La Bibia piemontèisa/Testament Vej/Salm/Salm 96

Da Wikisource.

Ij Salm[modifiché]

La Bìbia piemontèisa - Salm 096

96. Canté a Nosgnor un càntich neuv![modifiché]

Ël Salmista a 'nvita tùit a laudé Nosgnor, ël sovran Creator dël mond ch'a dësfend e a manda anans ant ël mond la giustissia

1Canté a Nosgnor un càntich neuv! Canté a Nosgnor, tuti vojàutri, j’abitant ëd la tèra! 2Canté a Nosgnor! Laudé sò Nòm! Nunsié tùit ij di la bon-a neuva dla salvëssa! 3Fé conòsse[1] a tute le nassion la glòria 'd lòn che chiel a fà! 4Grand’ a l'é Nosgnor e franch degn d'esse laudà. Sò grandeur terìbil a fà vnì spàlid tùit j'àutri dé, 5përchè ij dé dj'àutre nassion a son ëd gnun valor, ma a l'é stàit Nognor ch’a l’ha fàit ël cel. 6Onor e majestà a j'ëstan dantorn, fòrsa e blëssa a 'mpinìsso sò santuari.

7Nassion dël mond, arconòsse Nosgnor! Arconòsse che Nosgnor a l'é glorios e fòrt! 8Dé a Nosgnor la glòria ch'a mérita! Porté vòstre oferte e vnì an soe cort. 9Adoré Nosgnor an tut sò splendor sant! Che tuta la tèra a tërmola dnans ëd chiel[2]! 10Dì a tute le nassion: "Nosgnor a regna!". Ël mond a sta frem e a peul pa esse socrolà. Chiel a giudicrà ij pòpoj con giustissia[3].

11Che ij cej as arlegro e la tèra a 'rgiojissa! Ch’a crìja soe làude 'l mar e tut lòn ch'a-i é 'ndrinta! 12Che ij camp e ij mësson a sprìcio 'd gòj! Che tùit j'erbo dle foreste a argiojisso con ëd làude, 13përchè Chiel a l'é 'n camin ch'a ven. Chiel a ven a giudiché la tèra. A giudicrà 'l mond con giustissia e le nassion con soa vrità.

Nòte[modifiché]

  1. O "conté".
  2. Cfr. Salm 29:1-2.
  3. O "con imparsialità", "a farà le còse giuste"