La Bibia piemontèisa/Testament Neuv/Pero/2Pero 2

←2 Pero 1

La Bibia piemontèisa Litre 'd Pero

2 Pero 3→

La Bìbia piemontèisa - 2Pero 2

2 Pero

2

La manera grama ‘d vive dij fàuss magìster

¹Pròpi coma ch’a j’ero dij profeta fàuss an tra ‘l pòpol d’Israel, a seurtran fòra ‘dcò an mes ëd vojàutri ‘d magìster fàuss. Costi magìster a ‘nfileran tra ‘d voi d’eresìe 'd përdission fin-a a la mira d’arneghé ‘l Signor ch’a l’ha riscataje. A n’arzulterà che as tireran adòss na pronta ruin-a. ²Tanta gent a ‘ndrà daprèss a la manera ‘d vive dësbaucià ‘d costi magìster. Për motiv ëd lor la vìa dla vrità a sarà dëspressià. ³Motivà dl’anvìa, as profiteran ëd vojàutri con dij discors fàit mach për ambrojé. La condan-a ‘d coj-lì, nopà, a l’era già stàita sentensià tant temp fà. L’esecussion dël castigh ch’a merito a tarderà pa: j'esecutor ëd la sentensa a deurmo nen!

⁴Përchè, se Nosgnor a l’ha nen risparmià j’àngej ch’a l’avìo pecà ma a l’ha campaje drit ant l’infern ancatenandje 'nt la pì granda scurità, për ess-je guernà fin-a ‘l Dì dël Giudissi; ⁵e se Nosgnor a l’ha nen risparmià ‘l mond antich, ma a l’ha pijà sot tùa Noé, banditor ëd giustissia, ansema a set d’àutri, cand che ‘n mond ch'a l'avìa gnun timor ëd Dé a l’é stàit fongà da ‘n diluvi^[1]; ⁶e s’a l’ha mandà an sënner le sità ‘d Sòdoma e ‘d Gomòra cand ch’a l’ha condanaje a la dëstrussion për esse d’esempi a le generassion perverse ch’a sarìo vnue^[2]; ⁷e s’a l’ha salvà Lòt^[3], n’òm giust ch’a l’era tant sagrinasse për la manera ‘d vive ‘d cola gent sensa prinsìpi^[4], ⁸(përchè cand ch’a vivìa an tra lor col òm a l’era tormentasse an soa ànima giusta për motiv dij crimen che cola gent a cometìo e che chiel a vëdìa e a sentìa di aprèss dì), ⁹s’a l’é parèj - e a l’é parèj -, anlora Nosgnor a sa bin coma liberé ij giust da soe preuve ‘d lor, e destiné^[5] j’ingiust al castigh cand ch’a vnirà ‘l Di dël Giudissi, dzortut coj ch’as lasso andé ai vëzzo dla carn e ch’a dëspresio Nosgnor^[6].

¹⁰Sfacià e malgrassios^[7] lor a l’han nen tëmma dë sbefié fin-a le creature pì gloriose. ¹¹Tutun, j’àngej, bin pì grand ëd lor an dignità e potensa, a s’ancalerio gnanca dë 'dnans a Nosgnor ëd mancheje 'd rispèt ëd la minima manera. ¹²Sti-sì, nopà, coma ‘d bestie sensa rason - creature ch’a seguito soa sensualità e ch’a son nà për esse pijà e massà - a capisso nen chi ch’a son coj ch’a-j parlo contra e a patiran la midema sòrt^[8] ch’a veulo për j’àutri, ¹³përchè ‘l mal ch’a-j ciaprà a l’é mach l’efet ëd sò malfé. Sta gent, ch’a-j pias tant lassesse andé ai vëzzo dla carn a la lus dël sol, cand ch’as amuso an vòste feste, a son mach ëd mace ‘d pàuta e d’element ëd corussion. ¹⁴Ij sò euj, sèmper pien d'adulteri, a chito mai 'd fé pecà; a 'nciarmo d'ànime balarin-e^[9]. A l'han ël cheur bin esercità 'nt l'anvìa. A l'é dla gent maléfica^[10]. ¹⁵Avend lassà la stra drita a son përdusse, përché a l'han seguità la stra 'd Balaam, fieul ëd Bòsor, ch'a l'avìa an testa mach co 'a l'avrìa podù vagné^[11] da n'ingiustissia.

¹⁶Chiel, nopà, a l'é stàit arprocià për sò malfé^[12]: a felo sté ciuto, col fòl d'un profeta, a l'é stàita na sòma muta ch'a l'era butasse a parlé con na vos uman-a^[13]. ¹⁷Sta gent a l'é coma na sorgiss sensa eva e 'd nivole possà dal vent e a l'é stàita destinà a l'abim dël top. ¹⁸Lor a 'nvertòjo tuti con ëd paròle ch'a smijo 'd granda sapiensa, ma ch'a son mach ëd paròle veuide ch'a servo për anciarmé con l'anvià dla carn e la dësbauciaria coj ch'a l'avìo da pòch separasse da coj ch'a vivo 'nt l'eror. ¹⁹Combin che costi fàuss magìster a-j promëtto libertà, lor istèss a son ës-ciav ëd l'inmoralità^[14], përchè cand che un a socomb a na còsa qualsëssia a na dventa s-ciav. ²⁰Përchè, apress d'esse scapà da la contaminassion ëd còst mond grassie a la conossensa bondosa 'd nòst Signor e Salvator Gesù Crist, as na lasso torna angavigné e a na son crasà tant che la condission ch'a n'arsulta a l'é pes che la prima. ²¹Përchè a sarìa stàit mej për lor ëd nen avèj conossù la via dla giustissia, che dòp d'avèjla conossua, volté le spale al sant comandament ch'a l'era staje dàit. ²²A l'é rivaje lòn ch'a dis ël proverbi midem: "Ël can a lé tornà a mangé lòn ch'a l'avìa gumità^[15]", e "La treuja, dòp ch'a l'avìo lavala, a l'é tornà a sbaciassesse 'nt la pàuta".

Nòte

1. Cfr. Génesi 6:1-7:24.
2. Cfr. Génesi 19:24.
3. Cfr. Génesi 19:1-16.
4. O “sensa lej”.
5. O “reservé”.
6. O “le autorità”.
7. O “superb”, “arogant”.
8. Let. "distrussion".
9. Nen ëstabil, nen ferm an soe convinsion.
10. Let. "fieuj 'd maledission".
11. O "ch' a amava" (ij sòld).
12. Let. "trasgression".
13. Cfr. Numer 22:4-35.
14. O "dla corussion".
15. Cfr. Proverbi 26:11.