La Bibia piemontèisa/Testament Neuv/Pero/2Pero 3

←2 Pero 2

La Bibia piemontèisa Litre 'd Pero

1 Gioann 1→

La Bìbia piemontèisa - 2Pero 3

2 Pero

3

Dij magìster fàuss a arnego che Gesù a l'abia da artorné

¹Car amis, costa-sì a l'é già la sconda litra ch'i vë scrivo e, an tute le doe, con mie arcomandassion, i serco 'd ranvisché an voi la giusta manera 'd pensé ²e d'arciamé a vòstra ment le paròle ch'a l'han dit ij profeta sant e 'l comandament dël Signor ch'i l'eve arseivù dai vòstri apòstoj.

³Prima 'd tut i l'eve da savèj che 'nt ij di dariè^[1] a-i vnirà 'd gent sfacià che, cissà dal vëzzo dij piasì dë sto mond, a faran le schergne^{[2] 4}e a diran: "Andoa ch'a l'é la promëssa 'd soa vnùa? Përchè da dòp che j’antich a son mòrt^[3] tut a l'é stàit bele coma ch'a l'era fin-a dal prinsìpi dla creassion".

⁵Sti-sì a fan finta 'd nen savèj ch’a l’era për ël mojen ëd la Paròla 'd Nosgnor che ij cej a son ëstàit andoa ch'a son për tuta l'antichità e la Tèra a l'é formasse da 'nt l'eva e con l'eva^[4]. ⁶Pròpi për cole còse-lì^[5] 'l mond d'antlora a l'é perì cand ch'a l'é stàit quatà d'eva dal diluvi^[6]. ⁷Ma ij cej e la Tèra ch'a-i son adèss, da l'istessa Paròla a son arzervà al feu, cand che vnirà 'l Di dël Giudissi e dla distrussion ëd la gent përversa^[7].

⁸Ora, car ij mè amis, lasseve nen ëscapé da 'n ment sossì, che dë 'dnans al Signor un di a l'é coma mila agn, e mila agn a l'é coma 'n di sol^[8]. ⁹Nosgnor a 'rtarda nen 'l compiment ëd soa promëssa, coma cheidun a chërd ch'a-i sìa n'artard, ma a l'é passient anvers ëd noi, e a veul che gnun a vada a perd-se, ma che tùit as arpentisso^[9].

¹⁰Ma 'l Di ‘d Nosgnor a vnirà coma 'n làder ëd neuit^[10]. Cand ch'a vnirà, ij cej a dëspariran con n'armor afros e j'àstar dël cel as dëslingueran ant le fiame, e la Tèra, con tut lòn che la gent a fà, a sarà 'rvelà për lòn ch'a l'é^[11].

¹¹Dàit che tut lòn a dovrà ven-e a la fin an cola manera-là, i capisse che 'd sòrt ëd gent a venta ch'i sie. Ch' l'àbie na condòta santa e rispetosa 'd Nosgnor, ¹²antramentre ch'i spetoma con grand anvìa la vnùa dël Di 'd Nosgnor. Përchè nt col dì-lì i cej a saran brusà dal feu e le stèile^[12] dël cel as dëslingueran për ël calor. ¹³Ma, conform a la promëssa, i spetoma dij cej neuv e na Tèra neuva andoa ch'a-i sarà la giustissia^[13].

Esortassion a coj cristian ch'a son fedej

¹⁴Për costa rason-sì, car ij mè amis, an ëspetand ëste còse, studieve d'esse trovà da chiel an pas, sensa macia e sensa difet^[14]. ¹⁵Vardé a la passiensa dël Signor coma n'ocasion ëd salvassion, tanme nòst car frel Pàul a l'ha scrivuv-ne, conforma la sapiensa ch'a l'é staje dàita ¹⁶cand ch'a parla 'd lòn an tute soe litre. An cole litre a-i é 'd còse ch'a son malfé da comprende e che coj ch'a son ignorant e volùbij a dëstòrzo^[15] a soa perdission ëd lor. A fan 'dcò parèj con j'àutre Scriture.

¹⁷Për costa rason-sì, car ij mè amis, da già ch'i na seve stàit avertì, pijé varda d'esse nen dëstornà da l'eror dë sta gent sensa prinsipi për mach droché giù an moland la prèisa da la vrità^[16]. ¹⁸Ma chërse 'nt la grassia e 'nt la conossensa 'd nòst Signor e Salvator Gesù Crist. A Chiel a vada la glòria ora e për sèmper, fin-a a l'eternità^[17].

Amen.

Nòte

1. O "j'ùltim dì".
2. Cfr. Giuda 18.
3. Let. "A son andormisse"..
4. Cfr. Génesi 1:6-9.
5. La Paròla e l'eva.
6. Cfr. Génesi 7:11.
7. Coj ch'a l'han gnun rispet për Nosgnor e Soa Lege.
8. Cfr. Salm 90:4.
9. Visadì: gnun ëd coj ch'a l'ha sernù coma oget ëd la grassia dla salvëssa, a perisso, ma ch'a rivo a sò temp al pentiment e a la fej an Gesù Crist.
10. Cfr. Maté 24:43; Luca 12:39:1 Tessalonicèis 5:2; Arvelassion 16:15.
11. Visadì "patanù e cru": gnun a podrà pì stërmesse o giustifichesse.
12. O: "ij còrp".
13. O "andoa che la giustissia a pijarà soa residensa". Cfr. Isaia 65:17; 66:22; Arvelassion 21:1.
14. O "rimpròcc".
15. O "a traviso", "a deformo".
16. Let. dëscade da vòstra fermëssa".
17. O "fin-a al dì dl'eternità".