La Bibia piemontèisa/Testament Neuv/Efesin/Efesin 4

←Efesin 3

La Bibia piemontèisa Litra a j'Efesin

Efesin 5→

Efesin

La Bìbia piemontèisa - Efesin 4

4

Vive 'nt l'unità

¹Ora mi, ch'i son përzoné an càusa dël Signor, iv esorto ch'i vive^[1] an manera degna dla vocassion ch'i l'eve arsèivù, ²con tuta umiltà e grassiosità^[2], con passiensa, soportand-ve con amor l'un l'àutr^[3], ³avend a cheur ëd manten-e l'unità dlë spìrit con ël vincol ëd la pas, ⁴un sol còrp e 'n sol ëspìrit, coma ch'a l'é 'dcò un-a la speransa ch'av dà la vocassion ch'i l'eve arseivù. ⁵An efet, a-i é un sol Signor, na sola fede, un sol batèsim, ⁶un sol Signor e Pare 'd tuti, ch'a sta dzora 'd tuti, ch'a agiss an tuti e a l'é present an tuti.

⁷Ognidun ëd nojàutri a l'ha arseivù la grassia conform a la mzura dël don che 'l Crist a l'ha daje. ⁸A l'é për lòn che la Scritura a dis:"Cand ch'a l'é montà an àut, a-j andasìo dapress ij sò përzoné e a l'ha fàit ëd don a j'òm^[4]". ⁹Ora, cost "a l'é montà", còs é-lo sedësnò che prima a l'era calà giù 'nt le part pì basse dla tèra? ¹⁰Col ch'a l'é calà giù, a l'é l'istess ch'a l'é montà dzora 'd tùit ij cej për ampinì^[5] l'univers antregh ëd chiel midem. ¹¹A l'é donca stàit chiel ch'a l'ha fàit che j'un a fusso dj'apòstoj, d'àutri ch'a fusso 'd profeta, d'àutri ch'a fusso d'evangelisator, d'àutri ancora ch'a fusso pastor e magìster^[6]. ¹²A l'é parèj che chiel a prepara coj ch'a fan part dël pòpol sant për l'esercissi dij ministeri ch'a servo për edifiché 'l còrp ëd Crist, ¹³fin-a tant che tuti i saroma rivà 'nt l'unità dla fede e dla conossènsa dël Fieul ëd Nosgnor, ant lë stat ëd gent compìa^[7], ant la mzura dla taja^[8] përfeta dël Crist.

¹⁴Parèj i saroma pì nen tanme 'd masnà nen madure. I saroma pì nen ësbatù dëdsà e dëdlà cand ch'a bofo 'd vent ëd dotrin-e neuve. I saroma pì nen ëd piàite fàcil ëd gent furba ch'as na va 'n gir për ambrojé con ëd busiardarìe ch'a smijo 'd vrità. ¹⁵Al contrari, bin fondà 'nt la vrità e 'nt l'amor, i chërseroma an ògni còsa vers ël Crist, ch'a l'é la testa dël còrp^[9]. ¹⁶A l'é chiel ch'a fà che tut ël còrp a fonsion-a ansema an manera armoniosa. Cand che ògni soa part a travaja coma ch'as deuv, sòn a giuta j'àutre part a chërse, e parèj ël còrp antregh a l'é san, a chërs e a l'é pien d'amor^[10].

Vive 'nt la santità

¹⁷Iv diso, donca, e iv esorto da part ëd Nosgnor, ëd comporteve pì nen coma ch'a fan ij pagan ch'a van mach dapress a 'd pensé ch'a l'han gnun valor^[11]. ¹⁸Soa anteligensa a l'é 'nt lë scur e a stan da leugn da la vita 'd Nosgnor an càusa dla durëssa 'd sò cheur ch' a-j manten ant l'ignoransa. ¹⁹Insensìbij coma ch'a son, a son dasse al libertinagi fin-a al ponto 'd comëtte sensa fren d'ògni sòrt ëd saloparìa.

²⁰Vojàutri, contut, a l'é nen sossì ch'i l'eve amprendù dal Crist, ²¹se për dabon i l'eve scotalo e s'i seve stàit anmaestrà da chiel. Parèj, donca, second la vrità ch'a l'é an Gesù, ²²arnonsié a vòstra condòta passà e dëspojeve dl'òm vej^[12] ch'a va 'n corussion për motiv ëd l'ambreuj d'anvìe anciarmante. ²³Al contrari, che lë Spìrit a vada a arnové vòstri pensé e portament. ²⁴Arvestive dl'òm neuv^[13], creà a smijansa 'd Nosgnor^[14] ant la giustissia e a la santità ch'a nasso da la vrità.

²⁵Për conseguensa, arnonsié a la faussarìa, e che ognidun a disa la vrità a sò pròssim^[15], përchè i soma mèmber j'un ëd dj'àutri. ²⁶Cand ch'i seve anrabià, pijeve guarda 'd nen fé 'd pecà: che 'l sol ch'a tramonta av vëdda pì nen arsentì^[16]. ²⁷Deje gnun-e ocasion al diav. ²⁸Col ch'a robava, ch'a roba pì nen, ma pitòst ch'a travaja 'd manera onesta con soe man përchè a l'abia 'dcò da dene a coj ch'a n'han damanca. ²⁹Che gnun dëscors ëdzonest a sorta mai da vòstra boca, ma col ch'a serv për edifiché e ch'a fasa 'd bin a coj ch'a lo scoto. ³⁰E crussié nen lë Spìrit Sant, ch'a l'ha marcave con sò cacèt për ël di dla redension. ³¹Campé via (che da voi as na vëdda pì) l'ameror, ël furor, l'ira, la maldicensa, ansema a d'ògni malissia, e brajé nen! ³²Fé ij brav e sie pien ëd grinor e 'd compassion j'un con j'àutri. Përdoneve j'un j'àutri coma Nosgnor a l'ha përdonave an Crist^[17].

Nòte

1. O "ch'iv porte".
2. O "gentilëssa", "misericòrdia".
3. Cfr. Colossèis 3:12-13.
4. Cfr. Salm 68:18.
5. O "për compì tute le còse".
6. O “dotor”.
7. O “n’òm përfet”.
8. O “statura”.
9. O "ël cap".
10. Cfr. Colossèis 2:19.
11. O "a la vanità dij sò pensé".
12. Cfr. Colossèis 3:9.
13. Cfr. Colossèis 3:10.
14. Cfr. Genesi 1:26.
15. Cfr. Sacarìa 8:16.
16. Cfr. Salm 4:4.
17. Cfr. Colossèis 3:13.