La Bibia piemontèisa/Testament Neuv/Maté/Maté 3

←Maté 2

La Bibia piemontèisa Maté

Maté 4→

La Bìbia piemontèisa - Mate 03

3

Predicassion ëd Gioann Batìsta

¹Ore, an col temp-là a l’è vnùje 'nt ël desert ëd la Giudèa Gioann Batista e a l’ha comensà a prediché. ²Sò mëssagi a l’era: “Pentive dij vòsti pëccà, përchè ‘l Regn dij cej a s’é fasse press”^[1] , ³Ëd Gioann a parlava ‘l profeta Isaia, cand ch’a disìa: “A l’é la vos d’un ch’a crija ant ël desert: ‘Pronté la strà ‘d Nosgnor, spiané ij sò vieuj^[2]’”.

⁴Gioann a l’era vēstì con na vestimenta antërsùa ëd pèil grossé ‘d gamel e na sëntura ‘d coram d'antorn ai fianch^[3]. Sò mangé a l’era ‘d cravëtte e d’amel sarvaj. ⁵A 'ndasìo a trovelo ‘d gent ëd Gerusalem, da tuta la Giudèa e da tuta la region dël Giordan; ⁶a-j confessavo ij sò pëccà e as fasìo batesé da chiel ant ël fium Giordan.

⁷Ma cand ch’a vëddìa vàire dij Farisé e dij Saducé ch’a vnisìo ‘dcò lor a fesse batesé, Gioann a l’ha dije: “Rassa ‘d vipre ch’i seve^[4]! Chi ch'a l'é ch’a l’ha avisave dë schivié^[5] ël giudissi^[6] ch’a l’é press a rivé? ⁸Dimostré, donca, con lòn ch’i feve ch'i seve pentì përdabon dij vòstri pëccà^[7]. ⁹A l’é nen pro ch’i dise l’un a j’àutri: ‘I l’oma Abraham për pare^[8]’, përchè iv diso che Nosgnor a podrìa fé seurte^[9] magara da ste pere-sì 'd fieuj d’Abraham. ¹⁰Ora l’àpia a l’é già butà a la rèis ëd j’erbo, ëd manera che minca n’erbo ch’a fà nen ëd bon frut a và a esse tajà e campà ant ël feu^[10]. ¹¹Për mi, iv bateso d’eva an segn ëd pentiment; ma col ch’a ven apress ëd mi a val pì^[11] che mi, mi ch' i son gnanca degn ëd porteje soe sàndole: a sarà col-là ch’av batësrà dlë Spirit Sant e dël feu. ¹²A l’ha sò val an man e a farà soa àira neta ‘d pianta, e a ambaronrà sò forment ant ël grané, ma a farà brusé la paja al feu ch’as dëstissa mai pì.

Batesim ëd Gesù

¹³Antlora a l’è vnuje Gesù da la Galilea al Giordan, vers Gioann, për esse batesà da chiel. ¹⁴Ma Gioann as parava fòrt an disandije: “A l’é mi ch’i l’hai da manca d’esse batesà da ti, e ti ‘t ven-e da mi?”. ¹⁵E Gesù, rëspondendje, a l’ha dije: “Lassa fé për adess; përchè parèj i l’oma da compì tut lòn ch’a veul Nosgnor^[12]”, e anlora Gioann a l’ha lassajlo fé. ¹⁶E cand che Gesù a l’é stàit batesà e a l’é sùbit surtì da ‘nt l’eva, ël cél a l’é duvertasse e chiel a l’ha vëddù lë Spirit ëd Nosgnor ch’a calava giù tanme na colomba ch’a l’era vnuje a còl. ¹⁷E na vos a l’ha dije dal cél: “Sto-sì a l’é mè Fieul ch'i-j veuj tanta bin: a l’é ‘d chiel ch’i son compiasume^[13]".

Nòte

1. O “davzin”, “a la portà ‘d man”. Cfr. Maté 4:17; March 1:15.
2. Cfr. Isaia 40:3.
3. Cfr. 2 Re 1:8.
4. Cfr. Maté 12:34; 23:33.
5. O "scapé".
6. O “l’ira” (‘d Nosgnor).
7. O “Fé donca d’euvre ch’a vado d’acòrdi con ël pentiment”.
8. Cfr. Gioann 8:33.
9. O “nasse”.
10. Cfr. Maté 7:19.
11. O “a l’é pì fòrt”.
12. O “minca giustissia”.
13. Cfr. Génesi 22:2; Salm 2:7; Isaia 42:1; Maté 12:18; 17:5; March 1:11; Luca 9:35.