La Bibia piemontèisa/Testament Vej/Esdra/Esdra 4

←Esdra 3

La Bibia piemontèisa Esdra

Esdra 5→

Esdra

Pàgina arvëdùa da Majo Galin-a

4

Oposission ai travaj d’arcostrussion

¹Dël moment che ij nemis ëd Giuda e 'd Beniamin a son vnùit a savèj che coj ch’a l'ero stàit esilià e peui torna lassà torné an patria, a l’avìo dàit man a arcostruve 'l templ për Nosgnor Dé d'Israel, ²lor, ij nemis, a son presentasse a Zorobabel  e ai capfamija e a l'han dije: Ëdcò nojàutri i voroma giuteve a costrùe ansema a voì, përchè 'dcò noi, parèj ëd vojàutri i pregoma vòst Dé e i l'oma smonuje ‘d sacrifissi fin-a dal temp che Esaradon, rè d'Assiria, a l'ha fane trasferì ambelessì. ³Ma Zorobabel, Jessua e j'àutri cap ëd famija d'Israel a l'han dije: “L’arcostrussion dël templ ëd nòst Dé a l’é pa na facenda ch’av riguarda. A l’é mach a nojàutri ch’a l’é stane dàit da rè Ciro ‘d Persia la comission ëd fabriché na ca për Nosgnor, Dé d’Israel”. ⁴Antlora la gent dël pòst a l'ha ancaminasse a dëscoragé 'l pòpol ëd Giuda e a deje fastudi për nen lasselo buté an pé cola fàbrica. ⁵Nen mach, ma a l'han fin-a corompù contra 'd lor quàiche fonsionari për mandé a falita ij sò proget: sòn a l’é durà për tut ël temp ëd Rè Ciro 'd Persia, fin-a al regn ëd Rè Dario ëd Persia.

Na plenta a l’é presentà contra ij Giudé

⁶Al prënsipi dël regn d'Assuer, ij nemis dij Giudé a l'han presentà n'acusassion contra dla gent ëd Giuda a Gerusalem. ⁷Peui ant ël temp ëd rè Artaserse: Bislam, Mitridate, Tabel, e d'àutri colega 'd lor a l'han scrivuje a Rè Artaserse 'd Persia. Ël test dël document a l'era an caràter aramàich e scrivù an Aramàich e parèj a l’han fane la tradussion për ël rè.  [Lòn che a séguita a sarìa an Aramàich]. ⁸Recum cancelié e Simsai  lë scriba a l'han scrivù na litra a rè Artaserse contra 'd Gerusalem, an costa manera: ⁹“Da Recum cancelié e Simsai scriba e la rimanensa dj'asocià, ij giùdess, ij legà, j'ispetor persian, ij funsionari, la gent trasferìa  da Uruch, cola da Babilònia, da Susa, visadì^[1] j'Elamita, ¹⁰e j'àutre gent che 'l grand e glorios Assurbanipal^[2] a l'avìa faje traferì ant le sità dla Samaria^[3] e an d'àutri pòst dël pais dë dlà dël Fium Eufrate e peui ancora”. ¹¹Costì a l' é 'l translà dla litra ch'a l'han scrivùje a Artaserse.

“A rè Artaserse, ij tò servitor, la gent ëd là dël Fium. ¹²Ël rè a dovrìa savèj che la gent ch’a l'é montà da chiel anvers nojàutri, a son vnùit ambelessì e a tiro sù torna la sità ‘d Gerusalem, na sità grama e arvirosa, e a pòso le fondamenta restaurà  dle muraje. ¹³Che 'l rè a sàpia donca che se sta sità a l' é restaurà e soe muraje as drisso torna, lor a pagheran pa pì tribut, nì cotis, nì taja 'd passage e che 'l tesòr real a l'avrà da patìne. ¹⁴Ore, da già che nojàutri i soma ij tò soget fedej^[4] e a në smija pa bel vëdde 'l rè dëspresià, për lòn i-j mandoma coste anformassion. ¹⁵Ch’as faso d'arsërche ant ël Lìber ëd le Memòrie dij tò grand; e ti 't podras vëdde andrinta a col lìber che costa sità a l'é na sità arvirosa, e che a pòrta pregiudìssi ai rè  e a le provìnse, e che an tùit ij temp antich a l'han sempe fàit ëd sedission. A l'é për lòn che sta sità a l'é stàita dësblà. ¹⁶Nojàutri i-j foma savèj donch al Rè che, se costa sità a l'é torna butà ‘n pé e soe muraje rëstaurà, la part dij sò stat ch’a l'é dë dlà dël fium, a-i é l’arzigh ch’a sarà pa pì la soa".

¹⁷Alora ‘l rè a l'ha mandaje costa réplica: “Al magìster cancelié Recum, a lë scrivan Simsai e a la rimanensa  dla gent ch'a stà an Samaria, nen mach, ma 'dcò la resta 'd coj dl'àutra banda dël Fium, pas! Al present, ¹⁸la litra che vojàutri i l'eve mandane, a l'é stàita voltà e lesùa dëdnans ëd mi. ¹⁹L'hai comandà 'd fé d'arsërche; e a l'é trovasse che përdabon ant ij temp d'antan, costa sità a l'era dasse a la sedission e a l'arvira, solevàndse contra ij rè. ²⁰E 'd rè potent, a l'ero già stàine a Gerusalem, che a l'avìo comandà dzora a tut lòn che a l'é dë dlà dël Fium, e a-i j'era chi a-j pagava tribùt, taje e dirit ëd passage. ²¹Ëd conseguensa, comandè 'd fé chité ij travaj 'd costa gent, e che costa sità a sia pa drissà, fin-a che l'órdin a riva da mi. ²²E pijeve vàrdia 'd trascuré sòn: për tëmma che 'l mal a peussa aumenté a pregiudisse dël rè”.

²³Anlora, cand la còpia dla litra 'd re Artaserse a l'era stàita lesùa dëdnans ëd Recum e 'l sechërtari Simsai, e ij sò colega, lor a son andàit an pressa a Gerusalem dai Giudé, e con man fòrta a l'han faje chité ij travaj. ²⁴A l’é parèj che a l'é chitasse 'l travaj dla ca 'd Nosgnor ch'a stà a Gerusalem, e 'dcò la fàbrica a l'é fërmasse fin-a ant lë scond ann dël regn ëd Dario, rè 'd Persia.

Nòte

1. Për ël Qere dël TM (דֶּהָיֵא, dehaieʾ, a saria un nòm pròpi) ma a smijerìa mej tnì ël Chetib: דִּהוּא (dihuʾ, “a l'é sòn, valadì, visadì”). Vëdde F. Rosenthal, Grammar, 25, §35; E. Vogt, Lexicon linguae aramaicae, 36.
2. An aramàich: Osnapar.
3. La translassion a l'é con ël plural ëd le version antiche בְּקֻרְיַהּ (bquriah, “ant le sità”) pitòst che 'l singular (“ant la sità”) dël TM.
4. Lét. “noi i mangioma la sal dël palass”.