Osea

1

Relassion an tra Nosgnor e Israel

¹Paròla ‘d Nosgnor che a l'é staita adressà a Osea, fieul ëd Beri, ai temp d'Osia^[1], d'Iotam^[2], d'Acas^[3] e d'Esechia^[4], re 'd Giuda, e ai temp ëd Geroboam^[5], fieul ëd Joas, re d'Israel.

Ël simbolìsm dël mariagi d'Osea

²Achit ëd lòn che 'l Signor a l'ha dit për ël mojen d'Osea. Nosgnor a l'ha dije: "Va, pijte për foma na meretris e àbie ‘d fieuj da chila, përchè sto pais-sì a fà nen d'àutr che prostituisse slontanànd-se da Nosgnor". ³Chiel a l'é donch andàit a ciapé Gomer, fija 'd Diblaim, che a l'ha consepì e daje un fieul. ⁴Nosgnor a l'ha dije a Osea: "Daje 'l nòm d' Iesrel^[6]”, përchè ancora un pòch ëd temp e mi i castierai la ca 'd Ieu për ël sangh spantià ant la comba d'Iesrel, e i farai finì 'l regn ëd la ca d'Israel". ⁵A-i vnirà, an col di-là, che i sfriserai l'arch d'Israel ant la val d'Iesrel^[7]".

⁶Gomer a a l'ha consepì ancor e a l'ha partorì na fija. Ël Signor a l'ha dije: "Ciamla Lò-Rocamà^[8], përchè giumai i l'avrai pa pì misericòrdia për la ca d'Israel, për perdoneje ancora. ⁷Ma i l'avrai pietà për la ca 'd Giuda e i-j salvrai për Nosgnor sò Dé. I-j salvrai nì për l'arch, nì për la spa, nì për la guèra, nì për ij cavaj, nì për ij sivalié".

⁸Cand che Lò-Rocamà a l'é staita dëspupà, Gomer a l'ha torna consepì e partorì un fieul. ⁹Nosgnor a l'ha dit: "Ciamlo Lò-Amì^[9] përchè vojàutri i seve pa pì mè pòpol e mi i esisto pì nen për voi”.

Israel ristabilì

¹⁰Tutun, ant l’avnì, ël nùmer dj’Israelita a sarà tanme la sabia dël mar ch’as peul nen esse mzurà nì contà. Combin che Nosgnor a l’avìa dije: “Vojàutri i seve pa mè pòpol”, a-j dirà torna: “Vojàutri i seve ij fieuj dël Dé ch’a viv^[10]”. ¹¹Antlora ‘l pòpol ëd Giuda e ‘l pòpol d’Israel a saran torna riunì. A l’avran un cap ùnich e as multiplicheran ant ël pais. Ël dì d’Iesrel a sarà grand!

Nòte

↑ Cfr. 2 Rè 1:1-7; 2 Crònache 26:1-23,
↑ Cfr. 2 Rè 15:32-38; 2 Crònache 27:1-8.
↑ Cfr. 2 Rè 16:1-20; 2 Crònache 28:1-27.
↑ Cfr. 2 Rè 18:1-20:21; 2 Crònache 29:1-32:33.
↑ Cfr. 2 Rè 14:23-29.
↑ “Nosgnor a smen-a”.
↑ Cfr. 2 Rè 10:11.
↑ ”Pa compassionà”.
↑ “Pa mia gent”.
↑ Cfr. Roman 9:26.

[1] Cfr. 2 Rè 1:1-7; 2 Crònache 26:1-23,

[2] Cfr. 2 Rè 15:32-38; 2 Crònache 27:1-8.

[3] Cfr. 2 Rè 16:1-20; 2 Crònache 28:1-27.

[4] Cfr. 2 Rè 18:1-20:21; 2 Crònache 29:1-32:33.

[5] Cfr. 2 Rè 14:23-29.

[6] “Nosgnor a smen-a”.

[7] Cfr. 2 Rè 10:11.

[8] ”Pa compassionà”.

[9] “Pa mia gent”.

[10] Cfr. Roman 9:26.

[1]

[2]

[3]

[4]

[5]

[6]

[7]

[8]

[9]

[10]