La Bibia piemontèisa/Testament Neuv/Tito/Tito 2

Da Wikisource.
Jump to navigation Jump to search

Tito[modifiché]

2[modifiché]

Na condòta ch'a quadra con la san-a dotrin-a[modifiché]

1Ma ti, Tito, dimostra na manera 'd vive ch'a quadra con la san-a dotrin-a. 2Mostra a j'òm ch'a son d'età[1] a controlesse, a esse degn ëd rispet[2] e a vive da savi. A l’han da avèj na fej san-a e esse amorèivol e passient. 3Fà l'istess a le fomne ch'a son d'età: mostrje 'd vive an manera da onoré Nosgnor. A l’han da nen esse 'd malalenghe[3] o 'd fomne ch'a-j piasa ‘d bèive tròp[4]. Al contrari, a l’han da mostré a j'àutri a fé 'l bin. 4A l'é parèj che le fomne d'età a l’han da dressé le giovo a volèje bin ai sò marì e a soe masnà, 5a vive 'n manera savia, a d’esse pure, a pijesse soen dla cà, fé 'l bin, e sté an sotmission ai sò marì. A l'é parèj ch'a porteran nen dëscrédit a la Paròla 'd Nosgnor. 6Fà l'istess con j'òm pì giovo: ciss-je a esse giudissios.

7Ti medèsim it l’has da essje d'esempi fasend d'ògni sòrt d’euvre bon-e. Che tut lòn ch'it fas a rifleta l'integrità e la serietà 'd lòn ch'it mostre[5]. 8Mostra la vrità parèj ch'a trovo nen da dì 'd toa dotrin-a. Antlora coj ch'an fan oposission a n'àbio vërgògna e a peusso dì gnente 'd mal ëd nojàutri.

9Ij servitor a l’han sèmper da fé ubidiensa ai sò padron e ‘d fé 'l mej ch'a peudo për contenteje e nen dëscontrarieje[6]. 10Ch'a robo gnente, ma ch'a sio dël tut degn ëd fiusa e disponìbil[7]. A sarà antlora che dabon a faran onor a la dotrin-a 'd Nosgnor, nòst Salvator.

11La grassia 'd Nosgnor a l'é stàita 'rvelà për porté la salvëssa a d'ògni sòrt ëd gent. 12La grassia an dressa a arnunsié a cola vita ch'a l’ha Nosgnor an gnun cont[8] e a le passion mondan-e[9], perch'i vivo an ësto mond gram con sapiensa, giustissia e devossion anvers a Nosgnor 13antramentre ch'i spetoma con speransa col dì maravijos quand ch'a sarà arvelà la glòria 'd nòst grand Dé e Salvator, Gesù Crist. 14Chiel a l'ha dàit soa vita për liberene da ògni sòrt ëd pecà, për purifichene e per rendne 'n pòpol, ël Sò, un pòpol ch’a sia dël tut angagià a fé d’euvre bon-e.

15A l'é tut sòn ch'it l’has da fé, an cissand ij chërdent a fé autërtant. Ti 't l'has l'autorità për coregg-je quand ch'a l'é necessari. Për lòn, lassje nen meprisé lòn ch'it dise.

Nòte[modifiché]

  1. O " Ansian".
  2. O "rispetàbil".
  3. O "maldisent".
  4. Beivande alcòliche.
  5. O "ëd toa dotrin-a".
  6. O "arbëcché", "nen fé 'd polémiche".
  7. O "bon".
  8. O "impietà".
  9. O "ai piasèj ch'a son ëd pecà".