La Bibia piemontèisa/Testament Neuv/Maté/Maté 4

←Maté 3

La Bibia piemontèisa Maté

Maté 5→

4

La Bìbia piemontèisa -Mate 04

Le tentassion ëd Gesù

¹An col temp-là Gesù a l’è stàit ëmnà 'nt ël desert da lë Spirit për essie tentà dal diav^[1]. ²Apress ch’a l’era stàit giun për quaranta di e quaranta neuit, a l’ha comensà a d'avej fam^[2]. ³Anlora a l'é vzinasse ‘l tentator ch’a l’ha dije: ‘Se ti 't ses ël Fieul ëd Dé, comanda che ste pere-sì a dvento 'd pan!”. ⁴Ma Gesù a l’ha replicaje: “A l’é scrit: ‘L’òm a vivrà nen mach ëd pan, ma 'd minca paròla ch’a seurt ëd la boca ‘d Nosgnor^[3]!’. ⁵Anlora ‘l diav a l’ha portalo ant la sità santa e a l’ha butalo an sla part la pì àuta dël templi. ⁶E a l’ha dije: ‘Se ti ‘t ses ël fieul ëd Dé, campte giù, përché a l’é scrit: ‘Chiel a comandrà ai sò àngel ëd portete an soe man^[4] tan che ij tò pé a bato nen contra na chèich pera^[5]’. ⁷E Gesù a l’ha dije: ‘A l’é 'dcò scrìt: "Ti ‘t butras pa a la preuva Nosgnor tò Dé^[6]". ⁸E torna ‘l diav a l’ha portalo an s' na montagna motobìn àuta e a l’ha mostraje tuti ij regn dël mond e sò grandor.^{[7] 9}E a l’ha dije: ‘Mi it darai tute ste còse-là se mach ti’t camperas giù për tèra^[8] dë 'dnans ëd mi për rendme l’adorassion’. ¹⁰Anlora Gesù a l’ha dije: ‘Vat-ne vìa, Sàtana, përché ch’a l’è scrìt: ‘T’adorëras Nosgnor, tò Dé, e mach a Chiel it rendras toa adorassion^[9]’. ¹¹Anlora ‘l diav a l’ha lassalo an santa pas e a son ëvnù dj’àngej ch'a son ancaminasse a rendje servissi^[10]”.

Prinsipi dla predicassion an Galilea

¹²Cand che Gesù a l’ha savù che Gioann a l’era stàit butà an përzon, a l’é artirasse an Galilea^[11], ¹³ma a l’ha lassà Nasaret e a l’é andass-ne a vive a Cafàrnao^[12], aranda ‘l lagh, ant la region ëd Zabulon e 'd Neftali. ¹⁴Parèj a l’é compisse lòn ch’a l’avìa nunsià ‘l profeta Isaia: ¹⁵“Tèra ‘d Zabulon e 'd Neftali, aranda ‘l lagh, da l’àutra banda dël Giordan, la Galilea dle gent^[13]. ¹⁶Col pòpol, ch’a vivìa 'nt lë scur, a l’ha vëddù ‘n gran’ ciàir; un ciàir a l’ha splendrì për coj ch’a vivo ant ël pais dla mòrt e dël top^[14]”. ¹⁷Da antlora Gesù a l’ha comensà a prediché: “Pentive dij vòstri pëccà^[15] e artorné a Nosgnor, përchè ‘l Regn dël cel a l’é fasse press”.

Ij prim dissépoj

¹⁸Damentre che Gesù a marciava arlongh ël lagh ëd Galilea, a l’ha vëddù doi frej, Simon, col ch’a l’avrìa avù lë stranòm ëd Pero, e sò frel Andrea, ch’a l’ero an camin ëd campé le rèj ant l’eva. A l’ero ‘d pëscador. ¹⁹Gesù a l’ha dije: "Vnime dapress e iv farai pëscador d’òm". ²⁰Anlora lor, tut sùbit, a l’han chità soe rèj e a son andass-je dapress.

²¹Da lì, essend andàit pì anans, Gesù a l’ha vëddù doi d’àutri frej, Giaco, fieul ëd Zebedé, e sò frel Gioann. A j’ero ant na barca con sò pàre ‘d lor, Zebedé, ch’a comodavo le rèj, e a l’ha ciamaje ‘dcò lor. ²²Tut sùbit a l’han chità soa barca e sò pare ‘d lor e a l’han butasse a andeje dapress.

Atività ‘d Gesù

²³Gesù a andasìa për tuta la Galilea, a mostrava ant le sinagòghe, a nunsiava la bon-a neuva dël Regn e a varìa d’ògni sòrt ëd maladìe e d’infermità^[16]. ²⁴Soa arnomansa a së spantiava fin-a për tuta la Sìria. Qualsëssìa ch’a fusso soe maladie o 'nfermità, o s’a l’avìo ‘d possession demonìache, ël mal caduch o ‘d paralisìa - chiel a-j varìa tuti. ²⁵Na gran furfa ‘d pòpol a-j andasìa dapress da la Galilea, da la Decàpoli, da Gerusalem, da la Giudèa, e da l’àutra banda dël Giordan.

Nòte

1. Cfr. Ebreo 2:18; 4:15.
2. o “l’avìa fàit digiun”; o “apress a l’é vnùje fam”, “a l’é pròpi vnùje veuja ‘d mangé”.
3. Cfr. Deuteronòmi 8:3.
4. Cfr. Salm 96:11.
5. o “a s’antrapran nen”. Cfr. Salm 91:12.
6. Cfr. Deuteronòmi 6:16.
7. o “glòria”.
8. o “it butras an ginojon”.
9. Cfr. Deuteronòmi 6:13.
10. o "a l’han ancaminà a serve soe esigense".
11. Cfr. Maté 14:3; March 6:17; Luca 3:19-20.
12. Cfr. Gioann 2:12.
13. O “dij Gentij”, “dij pagan”, anté ch’a vivo tanti ch’a son nen d’Israelita.
14. 4:15-16 cfr. Isaia 9:1-2.
15. Cfr. Maté 3:2.
16. Cfr. Maté 9:35; March 1:39.