La Bibia piemontèisa/Testament Vej/Deuteronomi/Deuteronomi 8

←Deuteronomi 7

La Bibia piemontèisa Deuteronòmi

Deuteronòmi 9→

Deuteronòmi

La Bìbia piemontèisa - Deuteronòmi 08

8

Ël but ëd la marcia d’Israel ant ël desert

¹Tùit ij comandament che mi ancheuj i l’hai dave, procureve d’osserveje përch’i peude vive, dventé 'd bon nùmer e intré an possess dël pais che Nosgnor a l’ha giurà ‘d deje ai vòstri antich. ²Arcòrd-te ‘d tut ël camin che ‘l Signor tò Dé a l’ha fate fé ant ësti quarant’ agn ant ël desert, për fete dventé ùmil e për butete a la preuva; për conòsse j’inclinassion ëd tò cheur e vëdde s’it t’avrìe osservà o meno ij sò comandament. ³Donca, chiel a l’ha umiliate, a l’ha fate avèj fam, ma dòp a l’ha date da mangé la mana, che nì ti nì ij tò antich, i savie pa lòn ch’a l’era. A vorìa fete arconòsse che l’òm a viv nen mach ëd pan, ma ‘d tut lòn ch’a seurt da la boca ‘d Nosgnor^[1]. ⁴Ij tò vestì a son pa vnì frust, nì ij tò pé a son anflasse 'nt ësti quarant’ agn. ⁵Arconòss, donch, an tò cheur, che ‘l Signor, tò Dé, at sogeta a na dissiplin-a l’istess che ‘n pare a dissiplin-a sò fieul. ⁶Parèj, it l’has da guerné ij comandament dël Signor tò Dé, da marcé ant ij senté che chiel at mostra e rispetelo^[2].

Le tentassion ëd la tèra dla promëssa

⁷Ël Signor, tò Dé, at men-a ant un pais dru, un pais d’arian e ‘d sorgiss, anté che d’aque dal përfond ëd la tèra a seurto fòra për le combe e le montagne; ⁸na tèra 'd formënt e d'òrdi, e ‘d vigne, fié e pomgranà; un pais d'olivé che a fan d'euli e un pais d'amel; ⁹un pais andova ti 't mangeras pa ‘d pan rassionà e at mancherà gnente; un pais anté ch’a-i é pera ‘d fer, e che da soe montagne 't tireras fòra l'aram. ¹⁰Ti 't mangeras e 't saras arpatà, e 't benediras ël Signor tò Dé, an cost bel pais ch'a l'ha donate.

¹¹Anlora, pijte varda 'd dësmentié 'l Signor tò Dé, an guernand pa ij sò comandament, soe prescrission e soe lege che d'ancheuj it dago. ¹²It mangeras fin-a a ess-ne arpatà, it fabricheras ëd cà confortèivole e it-i staras; ¹³as moltiplicheran ij tò strop ëd vache e ‘d feje; it ambaroneras d’argent e d’òr; it moltiplicheras tùit ij tò beni. ¹⁴Vard-te anlora che tò cheur as ansuperbissa pa e ch’as dësmentia nen dël Signor, tò Dé, ch’a l’ha fate seurte dal pais d’Egit, la tèra anté ch’it j’ere në s-ciav. ¹⁵Chiel a l’ha mnate për ësto desert grand e afros, anfestà ‘d serp velenose e dë scorpion; an ësta tèra sùita e sens’ eva, a l’ha fàit ësghicé d’eva dai ròch pì dur; ¹⁶an ësto medésim desert chiel a l’ha date da mangé la mana, che ij tò antich a conossìo pa. A l’ha fate passé d’aflission e a l’ha butate a la preuva përchè, a la fin, a vorìa fete dël bin^[3]! ¹⁷Anlora, quand ch’it l’avràs otnù tuta costa abondansa, pensa nen drinta ‘d ti che tut lolì ti 't l'avrìe vagnalo con toa fòrsa e pr’ ël vigor ëd toe man.

¹⁸Ten bin da ment ch’a l’é ‘l Signor, tò Dé, col ch’a l’avrà date la fòrsa necessària për otnì costi beni, an guernand parèj l’angage ëd l’aleansa che chiel a l’ha stabilì, con giurament, con ij tò antich, pròpi com ancheuj as compiss. ¹⁹Tutun, s’it të dësmentie dël Signor, tò Dé, s’it vas dapress a d’àutri dio, s’it-j rende l’adorassion, ancheuj i testimònio contra ‘d vojàutri ch’i andreve a meuire. ²⁰S’it ubidisse nen al Signor, vòst Dé, i dësparireve l’istess che le nassion che’l Signor a l’ha faje dësparì dë 'dnans a voi.

Nòte

1. Cfr. Maté 4:4; Luca 4:4.
2. O “avèj timor ëd chiel”.
3. 8:11-16 cfr. Osèa 13:5-6.