La Bibia piemontèisa/Testament Neuv/Roman/Roman 12

←Roman 11

La Bibia piemontèisa Roman

Roman 13→

La Bìbia piemontèisa - Roman 12

12

Lòn ch'a l'é na vita arnovà?

¹I m’arcomando, car ij mè frej e seur, për motiv ëd tut lòn che Nosgnor a l’ha fàit për vojàutri^[1], che i smon-e voi midem a Nosgnor coma 'n sacrifissi vivent, sant e agreàbil^[2]. A l’é cola-lì la manera vritàbil^[3] ëd rende a Nosgnor l’adorassion ch’a jë speta.

²Conformeve nen^[4] a la condòta e ai costum ëd cost mond, ma lassé che Nosgnor av trasforma^[5] an përson-e arnovà an cambiand vòstra manera 'd pensé^[6]. Anlora i amprendereve a conòsse 'l volèj ëd Nosgnor, ch’a l’é bon, agreàbil e përfet^[7].

³Ora, për la grassia ch’a m’é dàita^[8], i diso a ognidun ëd vojàutri ëd nen fé finta d’esse 'd pì 'd lòn ch’i seve. Sìe ùmij e sensà 'nt lòn ch’i pense 'd voi midem, conforma che Nosgnor a l’ha compartì a ognidun la misura dla fede^[9]. ⁴Ant un còrp a-i é vàire part, e nen tute le part a l’han l’istessa fonsion. ⁵A l’é 'dcò parèj con ël còrp ëd Crist. Nojàutri i soma le vàire part d’un còrp e i apartenoma l’un a l’àutr^[10]. ⁶Ant soa grassia Nosgnor a l’ha dane 'd don divers për fé bin ëd còse diverse. Parèj, se Nosgnor a l’ha dave l’abilità 'd profetisé, buté ës don an assion con tuta la fede che chiel a l’ha dave. ⁷Se vòstr don a l’é 'd serve d’àutri, servije bin. S’i seve 'd magìster, mostré da bin. ⁸Se vòstr don a l’é d’ancoragé d’àutri, dëscorageje nen! Se Nosgnor a l’ha dave l’abilità 'd pressidensa, ëd dirige, pijeve costa responsabilità an sël sério. S’i l’eve 'l don ëd fé d’euvre 'd misericòrdia, feje con gòj.

⁹Fé nen mach finta 'd vorèj bin a j’àutri. Felo për dabon! Avèj an ghignon lòn ch’a l’é nen giust: tnive strèit a lòn ch’a l’é bon. ¹⁰Vorèjve bin j’un a j’àutri con afession ës-cëtta, arlegreve 'd rende onor j’un a j’àutri. ¹¹Sìe nen gargh, ma travajé 'd santa len-a. Serve Nosgnor con në spìrit fërvoros. ¹²Sté alégher ant la speransa, passient ant la tribulassion, costant ant j’orassion. ¹³Cand ël pòpol ëd Nosgnor^[11] a l’é 'nt lë bzògn, sìe sèmper bin dispòst a giuté. Pratiché volënté l’ospitalità. ¹⁴Benedì coj ch’av përséguito; benedije e maledije nen^[12]. ¹⁵Arlegreve con coj ch’a son alégher e pioré con coj ch’a pioro. ¹⁶Andé d’acòrdi j'un con j’àutri. Sìe nen tant orgojos da dëspresié la companìa dla gent d’ùmil condission. Pensé nen ëd savèj tut^[13]!

¹⁷Rende a gnun mal për mal. Serche 'd fé tut con onestà, parèj che la gent a vëdda ch’i seve degn d’onor^[14]. ¹⁸Fé tut lòn ch’i peule për vive an pas con ognidun. ¹⁹Car ij mè amis, vendicheve nen. Lassé l’arvangia a la flin-a 'd Nosgnor, pròpi com a dis la Scritura: “L’arvangia a tòca a mi. I sarai mi ch’i la farai paghé a coj ch’a lo mérito”^[15]. ²⁰A l’opòst, “Se ij tò nemis a l’han fam, daje da mangé; s’a l’han sèj, daje da bèive; parèj i-j fareve vërgogné 'd lòn ch'a fan^[16]”. ²¹Lasseve nen vince dal mal, ma bate 'l mal con ël bin.

Nòte

1. O “per la misericòrdia che Nosgnor a l’ha për voi” o “për le compassion ëd Nosgnor”.
2. O “agradì”.
3. L’espression original a l’é: “λογικὴν λατρείαν”, let. Un cult (adorassion) raisonèivol, lògich, giust, “servissi raisonèvol”, o “spiritual”. A l’é ligà a “ma l'ora a ven, ànsi, a l'é pròpi adèss, che j'adorator genit a a l'adoreran ël Pare an ëspìrit e vrità” (Gioann 4:23).
4. O “copié nen”.
5. O “arforma”.
6. O “intendiment”.
7. O “compì”, “complet”.
8. Pr’ ij privilegi e l’autorità che Nosgnor a l’ha daje a l’apòstol.
9. O “la misura dla fej che Nosgnor a l’ha acordaje”, “μέτρον πίστεως”: Ël méter o mzura dla fej ch’a n’é dàita a l’é ‘l Crist, la Soa Paròla.
10. 12:4-5 cfr. 1 Corint 12:12.
11. Let. “ij sant”.
12. Cfr. Maté 5:44; Luca 6:28.
13. Cfr. Proverbi 3:7.
14. Cfr. Proverbi 3:4.
15. Cfr. Deuteronòmi 32:35.
16. O: "a sarà coma s’it posèisse dla brasa afoà an soa testa". Cfr. Proverbi 25:21-22.