

⁹Antlora i sareve consignà a j'autorità^[1] për esse suplissià e massà. Tute le nassion av v'avran an òdio an càusa 'd mè nòm^[2]. ¹⁰A saran tanti coj che arneghëran la fede^[3], a tradiran la fradlansa e as detestëran l'un l'àutr. ¹¹A seurtiran fòra tanti fàuss profèta ch'a 'ngabiolaran motobin ëd gent ¹²e, tant a sarà spantiasse le schergne e la violassion dla Lege 'd Nosgnor^[4] che tanti a savran pì nen lòn ch'a l'é 'l bin^[5]. ¹³Chi, nopà, a l'avrà tenù dur^[6] fin-a a la fin a sarà salvà^[7]. ¹⁴E cost Evangeli^[8] dël regn a sarà nunsià^[9] an tut ël mond^[10] da part a part, për esse 'd testimoniansa dë 'dnans a tute le nassion. A sarà an col temp-là ch’a vnirà la fin.

Ël pì grand sacrilegi ch'as podrìa imaginesse

¹⁵A vnirà 'l temp ch'i vëdreve lòn che 'l profeta Daniel a l'avìa parlane^[11], visadì 'l pì grand sacrilegi ch'as podrìa imaginesse^[12] fàit ant ël Leugh sant e ch'a càusa soa dëssacrassion^[13] - col ch'a les ch'a-i fasa bin atension - ¹⁶antlora coj ch'a saran ant la Giudea ch'as na filo vìa an sle montagne. ¹⁷Col ch'a sarà ansima 'd soa cà^[14] ch'a cala pì nen giù antëcà për ciapene cheicòsa; ¹⁸e col ch'a l'é ant ij camp ch'a torna pì nen andaré për ciapé soe vestimente^[15]. ¹⁹An coj dì-là, maleur a le fomne ch'a speto^[16] o 'd cole ch'a l'avran ëd masnà ch'a ciucio 'l làit. ²⁰Preghé che 'l temp dë scapé via a riva nen d'invern o 'd saba, ²¹përchè 'ntlora a-i sarà na tribulassion tan’ granda ch'a l’é mai stàine un-a parija dal prinsipi dël mond fin-a adess e gnanca a na sarà pì n'àutra parèj^[17]. ²²E se coj dì-lì a fusso nen stàit ëscursà, gnun a podria salvesse, ma për càusa dij sernù coj dì-lì a saran ëscursà.

²³Antlora se cheidun av dis: "Varda, ël Crist a l'é 'mbelessì!" o "A l'é ambelelà!", chërdje nen, ²⁴përché a seurtran fòra 'd fàuss Crist e 'd fàuss profeta ch'a faran ëd grand portent e miracoj tant da dëstradé fin-a ij sernù, s'a fussa possìbil. ²⁵Fé bin atension^[18], i l'hai divlo a l’avans. ²⁶Antlora, se cheidun av dis: "Varda, a l'é ant ël desert!", seurte nen a vëdde s’a l’é vera; o "A l'é stërmasse antëcà!^[19]" chërdje nen. ²⁷Përché tanme la lòsna a seurt da l'alvant e as ved fin-a al ponent, a sarà l'istèss dla vnùa dël Fieul ëd l'òm^[20], ²⁸përché 'nté ch'a saran ij cadàver, là as assambleran ij voltor^[21].

La vnùa dël Fieul ëd l'Òm

²⁹Sùbit apress la tribulassion ëd coj dì-lì ël sol a sarà scurì e la lun-a a darà pì nen sò lusor, le stèile a tomberan dal cel e le potense del cel a saran socrolà^[22]. ³⁰Antlora 'l segn dël Fieul ëd l'òm a comparirà ant ël cel e tute le tribù dla tèra as batran ël pét dal regret. A vëdran ël Fieul ëd l'òm ch'a ven an sle nivole dël cel con gran' potensa e glòria^[23]. ³¹Chiel a mandërà ij sò àngej, che con un gran' son ëd tromba a assambleran ij sò sernù da tuta la tèra^[24] e da n'estremità dël cel a l'àutra.

Ël paragon dël fié

³²Amprende lòn ch'a veul dì sto paragon pijà dal fié: cand ij sò branch a ven-o tënner e ch'a sorto soe feuje, i seve che l'istà a l'é davzin-a. ³³Dë l'istèssa manera, cand ch'i vëdreve tute ste còse, i savreve che 'l Fieul ëd l'òm a l'é davzin, ch'a l'é a la pòrta. ³⁴ Iv diso la vrità: sta generassion-sì a passerà nen che tute ste còse a sio rivà. ³⁵Ël cel e la tèra a passeran, ma mie paròle a passeran nen.

Sie pront

³⁶Për lòn ch'a riguarda col dì-lì e a che ora, a-i é gnun ch'a lo sàpia, gnanca j'àngej dël cel. A lo sa mach Dé ël Pare. ³⁷Ma coma ch' a l'era dël temp ëd Noè^[25], a n'a sarà l'istèss cand ël Fiel ëd l'òm a vnirà. ³⁸Përchè com' ai temp prima dël diluvi j'òm a mangiavo e a bevìo, as maridavo e a dasìo ij sò fieuj an mariagi, fin-a al dì che Noè a l'é intrà ant l'Arca, ³⁹e a l'han nen vorsù savèine che 'l diluvi a sarìa vnù ma a l'ha tuti portaje vìa, a n'a sarà l'istèss dla vnùa dël Fieul ëd l'òm^[26]. ⁴⁰Antlora a-i saran doi òm ant un camp: un a sarà pijà e l'àutr lassà. ⁴¹Doi fomne a mulinëran al mulin: un-a a sarà pijà e l'àutra lassà. ⁴²Vijé, donca, përchè i seve nen a che ora Nosgnor a vnirà^[27]. ⁴³I l'eve da savèj che se 'l padron ëd na ca a savèissa a che ora dla neuit ël làder a vnirà, a vijarìa e a lasserìa nen che soa ròba a fussa portà vìa. ⁴⁴A l'é për lòn che 'dcò vojàutri a venta ch'iv ten-e pront, përchè 'l Fieul ëd l'òm a vnirà a l'ora ch'i-j pense nen^[28].

Ël servitor fidel e giudissios

⁴⁵Col ch’a sarà donca 'l servitor fidel e giudissios, che sò padron a l'ha stabililo an su tuti j'àutri servitor e ch'a-j dà da mangé cand ch'a l'é ora? ⁴⁶A l'é beà col servitor che sò padron, cand ch'a riva, a troverà ch'a fà parèj. ⁴⁷Iv diso la vrità: sò padron a-j darà l'aministrasion ëd tùit ij sò beni. ⁴⁸Se col-lì, nopà, a l'é 'n servitor plandron ch'a disa dëspërchiel: "Mé padron a tarda 'd rivé", ⁴⁹e ch'as buta a bate ij sò compagn ëd servissi e a smangiassé e sbeivassé con j'ambriacon, ⁵⁰ël padron ëd col servitor a vnìra cand ch' a lo speta nen e a l'ora ch'a sa nen, ⁵¹e a lo dësmembrà^[29] e a sarà butà an tra j'ipòcrita anté ch'a pioreran e argrigneran ij dent!

Nòte

1. O "consegnà a j'autorità", "arestà".
2. Cfr. Matè 10:22.
3. O "a comëtran apostasìa", o "a saran mnà a comëtte pecà".
4. Let. "l'anomìa".
5. O "l'amor", o "l'amor a vnirà sèmper pì frèid".
6. O "përseverà", "chi a sarà stàit përsistent" ant la fej.
7. Cfr. Maté 10:22.
8. O "bon-a neuva".
9. O "predicà"
10. O "tèra abità".
11. Cfr. Daniel 9:27; 11:31; 12:11.
12. Conforma la tradission sossì as ciama: "Abominassion dla desolassion", la pì granda porcaria ch'as podèissa fé ant un leugh sant.
13. O "completa ruin-a", arzultà dla pì granda schergna, na porcarìa.
14. An sla trassa dël tèit.
15. O "sò mantel". 24:17-18 cfr. Luca 17:31.
16. O "ampedìe".
17. Cfr. Daniel 12:1; Arvelassion 7:14.
18. O "Vardé".
19. O "A l'é ant ël pòst pì stërmà dla cà".
20. 24:26-27 cfr. Luca 17:23-24.
21. Cfr. Luca 17:37.
22. Cfr. Isaìa 13:10; Gioele 2:10,31; 3:15; Arvelassion 6:12; Isaia 34:4; Arvelassion 6:13.
23. Cfr. Daniel 7:13; Arvelassion 1:7.
24. Let. "Dai quatr vent".
25. Cfr. Génesi 6:5-8.
26. Cfr. Génesi 7:6-24.
27. O "a l'ha da vnì".
28. 24:43-44 cfr. Luca 12:39-40.
29. O "a lo farà a tòch".