La Bibia piemontèisa/Testament Neuv/Maté/Maté 28

←Matè 27

La Bibia piemontèisa Evangeli 'd Maté

March 1→

La Bìbia piemontèisa - Matè 28

Maté

28

L'arsurression

¹Ora, la sèira dël saba, a l’ambrun matiné dël prim dì dla sman-a, Marìa Madlen-a e l’àutra Marìa, a son vënue a vëdde la tomba anté ch'a l'era stàit butà 'l còrp ëd Gesù. ²E tut sùbit a l’é fasse ‘n grand taramòt, përché n’àngel ëd Nosgnor a l’é calà giu dal cel, a l’é vënù, a l’ha fàit robaté la pera ch’a sarava l’intrada dla tomba e a l’é setass-ne ansima. ³Soa facia a l‘era tanme ‘l ciàir ëd na lòsna e soa vestimenta a l’era bianca tanme la fiòca. ⁴Le guardie a son tant ësburdisse ch’a son restà coma mòrte. ⁵L’àngel, nopà, a l’ha dije a le fomne: “Avèj nen tëmma: i sai ch’i sercheve Gesù, ch’a l’é stàit butà ‘n cros. ⁶A l’é nen ambelessì, përché a l’é arsussità, com a l’avìa dit. Vnì a vëdde ‘l leugh andoa ch’a l’era stàit cogià. ⁷E andev-ne prest e disje ai sò dissépoj ch’a l’é arsussità dai mòrt. Chiel a l’é ‘n camin a ‘ndé 'dnans a vojàutri an Galilea. I lo vëdreve ansilà. Scoté, i l’hai divlo”. ⁸Ora le fomne a son andass-ne an pressa da la tomba con tëmma e granda gòj, e a son corùe a nunsielo ai Sò dissépoj. ⁹Ma coma ch’as n’andasìo për nunsielo ai Sò dissépoj, Gesù a l’é presentasse dë 'dnans a loràutre e a l’ha dije: “Salve^[1]!”. E a son avzinasse, a l’han basaje ij pé e a l’han adoralo. ¹⁰Anlora Gesù a l’ha dije: “Avèj nen tëmma, andé e dije ai mè frej d’andé an Galilea, e ch’am vëdran ansilà.

Ël rapòrt ëd le guardie

¹¹Ora, cand ch’a l’ero ‘n camin d’andé, cheidun ëd dla guardia a l’é vnù ant la sità e a l’ha fàit savèj ai cap dij sacerdòt tut lon ch’a l’era rivaje. ¹²Su lòn ij sacerdòt a son radunasse con j’ansian, e apress na consulta, a l’han dàit na gran soma d’arzan ai soldà ¹³e a l’han dije: “Dì parèj: ‘Ij sò dissépoj a son ëvnù ‘d neuit e a l’han robà sò còrp antramentre che nojàutri i dormìo ¹⁴E se ‘l governator a ven a sentine parlé, i lo përsuadroma e iv butroma fòra dij pastìss”. ¹⁵Anlora ij soldà a l’han pijà ij dané e a l’han fàit coma ch’a l’avìo mostraje. E sta stòria a continua d’esse contà antrames dij Giudé fin-a al dì d‘ancheuj.

La Comission granda

¹⁶Anlora j’undes dissépoj a son andass-ne an Galilea, an sù la montagna andoa che Gesù a l’avìa comandaje ‘d portesse^[2]. ¹⁷Cand ch’a l’han vëddulo, a l’han a adoralo, ma cheidun ëd lor a l'avìa 'd dubi. ¹⁸E Gesù, avzinandse, a l’ha dije: “Tut ël podèj a l'é stame dàit^[3] an cel e an sla tèra. ¹⁹Andé, donch, e fé dissépoj ëd tute le nassion^[4], bateseje ant ël Nòm dël Pare, e dël Fieul e dlë Spìrit Sant , ²⁰e mostreje a scoté tut lòn ch’ i l’hai comandave. E arcordeve^[5] ch’i son sèmper con vojàutri fin-a ‘l compiment dij temp^[6]”.

Nòte

1. O “Iv saluto”.
2. Cfr. Matè 26:32; March 14:28.
3. O “autorità”.
4. Cfr. At 1:8.
5. O “Vardé”.
6. O “dël mond” o “dl’età”.