La Bibia piemontèisa/Testament Neuv/Colosseis/Colosseis 3

←Colossèis 2

La Bibia piemontèisa Colossèis

Colossèis 4→

La Bìbia piemontèisa - Colossèis 3

Colossèis

3

Esortassion a serché le còse ‘d là an àut

¹Sicoma ch'i seve arsussità a neuva vita ansema al Crist, susté^[1] le realità del cel, andova che chiel a l'é astà ant ël pòst d'onor a la drita 'd Dé^[2]. ²Pensé^[3] a le còse del cel, nen a cole ch'a aparten-o a cost mond-sì. ³Përchè i seve coma mòrt a soa manera 'd vive, e vòstra vita, la pì vera, a l’é stërmà con ël Crist an Nosgnor Dé. ⁴Cand che Crist, ch’a l’é vòstra vita, a s’arvelërà^[4], anlora ‘dcò vojàutri i sareve arvelà ansema a chiel an glòria. ⁵Buté a mòrt^[5], donca, tut lòn^[6] ch’an vojàutri^[7] a l’é ‘d costa tèra: fornicassion^[8], impurità, passion dësbaucià, anvìe pien-e 'd gramissia, e l’avarissia^[9], ch’a l’é idolatrìa. ⁶Përché a son prope coste le còse ch’a tisso l'ira ‘d Nosgnor sij fieuj dla dzubidiensa^[10].

⁷Ëdcò vojàutri i j’ere parèj^[11], cand, temp fà, i vivìe coma^[12] ch'a fan lor. ⁸Adèss, però, campé via tute cole còse, ël ghignon, ël malànim, la maldisansa, e che gnun-a paròla dzonesta a seurta mài da vòstra boca. ⁹Dì nen ëd busiardarìe l’un a l’àutr, përché i seve dësvestìve dl’òm vej ch’i j’ere^[13], con tute soe assion, ¹⁰e i seve arvestive coma n’òm neuv^[14] ch’as arnova an conossensa, a smijansa ‘d col ch’a l’ha crealo^[15].

¹¹Ambelessì a-i é pì nen nì Grech, nì Ebrèo, nì sirconcis, nì ansirconcis, nì bàrbar, nì Sita, nì s-ciav, nì lìber. Crist a l’é tut lòn ch’a conta, e chiel a viv an tùit ij cristian.

¹²Parèj, donca, arvestive coma ‘d gent che Nosgnor a l’ha sernù, da sant e preferì ch’i seve, ëd sentiment ëd compassion ancreusa, ëd bontà, d’umiltà, ëd dosseur, ëd në spirit passient; ¹³Soporteve j’un j’àutri. Se cheidun a l’ha cheicòsa contra n’àutr, përdonje. Nosgnor a l’ha përdonave: përdoné ‘dcò vojàutri^[16]. ¹⁴Dzurtut, arvestive dl’amor, che tut a gropa ansema e a përfession-a.

¹⁵Che la pas ëd Nosgnor, ch’i na seve ciamà pr’ esse un còrp sol, a l’àbia ‘l pòst ël pì amportant ant ij vòstri cheur; e manché nen d’esse arconossent. ¹⁶Che la paròla ‘d Crist an tota soa richëssa a ampinissa vòstra vita. Mostreve e esorteve a vicenda con tuta la saviëssa che Nosgnor av dà; cissà da la grassia ‘d Nosgnor, canté con tut ël cheur e pien d’arconossensa ëd salm, ëd làude e ‘d càntich dlë Spirit. ¹⁷Tut lòn chi’i feve, sia an paròla che ‘d fàit, fé tut a nòm dël Signor Gesù, rendand për chiel grassie a Nosgnor ël Pare^[17].

Neuve relassion përsonaj

¹⁸Fomne, sogeteve ai vòst marì^[18], ma felo coma comanda ‘l Signor. ¹⁹Vojàutri marì, voleje bin a vòstre fomne, e trateje sèmper con rispèt^[19]. ²⁰Fieuj, fé l’ubidiensa a vòst pare e vòstra mare an tut, përchè lolì a-j pias a Nosgnor^[20]. ²¹E vojàutri, pare e mare, porté nen ij vòstri fieuj a l’esasperassion përchè as dëscoragio nen^[21]. ²²Vojàutri ch’i seve ‘d serv, fé l’ubidiensa a coj che an tèra a son ij vòstri padron, nen mach për feje content cand ch’av vëddo. Feje l’ubidiensa con sincerità, pròpi përchè ch’i seve timorà ‘d Nosgnor. ²³Qualsëssia ch’a sìa vòst travaj, felo ‘d bon-a veuja coma s’a fussa ‘n travaj fàit për Nosgnor e nen për d’àutri. ²⁴Tnive an ment ch’a sarà da Nosgnor ch’i arseivreve ‘l salari dl’ardità, përché i serve 'l Crist, ël Signor. ²⁵Contut, col ch’a fà nen lòn ch’a l’é giust a sarà arpagà con l’istessa monèja, përché Nosgnor a fà nen ëd distinsion^[22] an tra le përson-e^[23].

Nòte

1. O "seguité a serché le còse ‘d là an àut", ant ël sens ëd aspiré, miré, desideré, susnì.
2. Cfr. Salm 110:1.
3. O "Seguité a deje da ment".
4. O “as mostrarà”, “as farà vëdde”.
5. O “mortifiché” > mortificassion.
6. Let. “ij vòsti mèmber”.
7. O “an vòsta natura”.
8. Inmoralità sessual, (an grech: porneia).
9. O “angordìssia”.
10. Espression semitica ch’a sta për “la gent caraterisà dla dzubidienza”, coj ch’as arviro contra ‘d Nosgnor.
11. O “dcò vojàutri a marciave ansema a lor”.
12. O “antrames a lor”.
13. Cfr. Efesin 4:22.
14. Cfr. Efesin 4:24.
15. Cfr. Genesi 1:26.
16. 3:12-13 cfr. Efesin 4:2,32.
17. 3:16-17 cfr. Efesin 5:19-20.
18. Cfr. Efesin 5:22; 1 Pero 3:7.
19. O “sensa stussicheje”, “sensa anrabieve”,
20. Cfr. Efesin 6:1.
21. Cfr. Efesin 6:4.
22. Cfr. Deuteronòmi 10:17; Efesin 6:9.
23. 3:22-25 cfr. Efesin 6:5-8.