La Bibia piemontèisa/Testament Vej/Genesi/Genesi 1

←Tàula Testament Vej

La Bibia piemontèisa Genesi

Genesi 2→

Génesi 1

Génesi

1

¹Ant ël prinsipi dla creassion, quand che Nosgnor^[1] a l'ha fàit ij cej e la tèra, ²la tèra a l'era sensa forma^[2] e veuida e 'd top ëspèss a cheurvìa la përfondità dla superfice dl'eva^[3], ma lë Spìrit ëd Nosgnor^[4] as dasìa da fè^[5] dëdzora dla surfassa dl'eva. ³Nosgnor a l'ha dit: "Ch'a sia la lus"^[6] e a l'é fasse la lus. ⁴Nosgnor a l'ha vëddù che la lus a l'era bon-a. A l'é parèj che Nosgnor a l'ha separà la lus dal top. ⁵Nosgnor a l'ha ciamà la lus "di" e 'l top "neuit". Anlora a l'é stàita sèira e a l'é stàita matin. Sto-sì a l'era 'l di ch’a fà un^[7].

⁶Nosgnor a l'ha dit: "Ch'a-i sia na vòlta^[8] ant ël mes ëd l'eva e ch'a separa l'eva da l'eva". ⁷Anlora Nosgnor a l'ha fàit la vòlta e a l'ha separà l'eva ch’a j'era sota la vòlta da l'eva ch’a j'era 'dzora dla vòlta, e parèj a l’é stàit. ⁸Nosgnor a l'ha ciamà la vòlta "cel"^[9]. Anlor' a l'é stàita sèira e a l'é stàita matin. Sto-sì a l'era lë scond di.

⁹Nosgnor a l'ha dit: "Che l'eva sota 'l cel as ambaron-a ant un sol pòst e ch'a comparissa ël teren sùit. E parèj a l'é stàit. ¹⁰Nosgnor a l'ha ciamà 'l teren sùit: "Tèra" e l'eva ch'a l'era butasse 'nsema: ij "Mar". Nosgnor a l'ha vëddù che tut sòn a l'era bon.

¹¹Nosgnor a l'ha dit: "Che la tèra a pòrta 'd gich^[10], ëd piante ch'a pòrto djë smens conform a soe sòrt, e d'erbo ch'a pòrto an lor d'ësmens conform a soe sòrt. E parèj a l'é stàit. ¹²La tèra a l'ha portà ‘d vegetassion - ëd piante ch'a portavo dë smens conform a soe sòrt, e d'erbo ch'a portavo an lor d'ësmens conform a soe sòrt. Nosgnor a l'ha vëddù che tut sòn a l'era bon. ¹³A l'é stàita sèira e a l'é stàita matin. Sto-sì a l'era 'l ters di.

¹⁴Nosgnor a l'ha dit: "Ch'a-i sio ‘d ciàir ant la vòlta dël cel për separé 'l di da la neuit, e ch'a-i sio 'd marche për indiché lë stagion, ij di e j'agn, ¹⁵e ch'a servo da ciàir ant la vòlta dël cel për anluminé la tèra". E parèj a l'é stàit. ¹⁶Nosgnor a l'ha fàit doe lus grande - ël ciàir pì grand për regolé 'l di e ‘l ciàir pì cit për regolé la neuit. A l'ha fàit ëdcò le stèile. ¹⁷Nosgnor a l'ha butà ij ciàir ant la vòlta dël cel për anluminé la tèra, ¹⁸për regolé 'l di e la neuit e për separé la lus dal top. Nosgnor a l'ha vëddù che tut sòn a l'era bon. ¹⁹A l'é stàita sèira e a l'é stàita matin. Sto-sì a l'era 'l quart di.

²⁰Nosgnor a l'ha dit: "Che l'eva a furmiola d'un furmiolament ëd creature vive e che dj'osej a volo 'n sla tèra vers la vòlta dël cel". ²¹Nosgnor a l'ha creà ij pèss gròss e tute le béstie vive ch'as bogio e ch'a furmiolo ant l’eva conforma soe sòrt. A l'ha creà 'dcò minca n’osel con dj'ale, conform a soe sort. Nosgnor a l'ha vëddù che tut sòn a l'era bon. ²²Nosgnor a l'ha benedije e a l'ha dit: "Ch'i sie fosonant^[11]. moltiplijeve e 'mpinì l'eva dij mar, e che j'osej as moltiplico 'n sla tèra".  ²³A l'é stàita sèira e a l'é stàita matin. Sto-sì a l'era 'l quint di.

²⁴Nosgnor a l'ha dit: "Che la tèra a pòrta ‘d creature vive conforma soe sòrt: ëd cabial, dij serpent^[12] e 'd béstie sarvaje, conforma soe sòrt, e parèj a l'é stàit. ²⁵Nosgnor a l'ha fàit le béstie sarvaje conform a soe sòrt, ëd bestiam conform a soe sòrt, e tute le creature ch'a s'ёstruso an sla tèra conform a soe sòrt. Nosgnor a l'ha vëddù che tut sòn a l'era bon.

²⁶Anlora Nosgnor a l'ha dit: "Foma l'òm a nòsta imàgin, conform a nòsta smijansa^[13], parèj ch'a peussa dominé ij pess dël mar, j'osej ёd l'aria, ël bestiam e tuta la tèra, e tute le creature ch'as bogio^[14] 'n sla tèra. ²⁷Nosgnor a l'ha creà l'òm^[15] a Soa imàgin, a l'ha crealo a imàgin ёd Nosgnor e a l'ha faje mas-cc e fumela^[16]. ²⁸Nosgnor a l'ha daje soa benedission^[17] e a l'ha dije: "Ch'i sie fosonant^[18], multiplijeve, ampinì la tèra e sogetevla! Dominé ij pess dël mar, j'osej ёd l'aria e minca creatura^[19] ch'as bogia 'n sla tèra.

²⁹Peui Nosgnor a l'ha dit: "Iv dago minca pianta ch'a pòrta dlë smens 'nsima 'd tuta la tèra e tuti j'erbo ch'a pòrto ‘d frut ch'a l’abio dë smens: tut lòn a sarà vòsta nuritura.30 E a tute le béstie dla tèra e a tut lòn ch'a l'ha j'ale ant ël cel e a tut lòn ch'a bùlica an sla tèra, e che a l'ha an chiel l'ànima che a viv: mi i dago l'erba vërda da mangé. E parèj a l'é stàit 31 E Dé a l' ha vëddù tut lòn che a l'avìa fàit, e varda-li, andasìa Tut pròpi bin. E a l'é torna stàita sèira, peui matin: sest di.

Nòte

1. Conforma la tradission, i voltoma coma "Nosgnor (Dé)" ël nòm ebraich ch'a l'é dovrà ambelessì , na fòrma plural. Quand ch'as trata dl' ùnich ver Dé, ël verb a l'é sèmper al singolar. La fòrma plural a dinòta majestà. Cost nòm a buta an evidensa la sovranità 'd Nosgnor e ch'as peul nen comparesse con gnun d'àutri. Chiel a l'é "ël Dé dij dé".
2. O “dësformà”.
3. Ël tèrmin ebràich תְּהוֹם (tëhom, “përfond, ancreus”) as arferiss a la profondeur granda ёd l'ocean primordial, col ch'a 'nserciava e stasìa sota la tèra (cfr. Génesi 7:11). As podrìa voltesse 'dcò coma balatron, abiss, abim, ravin.
4. O “ël sofi d Nosgnor”.
5. O "as meuvìa", "voltegiava", a la létera: "a planava".
6. Cfr. 2 Corint 4:6
7. Vera ch’a dovrìa disse “ël prim dì”, ma “ël di ch’a fà un” a l’é pì conform a l’original, ch’a dis nen “ël prim di”, ma “di un”. Lolì a l’ha d’implicassion teològiche.
8. O "firmament", "cel".
9. Cfr. 2 Pero 3:5
10. O “vegetassion”.
11. O “fecond”.
12. O "bestie ch'a strusio", "reptij".
13. Cfr. 1 Corint 11:7
14. O "a strusio".
15. Ant ël sens coletiv, ch'a comprend mas-cc e fumela.
16. Cfr. Maté 19:4; March 10:6.
17. Cfr. Génesi 5:1-2.
18. O "fecond".
19. O "creatura viva", "bes-cie".

---