La Bibia piemontèisa/Testament Vej/Ester/Ester 1

←Neemìa 13

La Bibia piemontèisa Ester

Ester 2→

Éster

La Bìbia piemontèisa - Ester 01

1

Ël rè a organisa un disné da spatuss

¹Al temp d'Assuer^[1] (ëd col Assuer ch'a regnava da l'India fin-a a l'Etiòpia ansima a sentevintessèt provinse), ²a col temp-là, coma che rè Assuer a l'era setà an sël tròno real, ant la sitadela 'd Susa^[2], ³ël ters ann^[3] ëd sò regn, a l'ha dàit un disné an onor ëd tùit ij sò grand ufissiaj e ij sërvent. L'armeja dij Persian e dij Médi e ij nòbij e governador ëd provinsa a l'ero dë 'dnans ëd chiel, ⁴mentre ch'a fasìa vëdde soe richesse e la glòria 'd sò regn e lë spatuss magnifich ëd soa grandëssa për vàire di, për senteotanta di.

⁵Passà ch'a l'ero coj di-lì, ël rè a l'ha dàit n'àutr disné 'd set di, ant la cort dël giardin ëd la regia, për tuta la gent ch'as trovava ant la sitadela 'd Susa, dal pì amportant al pì cit. ⁶A-i j'era ëd tendagi 'd tèila bianca e 'd porpra violëtta tacà për ëd cordon ëd damasch e 'd porpra rossa, lor midem pendù për d'anej d'argent e d'òr fissà dzora 'd colòne 'd marmo verd, ëd marmo bianch, ëd mareperla e 'd mosaich. ⁷Le beivande a l'ero servije ant ëd cope d'òr, tute diferente, e quantità 'd vin a l'ero smonùe dal rè con liberalità regal. ⁸Ël decret real a obligava gnun a bèive, avend prescrivù a tùit j'ufissiaj ëd soa ca che tùit a fusso tratà com a vorìo.

⁹La regina Vasti, da part soa, a l'avìa smonù un disné a le fomne ant ël palass real d'Assuer.

La regin-a Vasti a l'é gavà da soa posission regal

¹⁰Ël sétim di, butà an alegrìa pr' ël vin^[4], ël rè a l'ha comandaje a Meuman, a Bisetà, a Carbonà^[5], a Bigtà^[6], a Abagtà, a Zetar e a Carcas, ij sèt eunuch ch'a servìo a la presensa dël rè Assuer, ¹¹ch'a mnèisso 'dnans ëd chiel la regin-a Vasti con soa coron-a real^[7], për mostreje a la gent e ai cap soa blëssa: chila, an efet, a l'era piasosa a vëdd-se. ¹²Ma la regin-a Vasti a l'é arfudasse dë vnì, contravenend a l'òrdin che 'l rè a l'avìa daje a j'eunuch; ël rè a l'é anrabiasse motobin e la flin-a a l'é anviscasse drinta 'd chiel.

¹³Anlora chiel a l'é adressasse ai savant^[8] vërsà ant la siensa dla lege (përchè a l'era parèj che j'afé dël rè a l'ero tratà, an presensa 'd tuti coj ch'a në savìo dla siensa dla lege e dël drit)^[9]. ¹⁴A l'ha fàit vnì da chiel Carsenà, Setar, Admata, Tarsis, Mères, Marsenà e Memucan, sèt grand ufissiaj persian e medi ch'a j'era consentì 'd vëdde 'l visagi dël rè, e ch'a l'ero setà ant ij prim pòst dël ream.

¹⁵"Conforma a la lege," a l'ha dit, "lòn ch'a venta feje a la regin-a Vasti për nen avèj dit che 'd si al comand dël rè Assuer che j'eunuch a l'avìo trasmetuje?". ¹⁶An presenza dël rè e dij grand ufissiaj, Memucan a l'ha rëspondù: "A l'é nen mach contra dël rè che la regin-a a l'é portasse mal, ma 'dcò contra 'd tùit ij grand ufissiaj e tùit ij pòpoj spantià travers le provinse dël rè Assuer. ¹⁷La manera 'd fé dla regin-a a mancrà pa dë vnì a esse conossùa da tute le fomne, ch'a vardran ij sò marì con dëspresi. Ël rè Assuer midem, a podran dì, a l'avìa dije a la regin-a Vasti dë vnì da chiel, ma chila a l'ha pa vorsù ven-e. ¹⁸Da adess anans le prinsipësse 'd Persia e 'd Media ch'a savran ël fat ëd la regin-a a në parlëran con tùit ij prinsi dël rè e a në vniran ëd paròle brute e d'anrabiament sensa fin. ¹⁹S'a jë smija bin al rè, ch'a ven-a emanà da chiel n'edit real, da scrivse an tra le lege 'd Persia e 'd Media, përparèj ch'a ven-a esse pa revocàbil^[10], ch'a disa che Vasti a podrà pa pì comparì dë 'dnans al rè Assuer e che 'l rè a-j conferissa dignità 'd regin-a a un-a ch'a sia mej che chila. ²⁰Cand che l'edit dël rè a sarà conossù an tut sò regn për grand ch'a sia, tute le fomne a onoreran sò marì dal pì amportant al pì cit".

²¹Sòn a l'é piasuje al rè e ai sò prinsi. Ël rè a l'ha fàit coma ch'a l'avìa dije Memucan: ²²a l'ha mandà 'd litre a tute le provinse dël regn, a tute le provinse conforma soa manera dë scrive e a tùit ij pòpoj conform a soa lenga; përchè tùit ij marì ch'a fusso padron a ca soa a podèisso parlé com a vorìo.

Nòte

1. A l'é 'dcò conossù coma Serse (486-465 a. C.). Assuer a l'é 'l rè persian mensionà in Esdra 4:6. A l'é conossù pr' avèj consolidà l'imperi 'd Dario, sò pare, për soe grande fabriche e për soa guèra contra ij Grech da 'l 480-470 a. C.
2. O “Susa la capital”, una dle tre capitaj persian-e e residensa d'invern dël rè.
3. 483 a. C.
4. Cfr. 2 Samuel 13:28.
5. Cfr. Cap. 7:9.
6. Cfr. Cap. 2:21; 6:2.
7. Cfr. Cap. 2:17; 6:8.
8. Cfr. Geremìa 10:7; Daniel 2:12; Maté 2:1.
9. Cfr. 1 Crònache 12:32.
10. La permanensa e 'l caràter nen révocabil ëd le lege 'd Persia e 'd Media a sia proverbial.