La Bibia piemontèisa/Testament Neuv/Pero/1Pero 5

←1 Pero 4

La Bibia piemontèisa Litre 'd Pero

2 Pero 1→

La Bìbia piemontèisa - 1Pero 5

1 Pero

5

La condussion ëd lë strop ëd Nosgnor

¹I arcomando a j’ansian^[1] ch’a son tra ‘d voi, mi ch’i son ansian con lor, testimòni dij patiment dël Crist e partessipant ëd la glòria ch’a l’ha da esse arvelà, ²ëd ciadlé lë strop dël Crist ch’av l’é dàit an guerna, stasendje dapress nen për fòrsa^[2] ma ëd bon-a veuja sota la diression ëd Nosgnor^[3], nen për avèjne ‘d guadagn (còsa ch’a sarìa vërgognosa), ma con impegn. ³E feve nen ij déspota^[4] su coj ch’av son afidà, ma sie d’esempi për lë strop, ⁴parèj che cand ch’ël Cap dij bërgé a vnirà^[5] i arseivreve la coron-a ‘d glòria che mai a vnirà fiapa^[6].

⁵Ant l’istessa manera, vojàutri ch’i seve giovo a venta ch’ sie sogetà a j’ansian, ansi, a venta che tùit i sio arvestì d’umilità l’un anvers ëd l’àutr, përchè Nosgnor a arzist ai superbios ma a fa grassia a j’ùmij^[7]. ⁶Umilieve, donca, sota la man fòrta ‘d Nosgnor, parèj che chiel av esalterà cand ch’a na sarà ‘l temp^[8]. ⁷Carié^[9] an su chiel tùit ij vòstri fardèj^[10] përchè chiel a l’ha ‘d soen ëd vojàutri^[11].

⁸Sie bin controlà^[12] e svicc^[13]. Vòstr nemìs, ël diav, a l’é tanme ‘n leon ch’a breugia e ch’a va ‘n gir për vëdde s’a treuva cheidun d’angorgionesse^[14]. ⁹Resistje, fòrt an vòstra fede, përchè i seve che vòstra fradlansa ant ël mond a sopòrta j’istess patiment.

¹⁰Ora, ch’ël De ‘d minca na grassia, ch’a l’ha ciamane a Soa glòria eterna an Gesù Crist, dòp ch’i l’avreve patì un pò ‘d temp, av ristablirà, av confermerà, av rendrà fòrt e frem. ¹¹A Chiel sia la glòria e la fòrsa, ant ij sécoj dij sécoj. Amen.

Ij salut conclusiv

¹²I l’hai scrivuve curt për ël mojen ëd Silvan^[15], nòstr frel, ch’i sai ch’a l’é ‘n frel fedel, për feve ‘d coragi e për testimonié che costa a l’é la vera grassia ‘d Nosgnor. Sté ferm an chila. ¹³La cesa ch’a l’é ‘n Babilònia, sernùa con voi, e March^[16], mè fieul, av saluta. ¹⁴Saluteve l’un l’àutr con un basin d’amor cristian. Che la pas a sia con tuti vojàutri ch’i seve an Gesù Crist. Amen.

Nòte

1. “Ansian” a l’é la tradussion literal ëd “presbyter” che ant le sinagòghe e ant le prime comunità cristian-e a l’era ‘l titol ëd coj ch’a n’avìo la sovrintendensa e ch’a l’ero ‘dcò ansian d’età.
2. Nen mach për dovèj, përchè a venta felo.
3. Let. “conforma a Nosgnor”.
4. Let. “ij signor”, coj ch’a n’han dominassion.
5. O “comparirà” (ël Crist).
6. O “a vnirà guasta”, “arsëcch-rà”. Costa a l’era antlora na coron-a ‘d làur ch’a vnìa assignà al vincitor ëd na competission o ‘d na guèra.
7. Cfr. Proverbi 3:34.
8. Cf r. Maté 23:12; Luca 14:11; 18:14.
9. Let. “campé”.
10. Crussi, sagrin, preocupassion.
11. Av cudìss.
12. O “sobri, ch’as ten”.
13. Nen gargh, molanciù.
14. O “divoré”.
15. Cfr. At 15:22,40.
16. Cfr. At 12:12,25; 13:13; 15:37-39; Colossèis 4:10; Filèmon 24.