La Bibia piemontèisa/Testament Neuv/Arvelassion/Arvelassion 19

←Arvelassion 18

La Bibia piemontèisa Arvelassion

Arvelassion 20→

Arvelassion ëd Gioann

La Bìbia piemontèisa - Arvelassion 19

19

¹Dòp dë ste còse i l'hai sentù la vos fòrta 'd na gran furfa 'd gent ch' ant ël cel a proclamavo: "Aleluia! La salvassion, la glòria e 'l podèj a son ëd nòst Dé ²përché ij sò giudissi a son conform a la vrità e a la giustissia. A l'ha condanà la gran meretris ch'a corompìa la tèra con soa prostitussion^[1] e a l'ha fàit arvangia dël sangh ëd ij sò sërvent^[2] che chila a l'avìa vërsà con soe man". ³Peui, na sconda vira, a l'han proclamà^[3]: "Aleluia! Ël fum ch'a ven sù da sò incendi a monta për ij sécoj dij sécoj". ⁴Ij vintequatr ansian e le quat creature vive a son prostërnasse e a l'han adorà Nosgnor, ch'a l'era astà an sël tròno, disand: "Amen! Alleluia!".

⁵Peui a l'é surtije dal tròno na vos ch'a l'ha dit^[4]: "Dé làude a Nosgnor, tuti vojàutri ij sò sërvent; e vojàutri ch'i lo rispeteve^[5], pcit e grand!".

La selebrassion ëd le nòsse dl'Agnel

⁶Peui i l'hai sentù la vos ëd na gran furfa 'd gent, ch'a l'era coma 'l breugg ëd j'onde poderose d'un océan^[6] o 'd n armorosa scàriga 'd tron, ch'a disìo: "Aleluia! Nosgnor Dé Tut-potent a l'é intrà an Sò regn^[7]. ⁷Arlegromse, saotoma 'd gòj e domje glòria përchè a l'è rivà l temp ëd selebré le nòsse dl'Agnel e soa sposa a l'é giumai pronta. ⁸A l'ha arseivù na vesta 'd lin bianch e fin ch'a splendriss, përchè 'l lin a rapresenta j’euvre giuste dij sant. ⁹E a l'ha dime: "Scriv: A l'han arseivù na benedission granda coj ch'a son anvità a la festa 'd nòsse^[8] dl'Agnel!" Peui a l'ha ancora giontà: "Coste-sì a son le paròle ch'a ven-o da Nosgnor Dé e ch'a son conform a vrità".

¹⁰Peui i son campame a tèra dë 'dnans a chiel për adorelo, ma chiel a l'ha dime: "Pijëte varda 'd fé lòn, përché mi i son mach un sërvent parèj 'd ti e parèj dij tò fratej ch'a rendo testimoniansa a Gesù. Rend l'adorassion mach a Nosgnor. L'essensa dla professia a l'é deje a Gesù na testimoniansa ciàira".

Ël Fieul ëd Nosgnor a va 'n guèra

¹¹Peui i l'hai vëddù 'l cel dovert^[9], e vardé-là 'n caval bianch. Col ch'a l'era 'nsima as ciamava Fedel e Sincer, përché ch’a giudica con giustissia^[10] e a l'ha tacà na bataja giusta. ¹²Ij sò euj a l'ero tanme 'd fiame 'd feu^[11] e an sla testa a l'avìa vàire coron-e. A portava scrìt un nòm conossù a gnun d'àutri che chiel. ¹³A l'era vestì 'd na vesta meujà ant ël sangh e a l'é ciamà con ël nòm ëd Paròla 'd Nosgnor. ¹⁴ J'armeje ch'a stan ant ël cel, vestije 'd lin bianch, fin e pur, a lo seguitavo an sù 'd cavaj bianch. ¹⁵Da soa boca a surtìa na spa molà a doi taj fàita për taché le nassion. A -j governerà con na cavija regal ëd fer^[12]. A darà sfògh a l'ira afoà 'd Nosgnor ël Tut-potent, ch'a sarà tanme 'l giuss ch'a seurt da 'n tòrcc^[13]. ¹⁶An sù soa vesta e an sij sò fianch a-i era scrit un nòm: Rè dij rè e Signor dij signor.

¹⁷Peui i l'hai vëddù n'àngel ch'a l'era 'nt ël sol e a l'ha crijà a àuta vos an disand a tùit ij voltor ch'a volo àut ant ël cel: "Vnì e pronteve për ël disné gròss ëd Nosgnor. ¹⁸për mangé la carn ëd ij rè e la carn ëd le tribù, e le carn ëd ij potent, e le carn ëd ij cavaj, e dij cavajé, e le carn ëd tuti, liber e s-ciav, pcit e grand^[14].

¹⁹Peui i l'hai vëddù la bestia e ij rè dla tèra con soe armeje radunà për fé guèra a col ch'a l'era an sël caval, e a soa armada. ²⁰E la bestia a l'é stàita ciapà, e con chila ël profeta fàuss che, an soa presensa, a l'avìa fàit ij segn ch'a l'avìo anganà coj ch'a l'avìo arseivù la marca dla bestia e ch'a l'han adorà soa statua. Tùit e doi a son ëstàit campà viv ant ël lagh ëd feu ch'a brusa 'd sorfo^[15]. ²¹J'àutri a son ëstàit massà da la spa 'd col ch'a l'é an sël caval e ch'a seurt da soa boca; e tùij ij voltor a son gavasse la fam con soe carn.

Nòte

1. O "inmoralità".
2. Cfr. Deuteronòmi 32:43; 2 Re 9:7.
3. Cfr. Isaìa 34:10.
4. Cfr. Salm 115:13.
5. O "ch'i l'eve tëmma 'd Chiel".
6. Cfr. Esechiel 1:24.
7. Cfr. Salm 93:1; 97:1; 99:1.
8. Cfr. Maté 22:2-3.
9. Cfr. Esechiel 1:1.
10. Cfr. Salm 96:13; Isaia 11:4.
11. Cfr. Daniel 10:6.
12. Cfr. Salm 2:9.
13. Cfr. Isaìa 63:3; Gioel 3:13; Arvelassion 14:20.
14. 19:17-18 cfr.Esechiel 39:17-20.
15. Cfr. Arvelassion 13:1-8.