La Bibia piemontèisa/Testament Vej/Levitich/Levitich 23

←Levitich 22

La Bibia piemontèisa Levìtich

Levìtich 24→

Levìtich

23

La Bìbia piemontèisa - Levitich 23

Calendari dle feste d’Israel

¹Nosgnor a l’ha ancora parlaje a Mosè. A l’ha dije: ²Faje savèj sossì a j’Israelita. Coste-sì a son le feste ch’i l’eve da solenisé coma adunanse^[1] sacrà - mie feste sacrà!

Ël Saba

³I l’eve ses dì për travajé, ma ‘l sétim a l’é ‘l Saba, un dì d’arpòs, un dì d’adunansa sacrà. An col dì-lì i fareve gnun travaj. A l’é ‘l dì d’arpòs dedicà al Signor da solenisé an tùit ij leugh anté ch’i abitereve^[2].

⁴E coste-sì a son j’àutre feste dël Signor, j’adunanse sacrà ch’i l’eve da convoché ant ij temp ëstabilì:

La Pasca e la festa dij Pan sensa Alvà

⁵Al calé dël sol dël dì ch’a fà quatòrdes dël prim mèis i solenisereve la Pasca an onor ëd ël Signor^[3]. ⁶Ël dì ch’a fà quindes dël midem mèis a comenserà la festa dij Pan Sensa Alvà an onor ëd Nosgnor. Për ses dì i l’eve da mangé ‘d pan sens’ alvà. ⁷Ël prim dì a l’é për vojàutri n’adunansa sacrà: an col dì-lì i fareve gnun travaj. ⁸Minca dì ‘d cola sman-a i smonreve ‘d sacrifissi an onor ëd ël Signor. Ël sétim di a l’ha torna da esse un dì dl’adunansa sacrà: i l’eve da fé gnun-a sòrt ëd travaj^[4].

La festa dle Primissie

⁹Nosgnor a l’ha ancora parlaje a Mosè. A l’ha dije: ¹⁰Faje savèj sossì a j’Israelita: ‘Quand che voi i sareve intrà ant ël pais ch’i l’hai dave e i comensereve l'amson, porté ai sacerdòt na brancà dle primissie ‘d lòn ch’i l’eve mëssonà. ¹¹Ël sacerdòt a presenterà la gerba dë 'dnans ëd Nosgnor l’andoman dël Saba, e parèj ‘l Signor a sarà compiasù ‘d vojàutri. ¹²L’istess dì ch’i l’avreve presentà la gerba, i smonreve an olocàust un babero d’un ann sensa difèt. ¹³ I presentereve ‘dcò n’oferta ‘d ses chilo ‘d fior ëd farin-a ampastà d’euli: a l’é n’oferta d’odor agreàbil, brusà an onor dël Signor; i la companiereve con na libassion d’un lìter ëd vin. ¹⁴I mangereve pa ‘d costa mësson, nì ‘d pan, nì ‘d gran brusatà an ëspì, ni panada o supa mitonà, fin-a che i l’avreve presentà l’oferta a vòst Dé. I osservereve costa lege an përpétuo për tute le generassion an tùit ij leugh anté ch’i stareve.

La festa ‘d Pancósta o dle Sman-e

¹⁵Dal dì ch’i solenisereve la festa dle Primissie, l’andoman dël Saba, conté set ësman-e antreghe. ¹⁶Ëd costa manera, fin-a a l’andoman dël sétim Saba i contereve sinquanta dì. Ël dì ch’a fà sinquanta i presentereve a Nosgnor n’oferta dla neuva mësson. ¹⁷Da vòstre ca i portereve doi micon ampastà con d’alvà e preparà con ses chilo ‘d fior ëd farin-a. Cole-lì a son le primissie për ël Signor. ¹⁸Ansema al pan, i smonreve an olocàust al Signor set agnej d’un ann sensa difèt, un vailèt e doi moton, con l’oferta ‘d fior ëd farin-a e le libassion corispondente: coste-sì a son d’oferte d’odor agreàbil brusà an onor dël Signor. ¹⁹I smonreve ‘dcò un boch an sacrifissi pr’ ël pëccà e doi agnej d’un ann an sacrifissi ‘d comunion. ²⁰Ansema ai pan ëd le primissie, ël sacerdòt a smonrà ‘l boch e ij doi agnej con ël rit ëd presentassion dë 'dnans ëd Nosgnor. Coste oferte a son la porsion santa dël Signor arzervà ai sacerdòt. ²¹An col midem dì convoché n’adunansa sacrà: i l’eve pa da angageve an minca sòrt ëd travaj. I osservereve costa lege an përpétuo për tute le generassion, a na fà nen andoa ch’i stareve^[5]. ²²Cand ch’i fareve l'amson ëd lòn ch’a-i sarà da cheuje an vòstre campagne, andé pa a meje fin-a a a la broa dël camp; mëssoné pa le gèrbole restà dòp ch’i l’eve mëssonà, ma lasseje ai pòver e ai foresté. Mi i son ël Signor, ël vòst Dé^[6]”.

Ël prim dì dël sétim mèis

²³Nosgnor a l’ha parlà ancora a Mosè. A l’ha dije: ²⁴“Faje savèj sossì a j’Israelita: “Ël prim dì dël sétim mèis a sarà për vojàutri un dì d’arpòs, un dì ‘d comemorassion nunsià dal son ëd ël còrn. A l’é un dì d’adunansa sacrà. ²⁵An col dì-lì i fareve gnun travaj e i presentereve n’oferta ch’a sarà brusà an onor ëd Nosgnor.

Ël dì dl’Espiassion

²⁶Nosgnor a l’ha ancora parlà a Mosè: ²⁷“Ël des dë sto sétim mèis a l’é ‘l dì dl’Espiassion. I convochereve n’adunansa sacrà, i fareve digiun e i presentreve n’oferta ch’a sarà brusà an onor ëd Nosgnor^[7]. ²⁸An cola giornà-lì i fareve gnun-a sòrt ëd travaj, përchè ch’a l’é ‘l dì dl’espiassion ëd le colpe, ël dì ch’as fà an vost favor ël ritual d’espiassion dë 'dnans ëd Nosgnor, vòst Dé. ²⁹An col dì-lì, tui coj ch’a faran pa digiun a saran bandì dal pòpol d’Israel, ³⁰e mi medésim i farai dësparì d’an mes a Israel tuti coj ch’a fan ëd travaj. ³¹I fareve gnun-a sòrt ëd travaj. I osservereve an përpétuo costa lege për tute le generassion an tùit i post anté ch’i stareve. ³²Për vojàutri a sarà ‘n gran dì d’arpòs e ‘d digiun. Da la sèira dël dì ch’a fà neuv fin-a a la sèira dl’andoman, i chitereve tùit ij travaj”.

La festa dle Bënne

³³Ël Signor a l’ha ancora parlaje a Mosè. A l’ha dije: ³⁴“Faje savèj sossì a j’Israelita: ‘Ël dì ch’a fà quindes ëd ël sétim mèis a comensa la festa dle Bënne^[8] dedicà a Nosgnor e për na sman-a. ³⁵Ël prim dì a l’é ‘n dì d’adunansa sacrà e i fareve gnun-a sòrt ëd travaj. ³⁶I brusereve n’oferta an onor ëd Nosgnor minca ‘n dì dla sman-a. Ël dì ch’a fà eut a tornerà a esse për vojàutri un dì d’adunansa sacrà e i brusereve torna n’oferta an onor ëd Nosgnor. Cola lì a l’é l’adunansa sacrà ‘d ciusa: i l’eve da fé gnun-a sòrt ëd travaj^[9].

³⁷Coste-sì a son donca le feste 'd Nosgnor: antlora i ciamereve ansema j’Israelita a l’adunansa sacrà e i presentereve ‘d don an onor ëd Nosgnor: i presentereve dj’olocàust e d’oferte, ëd sacrifissi ‘d comunion e ‘d libassion, conform al ritual ëd minca festa. ³⁸Costi sacrifissi as giontran a coj ch’i smon-e a Nosgnor minca ‘n Saba e a tùit ij don e sacrifissi ch’i presentereve a Nosgnor ëd manera volontària o pr’ ël compiment d’un vot.

³⁹D’àutra part, ël dì ch’a fà quindes ëd ël sétim mèis, cora ch’i l’avreve cojù ij frut ëd la tèra, i selebrereve na sman-a ‘d festa an onor ëd Nosgnor. Ël prim e ‘l dì ch’a fà eut a saran dì d’arpòs. ⁴⁰Ël prim dì i pijereve ‘d bela fruta da le piante con l’onor ëd soe rame: branch ëd palmera, d’erbo brondù, sales dij torent, e i fareve festa për set di a la presensa dël Signor, vòst Dé . ⁴¹Da generassion a generassion i selebrereve minca n’ann costa festa ‘d set dì dedicà a Nosgnor. I osservereve an përpètuo costa lege për tute le generassion. I selebrereve la festa ‘l sétim di: ⁴²Për set dì i l’avreve da vive sota ‘d bënne. Vojàutri, ij nassù an Israel, i vivreve sota ‘d bënne, ⁴³përchè ij vòstri dissendent a sapio che i l’hai fàit vive j'israelita sota ‘d bënne, cand ch'i l’hai faje seurte da l’Egit. Mi i son ël Signor, vòst Dé^[10].

⁴⁴Përparèj Mosè a l’ha fàit la promulgassion a j’Israelita dle feste ‘d Nosgnor.

Nòte

1. O “convocassion”.
2. Cfr. Surtìa 20:8-10; 23:12; 31:15; 34:21; 35:2: Deuteronòmi 5:12-14.
3. Cfr. Surtìa 12:1-13; Deuteronòmi 6:1-2.
4. 23:6-8, cfr. Surtìa 12:14-20; 23:15; 34:18; Deuteronòmi 16:3-8.
5. 23:15-21, cfr. Surtìa 23:16; 34:22; Deuteronòmi 16:9-12.
6. Cfr. Levitich 19:9-10; Deuteronòmi 24:19-22.
7. Cfr. Levìtich 16:29-34.
8. O “dj Tabernacoj”, o “caban-e”.
9. 23:33-36, cfr. Deuteronòmi 16:13-15.
10. 23:39-43, cfr. Surtìa 23:16; 34:22.