La Bibia piemontèisa/Testament Neuv/Maté/Maté 1

←Malachìa 4

La Bibia piemontèisa Maté

Maté 2→

La Bìbia piemontèisa - Mate 01

Maté

1

Ij grand ëd Gesù

¹Registr dij grand^[1] ëd Gesù, ël Crist^[2], dissendent^[3] ëd David e d’Abraham. ² Abraham a l’é stàit ël pare d’Isach; Isach, ëd Giacòb; Giacòb, ëd Giuda e dij sò frej; ³Giuda a l’é stàit ël pare 'd Fares e Zara, nassù da Tamar; Fares a l’é stàit ël pare d’Esron; Esron, d’Aram; ⁴Aram d’Aminadab; Aminadab, ëd Nasson; Nasson, ëd Salmon; ⁵Salmon a l’é stàit ël pare ‘d Boas, nassù da Racab; Boas a l’é stàit ël pare d’Obed, nassù da Rut; Obed a l’é stàit ël pare d’Iesse; ⁶ Iesse a l’é stàit ël pare ‘d David, ël rè. David a l’é stàit ël pare ‘d Salomon, nassù da la fomna d’Urìa; ⁷Salomon a l’é stàit ël pare ‘d Roboam; Roboam, d’Abìa; Abìa, d’Asa; ⁸Asa, ‘d Giòsafat; Giòsafat, ëd Ioram; Ioram, d’Osia; ⁹Osia, d’Ioatam; Ioatam, d’Acas; Acas, d’Esechìa; ¹⁰Esechìa, 'd Manasse; 'd Manasse, d’Amon; Amon, ëd Giosìa; ¹¹Giosìa a l’é stàit ël pare d’Jeconia e ‘d sò frej. An col temp-lì a l’é staje la deportassion a Babilònia^[4]. ¹²Apress ëd la deportassion a Babilònia, Jeconia a l’é stàit ël pare ‘d Salatiel; Salatiel, ëd Zorobabel; ¹³Zorobabel, d’Abiud; Abiud, d’Eliachim; Eliachim, d’Asur; ¹⁴Asur, ëd Sadòch; Sadòch, d’Achim; Achim, d’Eliud; ¹⁵Eliud, d’Eleasar; Eleasar, ëd Matan; Matan ëd Giacòb; ¹⁶e Giacòb a l’é stàit ël pare ‘d Giusèp, lë spos ëd Maria, cola ch’a l’ha butà al mond Gesù, ch’a l’é ciamà ‘l Crist^[5]. ¹⁷A l’é parèj ch’a son quatòrdes le generassion ch’a van da Abraham fin-a a David; quatòrdes da David fin-a a la deportassion a Babilònia, e quatòrdes, da la deportassion a Babilònia fin-a al Crist.

La nassensa ‘d Gesù, ël Crist

¹⁸La nassensa ‘d Gesù, ël Crist, a l’é rivà 'n costa manera sì: Marìa, soa mare, a l’era stàita 'mpromëttùa a Giusèp e anans ch’andèisso a sté ansema^[6], a l’é trovasse ch’a spetava ‘n cit për l’euvra dlë Spirit Sant. ¹⁹Giusèp, ch’a duvìa dventé sò marì^[7], a l’ha pijà la decision ëd dësblé l’acòrd^[8] ëd mariagi an segret, përchè chiel a l’era n’òm giust e a vorìa nen dëscredite-la 'n pùblich. ²⁰Mentre ch’a pensava coma fé, n’àngel ëd Nosgnor a l'é manifestasse 'nt un seugn e a l’ha dije: “Giusèp, fieul ëd David, ch'it l'abie nen tëmma d’arsèive Marìa coma toa fomna an toa ca, përchè lòn ch’a l’é stàit concepì an chila, a l’é dlë Spirit Sant. ²¹Chila a butrà al mond un fieul e ti 't l’has da deje ‘l nòm Gesù^[9], përchè chiel a l'é vnùit per salvè sò pòpol dai sò pëccà”.

"²²Tut sòn a l’é rivà për ch’ a sia fàit tut ant la manera che Nosgnor a l’ha nunsià për boca dël profeta: ²³“La vèrgin a concepirà, e 'n fieul a nasserà ch’a sarà ciamà l’Emanuel^[10], ch’a veul dì: Nosgnor a l’é con nojàutri”^[11]. ²⁴Cand che Giusèp a l’é dësvijasse da sò seugn, a l’ha fàit tut conforma lòn che l’àngel a l’avìa comandaje, an acetand Marìa coma soa fomna, ²³ma a l’ha nen tocala^[12], fin-a a tant ch’a fussa nassù sò fieul prim-génit; e a l’ha butaje ‘l nòm Gesù^[13].

Nòte

1. O “liber”, “genealogìa”.
2. O “Mëssìa”, “l’onzù da Nosgnor”.
3. O “fieul”.
4. Cfr. 2 Re 24:14-15; 2 Crònache 36:10; Geremìa 37:20.
5. O “Mëssìa”.
6. Cfr. Luca 1:27.
7. O “sò òm”.
8. Giusèp a l’avrìa dit: “As na fà pì gnente”.
9. Cfr. Luca 1:31.
10. Cfr. Isaia 7:14.
11. Cfr. https://sites.google.com/site/bibiapiemonteisa/dissionari-biblich/emanuel-o-ges
12. O “a l’ha nen avù con chila ‘d rapòrt coniugal”, visadì sessual.
13. Cfr. Luca 2:21.