La Bibia piemontèisa/Testament Vej/Salm/Salm 95
Ij Salm
[modifiché]95. Vnì, cantoma 'd gòj a Nosgnor!
[modifiché]- Ël Salmista a ciama Israel a laudé Nosgnor coma Creator dël mond e protetor ëd la nassion, ma dcò a-j buta an sl'avis ëd nen arviresse contra 'd chiel.
1Vnì, cantoma 'd gòj a Nosgnor! Crijoma 'd làude a col ch'an guerna e ch'an lìbera! 2Andoma 'dnans ëd chiel con arconossensa! Cantoma a gran' vos ëd Salm an sò onor! 3Përché Nosgnor a l'é 'n Dé grand, un gran Rè ch'a l'é dzora 'd tùit ij dé. 4Le përfondità dla tèra a son an soe man[1] e sò a son ij pich ëd le montagne! 5Ël mar a l'é 'l sò përchè a l'é chiel ch'a l'ha falo. A son ëstàite soe man ch'a l'han formà la tèra sùita.
6Vnì, prostromse e adoroma! Butomse an ginojon ëdnans a Nosgnor, nòst Creator! 7Përchè chiel a l'é nòst Dé e nojàutri i soma 'l pòpol che chiel a men-a 'n pastura, lë strop ch'a l'é 'l sò. Se mach ancheuj i lo scotèisse! 8Chiel a dis: "Esse pa coma coj ch'a l'ero a Meriba, tanme coj ch'a j'ero col dì-là a Massa ant ël desert[2], 9andoa ch'ij vòstri antich a l'avìo dësfidà mia autorità e butà a la preuva mia passiensa, combin ch'a l'avèisso vëddù lòn che mi i peudo fé. 10Për quarant' agn cola generassion a l'ha fame dëspiasì[3] e i l'hai dije: "A l'é 'n pòpol ch'a l'ha vorsù andé an sla catìva stra[4] e ch'a scota nen lòn ch'i-j comando. 11A l'é parèj ch'i son 'nrabiame e i l'hai giurà che coj-lì a sarìo mai pì intrà ant ël leu d'arpòs ch'i l'avìa prontà për lor[5]".
Nòte
[modifiché]- ↑ Ant la sfera 'd soa autorità.
- ↑ Cfr. Ebreo 3:15; 4:7.
- ↑ O "I l'hai avula 'n nàusia".
- ↑ O "dont ël cheur a l'é perdusse".
- ↑ Cfr. Ebreo 3:7-11.