La Bibia piemontèisa/Testament Neuv/Roman/Roman 15

←Roman 14

La Bibia piemontèisa Roman

Roman 16→

La Bìbia piemontèisa - Roman 15

15

La disposission dij fòrt ant la fede

¹Nojàutri, ch’i soma fòrt ant la fede, i l’oma da giuté coj ch’a lo son nen a porté soe debolësse e nen complimentene ch’i soma fòrt. ²I l’oma da giuté j’àutri a fé lòn ch’a l’é giust për esse d’edificassion a la comunità. ³Crist a vivìa nen për compiasèj a chiel midem. Bin a l’opòst! Com a dis la Scritura: “J'ofèise 'd coj ch’at maltrato a l’ha arsevuje chiel^[1]”. ⁴An efet, tut lòn ch’a l’é stàit ëscrivù 'nt le Scriture Sante tant temp fa a l’é për nòstra istrussion. Ansì, grassie a la speransa e 'l confòrt ch’an dan le Scriture, i spetoma con passiensa che le promësse 'd Nosgnor as compisso.

⁵Che Nosgnor, ch’a l’é la sorgiss ëd costa passiensa e confòrt, a v’acòrda 'd vive an pas e armonìa, d’acòrdi j’un con j’àutri second l’esempi ëd Gesù Crist. ⁶Parèj, con un sol cheur e na sola vos, i dareve làude e glòria al Dé e Pare ‘d Gesù Crist, Nosgnor.

Al servissi j’un dj’àutri

⁷Aceteve^[2], donca, j’un j’àutri për la glòria ‘d Nosgnor, tant me Crist a l’ha acetà vojàutri.

⁸Ten-e a ment che Crist a l’é vnùit al servissi dij Giudé^[3] për mostré che Nosgnor a l’é fedel a le promësse ch’a l’ha fàit ai sò antich^[4], ⁹mentre che j’àutri pòpoj^[5] a rivo a dé glòria a Nosgnor grassie a la misericòrdia che chiel a l’ha faje. Coma a dis la Scritura: “An causa 'd lòn, mi it laudrai an tra le gent e i cantrai ëd salm a tò nòm^[6]”. ¹⁰A dis ëdcò: “Vojàutre le nassion! Arlegreve con sò pòpol^[7]!”. ¹¹Ancora: “Laudé Nosgnor, vojàutri tùit ij pòpoj! Deje glòria, vojàutre tute le nassion!^[8]”. ¹²Ant n’àutr leugh Isaìa a dis: “A-i sarà na rèis ëd Jesse, un ch’as alverà për governé le gent, e le gent a butran soa speransa an chiel^[9]”. ¹³I prego che Nosgnor, la sorgiss ëd la speransa, a v’ampinissa tuti ëd gòj e 'd pas, përchè i l’eve fiusa an chiel. Anlora i dësbordreve dë speransa fiusosa grassie a la fòrsa dlë Spìrit Sant.

Conclusion

¹⁴Car ij mè frej e seur! I son pì che përsuas ch’i seve pien ëd bontà, ch’i conòsse le ròbe pro bin e ch’i peude mostreje j’un a j’àutri. ¹⁵Contut i l’hai vorsuve scrive con na chèich ancalura^[10] për arfrëscheve un pò la memòria. I l’hai arseivù da Nosgnor ël don ¹⁶d’esse 'n sërvent ëd Gesù Crist an tra ij pagan për compì la funsion sacra 'd nunsieje l’Evangeli ëd Nosgnor e smonje vòstre përson-e coma n’oblassion^[11] ch’a-j sia agreàbil e santificà da lë Spìrit Sant. ¹⁷A l’é për lòn ch’i peudo vanteme an Gesù Crist dël servissi ch’i rendo a Nosgnor. ¹⁸Contut, i m’ancalo nen ëd vanteme d’àutr che lòn che Crist a l’ha fàit për mè mojen përchè ij pagan a fusso ubidient a la fede. Nosgnor a l’é servisse ‘d mia paròla e 'd mia assion, ¹⁹compagnà dal podèj ëd fé 'd segn e 'd prodis^[12] con la fòrsa dlë Spìrit ëd Nosgnor. Dë sta manera i l’hai nunsià tut l’Evangeli ëd Crist daspërtut, da Gerusalem fin-a a l’Illìria.

²⁰Mia ambission a l’é sèmper ëstàita cola 'd nunsié l’Evangeli anté che 'l nòm ëd Crist a l’era pa ancora conossù pitòst che anté che na cesa a l’era già stàita stabilìa da cheidun d’àutri^[13]. ²¹I l’hai seguità 'l pian dont le Scriture a diso: “A lo vëdran coj ch’a l’é nen ëstaje 'ncora nunsià, e a lo sentiran coj ch’a l’han nen ancora sentune parlé^[14]”. ²²A l’é për lòn che i l’hai tardà tant ëd ven-e a troveve, përchè i predicava an coj pòst-là^[15].

Ij proget ëd Pàul

²³Tutun, adess ch’i l’hai terminà mè travaj an cole region-lì, e apress tanti agn dë speté, i l’hai maitass ëd venive a trové, ²⁴lòn ch’i penso 'd fé anans d’andé an Ëspagna, e cand ch’i lo faso, i farai ëdcò na fërmà a Roma. Apress d’avèj godù 'n pò 'd vòstra companìa, i seguitrai peui mè viagi con vòst agiut.

²⁵Për ël moment, contut, i l’hai da andé a Gerusalem a porté un don ai chërdent ch’a-i son^[16]. ²⁶Le comunità ‘d Macedònia e d’Acaia a l’han decidù 'd fé na coleta për giuté ij pòver ch’a-i é an mes dël pòpol sant ch’a sta a Gerusalem^[17]. ²⁷A son ëstàit content ëd fela përchè a sento d’avèjne n’òbligh. Da già che ij pagan a l’han arseivù le benedission ëspirituaj dl’Evangeli dai chërdent ëd Gerusalem, lor a chërdo ch’a sìa ël mìnim da fesse për ess-je arconossent, visadì 'd giuteje 'nt le finanse^[18]. ²⁸Parèj, donca, cand ch’i l’avrai compì sta mission e i l’avrai armëttuje 'l frut ëd la coleta, i pass-rai a feve na vìsita anans d’andé an Ëspagna. ²⁹I son sicur che, cand ch’i vnirai a troveve, i vnirai con la pien-a benedission ëd Crist.

³⁰Car ij mè frej e seur! I m’arcomando, an nòm ëd Nosgnor Gesù Crist, dë steme davzin an mie bataje an pregand Nosgnor për mi. Felo përchè im veule bin ëd col amor ch’a l’ha dave lë Spìrit Sant. ³¹Preghé përchè i sia liberà dai mischërdent ch’a-i é an Giudea e përchè l’agiut ch’i porto a Gerusalem a sia bin acetà dal pòpol sant. ³²Dë sta manera, se Nosgnor a lo veul, i podrai ven-e a feve na vìsita con gòj e arposeme an vòstra compania.

³³Ora, che Nosgnor, ch’an dà soa pas, a sia con tuti voi. Amen.

Nòte

1. Cfr. Salm 69:9.
2. O “arsèive”
3. O “dla sirconcision”.
4. O “ai patriarca”.
5. Let. “ij Gentij”.
6. Cfr. Salm 18:49; 2 Samuel 22:50.
7. Cfr. Deuteronòmi 32:43.
8. Cfr. Salm 117:1.
9. Cfr. Isaia 11:10.
10. O “franchëssa”.
11. N’oferta.
12. O “‘d fé prodis e miracoj”.
13. O “pitòst che edifiché an sël fundament posà da quaidun d’àutri”.
14. Cfr. Isaia 52:15.
15. Cfr. Roman 1:13.
16. O “për un servissi al pòpol sant”.
17. 15:25-26 cfr. 1 Corint 16:1-4.
18. Cfr. 1 Corint 9:11.