La Bibia piemontèisa/Testament Vej/Salm/Salm 130
Salm
[modifiché]130. Nosgnor! Dal përfond i crijo a ti
[modifiché]- Ël Salmista, ch’a l’ha fiusa che Nosgnor a-j përdonrà ij sò pecà, a ciama agiùt al Signor përchè a l’é pròpi ant ël pì bel mes ëd patiment, e a cissa ‘l pòpol a fé l’istess.
1Cant ëd la montà. Nosgnor! Dal përfond i crijo a ti. 2Nosgnor scot-me! Dame da ment. It suplico: Misericòrdia! 3S'it visèisse 'd tùit ij pecà, gnun a podrìa mai presentesse dnans a ti. 4Ma ti't ses bin dispòst a përdoné përchè ti't peusse esse onorà. 5I l'hai fiusa an Nosgnor, l'hai fiusa an chiel con tut me cheur. I speto soe paròle ëd compassion. 6I l'hai l'anvìa 'd Nosgnor, tanme le vardie a speto l'albadòr. 7Israel spera an Nosgnor, përché chiel a l'ha për nojàutri n'amor sensa fin e a l'é pì che dispòst a liberene. 8Chiel a rendrà Israel lìber da tute le conseguense dij sò pecà[1].