La Bibia piemontèisa/Testament Neuv/Pero/1Pero 3

←1 Pero 2

La Bibia piemontèisa Litre 'd Pero

1 Pero 4→

La Bìbia piemontèisa - 1Pero 3

1 Pero

3

Le fomne e ij sò òm

¹Che ‘dcò le fomne a sio sogetà ai sò òm^[1], parèj che s’a na j'é ch’a ubidisso nen a la Paròla, a sio vagnà sensa ‘d paròle, për ël mojen ëd vòstra manera ‘d fé^[2], ²cand ch’a l’avran vëddù vòstra condòta pura e rispetosa. ³Che vòstra blëssa a sia nen tant cola ‘d fòra - cola ch’a consist ant la frisura dij cavèj, ant na parura d’òr, e ant la magnificensa dla vesta^[3]. ⁴Vòstra blëssa a deuv esse pitòst cola ch’a l’é andrinta, cola dël cheur, la blëssa ch’a dura, cola ‘d në spìrit gentil e pasi. Sossì a l’é motobin pressios dë 'dnans a Nosgnor. ⁵Përchè a l’é parèj ch’a fasìo tant temp fà le sante fomne ch’a speravo an Nosgnor e ch’a stasìo an sogession ai sò marì. ⁶Pijé l’esempi ‘d Sara, ch’a ubidìa a sò òm Abraam ciamand-lo ‘mé signor^[4]’. Vojàutre i dvente soe fije cand ch’i feve lòn ch’a l’é giust e i l’eve nen tëmma d’esse parèj.

⁷Vojàutri òm, ant l’istessa manera, traté vòstre fomne con ëd bel deuit^[5] përchè lor a son coma un vas ëdlicà: a venta portèje rispet. Vojàutri, an efet, i seve ansem a lor ardité dla grassia dla vita. S’i feve parèj, vòste orassion a saran nen ostacolà^[6].

Ij patiment ëd coj ch’a fan lòn ch’a l’é giust

⁸Për finì, esse tùit an armonìa, pien ëd compassion e grinor l’un vers l’àutr, ùmij. ⁹Rende nen mal për mal, nì ofèisa për ofèisa, ma benedì, përchè ch’i seve ciamà a arsèive na benedission. ¹⁰Përchè col ch’a veul amé la vita e vëdde dij bej di, a l’ha da traten-e soa lenga dal mal e ij sò làver dal përnonsié 'd tromparìe. ¹¹Col-lì ch’a schivia ‘l mal e ch’a fasa ‘l bin, ch’a serca la pas, e ch’a varda ‘d procuress-la, ¹²përchè j’euj ëd Nosgnor a son an sij giust e soe orije a-j scoto cand ch’a prego. Nosgnor^[7], nopà, a l’é contra 'd coj ch’a fan lòn ch’a l’é mal^[8]. ¹³Chi mai podria-lo feve ‘d mal se vojàutri i seve ‘d fé ‘d bin?

¹⁴Ma, an efet, s’av càpita d'esse maltratà për motiv ch’i feve lòn ch’a l’é giust, për vojàutri a l’é na benedission^[9]. Avèj nen tëmma ‘d lor, sie nen demoralisà. ¹⁵Fissé ij vòstri cheur an sël Crist, vòst Signor^[10], sie sèmper pront a dé na rëspòsta a chicassìa ch’av ciama la rason ëd la speransa ch’a l’é an vojàutri^[11], ¹⁶ma felo con gentilëssa e con rispet, sèmper con na consiensa ciàira, parèj, coj ch’a parlo mal ëd vojàutri, malgré vòstra bon-a condòta an Crist, a sio dësvërgognà^[12] cand ch’av dan contra, ¹⁷Përchè ch’a l’é mej d’esse maltratà an fasend dël bin, se cola-lì a l’é la volontà ‘d Nosgnor, che an fasend ëd mal.

¹⁸Përchè ‘dcò ‘l Crist a l’ha patì na vira për ij pecà; chiel, giust për j’ingiust, con ël but dë mnene a Nosgnor Dé. Chiel a l’é stàit massà 'nt la carn ma a l’é stàit vivificà 'nt lë Spìrit.

¹⁹Ant lë Spìrit a l’é ‘dcò andàit a prediché a j'ànime ch’a son an përzon, ²⁰cole che na vira a l’ero stàite sensa fede, cand che Nosgnor a l’avia spetà con santa passiensa, ai di ‘d Noé, durant la costrussion ëd n’arca. Ant l’arca, nopà, mach pòchi, visadì eut përson-e, a l’ero stàite salvà d’antrames ëd l’eva^[13]. ²¹Sossì a prefigurava ‘l batèsim che adess av salva^[14] - ch’a l’é nen un lavagi dël còrp, ma ‘l segn ëd la promëssa che Nosgnor av fà ‘d na consiensa ciàira, për ël mojen ëd l'arsurression ëd Gesù Crist, ²²ch’a l’é ‘ndàit an cel e ch’a l’é adess a la drita ‘d Nosgnor Dé, con j’àngej, le dominassion e le potense ch’a son sogetà a chiel.

Nòte

1. Cfr. Efesin 5:22; Colossèis 3:18.
2. O “condòta”.
3. Cfr. 1 Timòt 2:9.
4. Cfr. Génesi 18:12.
5. O “considerassion”. Cfr. Efesin 5:25; Colossèis 3:19.
6. O “ampedì”.
7. O “la facia ‘d Nosgnor”.
8. 3:10-12 cfr. Salm 34:12-16.
9. Cfr. Maté 5:10.
10. O “fé sant Nosgnor ant ij vòsti cheur”.
11. 3:14 -15 cfr. Isaia 8:12-13.
12. O “confondù”.
13. Cfr. Genesi 6:1-7:24
14. O "invocassion ëd salvëssa adressà a Nosgnor da na bon-a cossiensa".