2 Rè

15

Ël regn d’Asaria an Giuda

¹Ant l’ann ch’a fà vinte-sèt ch’a regnava rè Geroboam an Israel, Asaria fieul d'Amasia, a l’é dventà rè 'd Giuda. ²Chiel a l’avìa sëddes agn cand ch’a l’é dventà rè, e a l’ha regnà an Gerusalem për sinquantedòi agn. Soa mare as ciamava Iecolia e a l'era 'd Gerusalem.

³Chiel a l’ha fàit lòn ch’a-j pias a Nosgnor, coma che sò pare Amasia a l'avìa fàit. ⁴Ma chiel a l’ha tolerà ij santuari pagan ch’a j’ero ant ël pais e la gent a-i andasìa për brusé d’ancens. ⁵Ël Signor a l'ha colpì ‘l rè con la lebra e për lòn a l'ha dovù vive ant un quartierament separà, antramentre che sò fieul Iotam a l'avìa an cària 'l palass e a governava an sël pòpol dël pais.

⁶J'àutre 'mprèise d'Asaria, tut lòn ch'a l'ha fàit, comprèis lòn che a l'ha portà a compiment, a son memorià ant ël lìber dij Fàit dij rè ëd Giuda. ⁷Asaria peui a l'é mòrt^[1] e a l'é stàit sotrà con ij sò cé ant la Sità 'd David. Sò fieul Iotam a l'ha peui regnà a sò pòst.

Ël regn ëd Zecaria an Israel

⁸Ant l'ann ch'a fà tranteut dël regn d'Asaria 'd Giuda, Zecaria fieul ëd Geroboam a l'é vnùit a esse rè d'Israel. A l’ha regnà an Samaria për ses mèis. ⁹Chiel a l'ha fàit lòn ch’a l’é mal a j'euj ëd Nosgnor, com a l'avìo fàit ij sò grand. A l'ha pa arpudià ij pecà che Geroboam fieul ëd Nebat a l'avìa fàit comëtte a Israel. ¹⁰Ma Salum fieul ëd Iabes a l'ha conspirà contra 'd chiel; a l'ha sassinalo an Ibleam e a l'ha pijàit sò pòst ëd rè.

¹¹J'àutri aveniment dël regn ëd Zecaria a son anregistrà ‘nt ël lìber dij Fàit dij rè d'Israel. ¹²Sò sassinament a l’era ‘l compiment ëd la paròla dël Signor arvelà për Ieu: “Ij tò fieuj a saran astà an sël tròno d'Israel për quat generassion^[2]”. E a l'é stàit pròpi parèj.

¹³Salum fieul ëd Iabes a l'é vnùit a esse rè ant l'ann che a fà tranteneuv ëd rè Osia 'd Giuda. Chiel a l'ha regnà mach un mèis an Samaria. ¹⁴Menachem fieul ëd Gadi a l'é fasse anans da Tirza an intrand an Samaria e a l'ha batù Salum fieul ëd Iabes. Chiel a l'ha massalo e a l’é fasse rè a sò pòst.

¹⁵J'àutri fàit dël regn ëd Salum, comprèisa la cospirassion ch’a l’avìa organisà: a son memorià ant ël lìber dij Fàit dij rè d'Israel.

Ël regn ëd Menachem an Israel

¹⁶An coj dì lì, Menachem a l’ha vastà la sità ‘d Tifsach e tut lòn ch’a j’era ant la region fin-a a Tirza, përchè cola gent-lì a l’era arfudasse ‘d rendse a chiel. A l’ha fàit massé tuta la popolassion e 'dcò fàit ësventré tute le fomne an condission.

¹⁷Ant l'ann che a fà tranteneuv ëd rè Asaria 'd Giuda, Menachem fieul ëd Gadi a l'é dventà rè d'Israel. Chiel a l'ha regnà des agn an Samaria. ¹⁸Ma Menachem a l'ha fàit lòn che a l'è mal a j'euj ëd Nosgnor, nen ëslontanand-se dai pëcà che Geroboam fieul ëd Nebat a l'avìa ancoragià an Israel. Antant che a regnava, ¹⁹Tiglat-Pileser^[3] rè d'Assiria a l'ha anvasà 'l pais, e Menachem a l'ha pagaje mila talent d'argent përchè a lo giutèissa a sodé 'l contròl dël regn. ²⁰Coj sòld-lì chiel a l’avìa rafaje a jë sgnor d’Israel, pretendend da minca un ëd lor ch’a paghèisso sinquanta sicl d’argent al rè d’Assiria. Parèj ël rè d’Assiria a l’ha pì nen tacà Israel e a l’é andass-ne dal pais.

²¹J'àutri aveniment dël regn ëd Menachem, comprèis tut lòn che chiel a l'ha fàit, a son memorià ant ël lìber dij Fàit dij rè d'Israel. ²²Peui Menachem a l'é mòrt e sò fieul Pecachia a l'ha arpiassalo ant ël regn.

Ël regn ëd Pecachia an Israel

²³Ant l'ann che a fà sinquanta 'd Rè Asaria 'd Giuda, Pecachia fieul ëd Menachem a l'é vnùit esse rè d'Israel. Chiel a l'ha regnà an Samaria për dòi agn. ²⁴Ma Pecachia a l’ha fàit lòn ch’a l’é mal a j’euj ‘d Nosgnor. A l’ha arfudà dë slontanesse dai pecà che Geroboam, fieul ëd Nebat a l’avìa cissà Israel a comëtte. ²⁵Contra 'd chiel a l'ha conspirà Pecach fieul ëd Remalia e comandant ëd soa armeja. Chiel ansema a Argob e Arie e con sinquanta Ghileadita a l'han assassinà Pecachia an Samaria ant la tor dël palass real. Anlora Pecach a l'é stàit rè a sò pòst.

²⁶J’àutri aveniment dël regn ëd Pecachia e tut lòn che chiel a l’ha fàit a l’é anregistrà ant ël lìber dij Fàit dij Rè d’Israel.

Ël regn ëd Pecach an Israel

²⁷Ant l'ann ch’a fà sinquanta 'd rè Asaria 'd Giuda, Pecach fieul ëd Remalia a l'é dventà rè d'Israel. Chiel a l'ha regnà an Samaria për vint agn. ²⁸Ma Pecach a l’ha fàit lòn ch’a l’é mal a j’euj ‘d Nosgnor. A l’ha arfudà dë slontanesse dai pecà che Geroboam, fieul ëd Nebat a l’avìa cissà Israel a comëtte.

²⁹Ant ël temp ëd rè Pecach d'Israel, a l'è rivaie Tiglat-Pileser rè d'Assiria, che a l'ha ocupà Ijon, Abel Bet Maca, Ianoach, Chedes, Casor, Ghilead e la Galilea, comprèis ël teritòri 'd Neftali. Chiel a l'ha deportà la gent an Assiria. ³⁰Osea fieul d'Ela a l'ha conspirà contra 'd Pecach fieul ëd Remalia. Chiel a l'ha sassinalo e pijàit sò pòst ëd rè ant l'ann che a fà vint dël regn ëd Iotam fieul d'Osia.

³¹J’àutri aveniment dël regn ëd Pecach e tut lòn che chiel a l’ha fàit a l’é registrà ant ël lìber dij Fàit dij Rè d’Israel.

Ël regn ëd Iotam an Giuda

³²Ant lë scond ann ëd Pecach fieul ëd Remalia rè d'Israel, Iotam fieul d'Osia a l'é vnùit esse rè 'd Giuda. ³³Chiel a l'avìa vinte-sinch agn cora ch’a l'é ‘ncaminasse a regné e a l'é stàit rè për sëddes agn an Gerusalem. Soa mare a l'era Ierusa fija 'd Zadoch.

³⁴Chiel a l'é portasse coma che Nosgnor a-j pias, pròpi coma ch'a l'avìa fàit sò pare Osia. ³⁵Mach che ij santuari pagan ch’a-i j'ero ant ël pais chiel a l’ha toleraje e la gent a l'ha seguità a smon-e ‘d sacrifissi e a brusé d'ancens ambelelà. Chiel a l'ha 'dcò fàit fé la Pòrta dëdzora dël Templi ‘d Nosgnor.

³⁶J’àutri aveniment dël regn ëd Iotam e tut lòn che chiel a l’ha fàit a l’é registrà ant ël lìber dij Fàit dij Rè ‘d Giuda. ³⁷An coj di-lì 'l Signor a l'é ancaminasse a mandé rè Retsin lë scond ëd Siria e Pecach fieul ëd Remalia contra 'd Giuda. ³⁸Iotam a l'é peui mòrt e a l'é stàit sotrà con ij sò antich ant la sità 'd sò antich David. Sò fieul Acas a l’é suceduje.

Nòte

↑ Cfr. Isaia 6:1.
↑ Cfr. 2 Rè 10:30.
↑ O “Pul”, n’àutr nòm ch’a l’avìa.

[1] Cfr. Isaia 6:1.

[2] Cfr. 2 Rè 10:30.

[3] O “Pul”, n’àutr nòm ch’a l’avìa.

[1]

[2]

[3]