La Bibia piemontèisa/Testament Neuv/Arvelassion/Arvelassion 8

←Arvelassion 7

La Bibia piemontèisa Arvelassion

Arvelassion 9→

Arvelassion ëd Gioann

La Bìbia piemontèisa - Arvelassion 08

8

L’Agnel a s-ciapa ‘l cacét ch’a fà set

¹Cand che l’Agnel a l’ha s-ciapà ‘l cacét ch’a fà set an sël ròtol, a l’é fasse an cel un silensi scasi ‘d mes’ ora. ²I l’hai vëddù ij set àngej ch’a stan dë 'dnans a Nosgnor, e a l’han daje set trombe.

³Anlora a l’é vnuje n’àutr àngel con an man un turìbol d’òr e ch’a l’é fërmasse dë 'dnans a l’autar^[1]. A l’han daje d’ancens a pien-e man përchè a lo smonèissa, con le preghiere ‘d tut ël pòpol sant an sl’autar d’òr^[2] ch’a-i é dë 'dnans al tròno. ⁴E ‘l fum dl’ancens, ansema a le preghiere dël pòpol sant, a l’é montà fin-a a la presensa ‘d Nosgnor. ⁵Peui l’àngel a l’ha pijà ‘l turìbol e a l’ha ampinilo ‘d feu da l’autar, e a l’ha campalo an sla tèra^[3]. Antlora a l’é vnuje ‘d tron, e ‘d vos, e ‘d lòsne, e ‘n gran taramòt^[4]. ⁶A l’é parèj che ij set àngej con le set trombe a son prontasse a soné ij sò potent arson.

Le prime quat trombe

⁷Ël prim àngel a l’ha sonà soa tromba e a l’é fasse na tempesta e d’ feu mes-cià con ëd sangh^[5], e lolì a l’é stàit campà giù an sla tèra. La tersa part ëd la tèra, la tersa part ëd j’erbo e tuta l’erba vërda a l’é stàita brusà.

⁸Peui, lë scond àngel a l’ha sonà soa tromba, e scasi na gran montagna anviscà ‘d feu a l’é stàita campà ant ël mar, e la tersa part dël mar a l’é restà ‘d sangh. ⁹E la tersa part ëd le creature ch’a vivìo ant ël mar a l’é mòrta; e la tersa part ëd tùit ij bastiment a l’é stàita dëstruvùa.

¹⁰Peui, ël ters àngel a l’ha sonà soa tromba, e a l’é tombaje dal cél na grand’ ëstèila^[6], afoà tanme ‘n flambò, e a l’é tombà ant la tersa part dij fium e dle sorgiss d’eva. ¹¹Ël nòm ëd cola stèila a l’era Absint, e la tersa part dj’eve a l’é dventà 'mèra coma ‘l tòssi, e tanta gent ch’a në beivìa a l’è mòrta^[7].

¹²Peui, ël quart àngel a l’ha sonà soa tromba, e a l’é stàita colpìa la tersa part dël sol, la tersa part ëd la lun-a, e la tersa part ëd le stèile, ëd manera che la tersa part ëd lor a l’é stàita scurìa^[8], e për conseguensa, la tersa part a dasìa nen ëd ciàir al dì, e l’istess a la neuit.

¹³An pien-a vision, i l’hai sentù la vos ëd n’àngel ch’a volava motobin àut ant ël cél e ch’a proclamava a àuta vos: “Maleur, maleur a j’abitant ëd la tèra, për càusa ‘d lòn ch’a va 'ncapité cand che j’ùltim tre àngej a van soné la tromba!”

Nòte

1. Cfr. Amos 9:1.
2. Cfr. Surtìa 30:1-2.
3. Cfr. Levitich 16:12; Esechiel 10:2.
4. Cfr. Surtìa 19:16; Arvelassion 11:1; 16:18.
5. Cfr. Surtìa 9:23-25; Esechiel 38:22.
6. Cfr. Isaia 14:12.
7. Cfr. Geremìa 9:15.
8. Cfr. Isaia 13:10; Esechiel 32:7; Gioel 2:10,31; 3:15.