La Bibia piemontèisa/Testament Neuv/March/March 1

←Matè 28

La Bibia piemontèisa Evangeli 'd March

March 2→

Evangeli scond March

La Bìbia piemontèisa - March 01

1

La predicassion ëd Gioann Batista

¹Vardé sì coma ch'a l'é anandiasse l'anonsi dl'Evangeli, la bon-a neuva ch'a riguarda Gesù Crist, ël Fieul ëd Dé^[1]. ²Coma ch'a l'é scrit ant ij lìber dij profeta^[2]: "Varda-sì: it mando 'dnans ëd ti mè nunsi: chiel at pronterà la stra^[3]. ³La vos ëd col ch'a crija 'nt ël desert a dis: 'Pronteje la stra a Nosgnor, spianeje ij sò senté'^[4]". ⁴Për lòn Gioann a batesava 'nt ël desert, e a predicava un batésim ëd pentiment për ël përdon^[5] dij pecà . ⁵E tut ël pais ëd la Giudéa e j'abitant ëd Gerusalem a andasìo da chiel, e chiel a-j batesava 'nt ël Giordan, an ëscotand la confession dij sò pecà. ⁶Gioann a l'era vëstì con na pel ëd gamel, e ai fianch a l'avìa na sëntura 'd coram, e as sostentava an mangiand ëd cavalëtte e d'amel servaj^[6]. ⁷Soa predicassion a disìa: "Dapress ëd mi, a-i na ven un ch'a l'é pì potent che mi, un ch'i son gnanca degn ëd basseme për dësgropéje le liasse dle sàndole. ⁸Mi i l'hai batesave con d'eva, ma chiel av bateserà con lë Spìrit Sant".^[7]

Ël batésim ëd Gesù

⁹E giust antlora, Gesù a l'é rivà da Nasarèt, sità 'd Galilea, e a l'é stait batesà da Gioann ant ël Giordan. ¹⁰Antramentre ch'a surtìa fòra d'ant l'eva, Gioann a l'ha vëddù duvertesse 'l cel, e lë Spìrit Sant ch'a vnisìa giù da Gesù coma s'a fussa na colomba. ¹¹E dal cel a l'é 'dcò vnuje na vos ch'a disìa: "Ti 't ses mè Fieul, it im fase pròpi gòj^[8]".

La tentassion ëd Gesù

¹²E tut sùbit lë Spìrit a l'ha possalo^[9] a andé 'nt ël desert. ¹³Ant ël desert Gesù a l'é restà quaranta di, e Satana a lo cimentava con ëd tentassion. A vivìa antrames a 'd bestie sërvaje e j'àngej a lo servìo.

Gesù a comensa sò ministeri an Galilea

¹⁴E dòp che Gioann a l'é stàit butà 'n përzon, Gesù a l'é vnù an Galilea e a nunsiava l'Evangeli dël regn ëd Nosgnor^[10]. ¹⁵A disìa: "Ël temp a l'é compisse e 'l regn ëd Nosgnor a l'é avzinasse: pentive e chërde a l'Evangeli^[11]".

Gesù a ciama quatr pëscador

¹⁶Ant ël mentre ch'a marciava^[12] davzin al lagh ëd Galilea, Gesù a vëdd Simon e Andrea sò frel ch'a campavo soe rèit ant ël mar, përchè ch'a l'ero 'd pëscador. ¹⁷E Gesù a-j dis: "Vnime dapress, e iv farai dventé pëscador ëd gent!", ¹⁸e avenda sùbit lassà soe rèit, lor a-j son andaje dapress. ¹⁹Peui an passand da lì 'n pòch pì anans, Gesù a vëd Giaco, ël fieul ëd Zebedé e Gioann, sò frel, ch'a taconavo soe rèit ant la barca. ²⁰E sùbit a l'ha ciamaje, e lor, an chitand sò pare Zebedé 'nt la barca con ij sò ovrié, a son andaje dapress.

N'òm con në spirit salòp

²¹Peui a son intrà a Cafàrnao, e sùbit dòp - a l'era un dì 'd Saba - intrà ch'a l'era 'nt la sinagòga, Gesù a dotrinava^{[13] 22}E tuti as na maravijavo ëd soa dotrin-a, përchè a-j mostrava con granda competensa^[14], e nen parèj dij magister ëd la Lege^[15]. ²³Ora, as trovava là, ant la sinagòga, n'òm tormentà da^[16] në spirit salòp^[17] ch'a l'e butasse a crijé, ²⁴disend: "Ha! Còsa a-i é-lo an tra ti e nojàutri, Gesù 'd Nasarèt? Ses-to vnù për dësblé lòn ch'i foma nojàutri? I lo savoma bin chi ti't ses. Ti 't ses ël sant ëd Dé". ²⁵Ma Gesù a l'ha arbufalo fòrt e a l'ha dije: "Stà ciuto e seurt fòra da col òm!". ²⁶Anlora lë spirit danà, tormentand-lo e crijand a tute fòrse, a l'é surtì fòra da col òm-là. ²⁷Tuti a na son restà sbërlondì, ëd manera che as domandavo an tra 'd lor: "Còs'è-la sta ròba-sì? Che dotrin-a neuva a l'é mai costa? Col-lì a comanda con autorità e fin-a dë spirit danà a j'ubidisso!". ²⁸E soa reputassion a l'é spantiasse 'd colp ant ij paìs tut dantorn ëd la Galilea.

Gesù a variss vàire

²⁹E sùbit apress, an essend surtì da la sinagòga, a son andàit con Giaco e Gioann ant la ca 'd Simon e Andrea. ³⁰E la madòna 'd Simon a l'era là cogià, malavia con la frev, e sùbit a l'han parlaje 'd chila. ³¹E Gesù, avzinandse a chila, a l'ha pijala për man, fasend-la aussé. La frev a l'é passaje 'd colp e a l'é butasse a servije. ³²Rivà ch'a l'era la sèira, al calé dël sol, a l'han ëmnaje tùit ij malavi e j'andiavlà. ³³E tuta la gent ëd cola borgià^[18] a l'era radunasse dë 'dnans a la pòrta. ³⁴E a l'ha varì motobin ëd malavi ch'a l'avio 'd maladìe diverse e a l'ha scassà vàire demòni da coj ch’a n’ero possedù. A l'ha pa lassà che ij dèmoni a disèisso ch’a lo conossìo.

Gesù a part për un gir ëd predicassion

³⁵Peui, a la matin bonora, mentre ch'a l'era ancora neuit sombra, levà ch'a l'era, Gesù a l'é surtì, a l'é andàit ënt un leugh desert e ambelelì a pregava. ³⁶Simon, e coj ch'a-i ero con chiel, a son andait a sërchelo. ³⁷Cand ch'a l'han trovalo, a l'han dije: "Tuti at serco". ³⁸E chiel a l'ha dije: "Andoma 'nt le borgià davzin-e për ch'i l'hai da prediché ‘dcò ambelelà: a l'é bin për lòn ch’i son ëvnùit". ³⁹Donca Gesù a predicava 'nt le sinagòghe ëd tuta la Galilea e a scassava ij demòni^[19].

Gesù a purìfica 'n lebros

⁴⁰E un lebros a l'é vnù da chiel e, an pregand-lo, a l'é butasse an ginojon dë 'dnans ëd chiel, e a l'ha dije: "S'it veule, ti 't podrìe bin netieme da sta maladìa ch'i l'hai". ⁴¹E Gesù, pien ëd compassion, a l'ha dëstendù la man e a l'ha tocalo disendje: "I lo veui, sie net!". ⁴²E mentre ch'a l'ha dit lòn, la lebra a l'é sparìa da col òm e a l'é restane net. ⁴³Peui, avend-lo amonì sever, Gesù a l'ha sùbit daje 'l congé ⁴⁴e a l'ha dije: "Im arcomando: conta a gnun ëd lòn ch'a l'é capitate, ma va pitòst a mostrete al sacerdòt e presenta për toa purificassion lòn che Mosè a l'ha comandà 'd fé an costi cas-sì, perchè ch'a-j serva 'd testimoniansa^[20]. ⁴⁵Ma chiel, partì ch'a l'era Gesù, a l'ha comensà sùbit a conté a tuti lòn ch' a l'era capitaje, ëd manera che Gesù a podìa squasi pi nen intré al ciàir ant la sità, ma as na tnisìa fòra, an dij leugh desert, e da tute le part a vnisìo da chiel.

Nòte

1. Lét. "Prinsipi dl'evangeli ëd Gesù Crist, Fieul ëd Dé"
2. o: "Second ch'a l'ha scrìt ël profeta Isaia".
3. Cfr. Malachìa 3:1.
4. Cfr. Isaìa 40:3
5. o: Remission.
6. Cfr. 2 Re 1:8.
7. O "për nòstra dëstrussion".
8. Cfr. Génesi 22:2; Salm 2:7; Isaia 42:1; Matè 3:17; 12:18; March 9:7; Luca 3:22.
9. Gesù a l’ha sentì na pulsion interior cissà da lë Spirit Sant a andé ant ël desert. 
10. Nosgnor Dé a l'é na forma pì sostnùa che Dio.
11. Cfr. Matè 3:2.
12. Conforma al Brero, rèit a l'é feminin; "marcé" ambelessì a smija mej che "caminé" (che an piemontèis a veul dì "marcé an pressa").
13. o: "a mostrava", "a fasìa scòla".
14. O "con grand'autorità".
15. Cfr. Matè 7:28-29.
16. O "ch'a l'avìa"
17. "Spirit salòp" a l'è la tradussion la pì a la létera dl'original. La tradussion dël 1834 a buta: "spirit danà" o "spirit ëndiavlà" (3:11), e 'dcò "ëmpossessà" (3:15). As poudrìa ëdcò dì: "spirit diabòlich", o "anvasà".
18. O "tuta la sità".
19. Cfr. Matè 4:23; 9:35.
20. Cfr. Levitich 14:1-32.