La Bibia piemontèisa/Testament Neuv/Filipeis/Filipeis 3

←Filipèis 2

La Bibia piemontèisa Filipèis

Filipèis 4→

Filipèis

3

La Bìbia piemontèisa - Filipèis 3

Vera e fàussa giustissia

¹Dël rest, mè frej e mie seur, arlegreve 'nt ël Signor. Divlo torna a l'é nen un sagrin për mi e për voi av fà mach dël bin. ²Pijé guarda dai can^[1], pijé guarda dai cativ ovrié, pijé guarda da coj ch'a parlo tant ëd la sirconcision^[2], ³përchè i soma nojàutri la sirconcision, nojàutri ch'i rendoma a Nosgnor l'adorassion^[3] an Ëspìrit, ch'is arlegroma an Crist Gesù e ch'i foma nen afidament a la carn^[4], ⁴contut che mi i podrìa bin felo. Se cheidun a pensa 'd podèj fé afidament a 'd chërdensiaj uman-e^[5], mi i podrìa felo 'ncora 'd pì. ⁵An efet, a l'han sogetame a la sirconcision eut di da mia nassensa; i son n'Israelita pur-sangh ëd la tribù 'd Beniamin^[6], Giudé da Giudé. Al rësguard ëd la Lege i l'hai vivù coma 'n Farisé^[7]. ⁶Al rësguard ëd mè angagg për Nosgnor, i l'hai daje adòss^[8] a la cesa. Al rësguard ëd la giustissia che la Lege a pretend, i son ëstàit sensa rimpròcc. ⁷Nopà, da la prospetiva dël Crist, tut lon ch'i l'avrìa podù bin consideré coma 'n vantagi, n'atìv^[9], a l'é 'rvelasse mach na pèrdita, un passiv. ⁸Ancora pì 'd lòn, (ancheuj) i stimo che an confront ëd l'ecelensa^[10] 'd conòsse Gesù Crist, mè Signor, tut ël rest a sia na pèrdita. Për chiel i l'hai arnonsià a tut e a lo considero mach ëd drugia^[11] - e sossì përchè i peussa vagné 'l Crist, ⁹d’esse trovà 'n comunion con chiel, nen përchè mi i sia da consideré n'òm giust për motiv ëd mia osservansa dla Lege, ma përchè i l'hai arseivù la giustissia ch'a ven da la fidelità dël Crist^[12] - na giustissia nen mia, ma ch'a ven da Nosgnor e ch' as fonda an sla fidelità dël Crist.

¹⁰Mè propòsit^[13] a l'é 'd conòsse chiel, fé l'esperiensa dla potensa 'd soa arsurression, partessipé ai sò patiment e d’esse tanme chiel^[14] an soa mòrt, ¹¹e parèj, an na chèich manera, rivé a l'arsurression dai mòrt.

Tiré anans

¹²Nen ch'i sia già rivaje o ch' i sia già përfet, ma i vado anans për procuré 'd riveje e ciapé col premi tant coma mi i son ëstàit ciapà da Gesù Crist. ¹³Frej e seur, i penso nen d'avèjlo già ciapà col premi, ma, an dësmentiand lòn ch'a më stà daré, i tiro anans con determinassion. ¹⁴I son an corsa vers col traguard për ciapé 'l premi dla màssima vocassion ëd Nosgnor an Gesù Crist. ¹⁵A l'é për lòn che coj ch' an tra 'd noi a chërdo d'esse përfet a farìo bin d'aceté cost pont ëd vista. S' i pense divers, Nosgnor av arvelerà l'eror ch' i feve.

¹⁶Comsëssìa, al pont ch'i soma rivà, marcioma anans con l'istess andi^[15]. ¹⁷Procuré d'esse tùit ansema ij mè imitator^[16], frej e seur, e vardé con atension coj ch'a vivo^[17] conforma 'l model ch'i troveve an nojàutri, ¹⁸përchè, coma ch'i l'hai dive soens e adess iv diso torna con ëd lerme, a son tanti coj ch'a vivo da nemis ëd la cros dël Crist. ¹⁹La fin ëd coj-lì a sarà la përdission. A l'han për sò Dio la pansa. As vanto 'd lòn ch'a dovrìa pitòst esse soa onta e a penso mach a le còse dla tèra. ²⁰Nòstra sitadinansa, nopà, a l'é an cel e d' ansilà i spetoma 'dcò 'l Salvator: ël Signor Gesù Crist. ²¹Chiel a cambierà ‘l còrp ëd nòstra umiliassion e a lo rendrà conform a sò còrp glorios, për ël mojen ëd cola potensa che chiel a deuvra për sogetesse tute le còse.

Nòte

1. L'apòstol a ciama parèj coj ch'a mostro dotrin-e fàusse, ch'a son spòrch coma 'd can.
2. A la letera: "mutilassion".
3. O "ch'i servoma".
4. O "a credensial uman-e".
5. Lét. "a la carn".
6. Cfr. Roman 11:1.
7. Cfr. At 23:6; 26:5.
8. O "përseguità". Cfr. At 8:3; 22:4; 26:9-11.
9. O "un guadagn", "un vantagi".
10. ël valor pì àut, pì grand, màssim.
11. A la létera: "ëd merdaria", "arfud".
12. O "ëd la fej".
13. O "mè but".
14. O "d’esse rendù conforma Chiel".
15. O "tenomse a l'istess sentiment".
16. Cfr. 1 Corint 4:16; 11:1.
17. O "ch'a marcio".