La Bibia piemontèisa/Testament Neuv/Gioann/Gioann 19

←Gioann 18

La Bibia piemontèisa Gioann

Gioann 20→

La Bìbia piemontèisa - Gioann 19

Gioann

19

Pilat a tenta 'd lassé andé Gesù

¹Anlora Pilat a l'ha fàit bate a sangh Gesù con dë stafilà. ²Peui, ëd soldà a l'han fasse na coron-a dë spin-e, a l'han butajla an sla testa e a l'han campaje adòss un mantel ross pórpra ³e a-j disìo: "Salve, rè dij Giudé!", e a-j dasìo adòss con ëd vërghe.

⁴Pilat a l'é torna surtì e a-j dis a la gent: "Vardé, iv lo men-o fòra për ch'i sapie ch'i trovo nen da deje la colpa a st'òm-sì". ⁵Gesù, donch, a l'é surtì ch'a portava la coron-a dë spin-e e 'l mantel ëd pórpra. Pilat a l'ha dije: "Vardé sì l'òm!". ⁶Ma cand ij sacerdòt prinsipaj e ij sò servitor ëd lor a l'han vëddulo, a l'han comensà a crijé: "Butelo an cros! Butelo an cros!". Pilat a-j dis: "Pijevlo e butelo an cros vojàutri, përchè i trovo nen a col òm da deje la colpa. ⁷Ij cap dij Giudé a l'han replicà: "Nojàutri i l'oma na lege, e conform a cola lege-là, col òm a l'ha da meuire përchè a l'é fasse Fieul ëd Nosgnor".

⁸Cand che Pilat a l'ha sentì lòn, a l'é stàne ancora pì sburdì. ⁹A l'é torna intrà ant ël pretòri e a l'ha dit a Gesù: "Da 'ndoa ses-to?". Contut, Gesù a l'ha daje gnun-a rispòsta. ¹⁰Anlora Pilat a l'ha dije: "Veus-to nen parleme? Sas-to nen ch'i l'hai 'l podèj ëd fete buté 'n cros e 'l podèj ëd liberete?". ¹¹Gesù a-j rëspond: "It l'avrìes gnun podèj sù 'd mi, s'at fussa nen dàit da dzora; për conseguensa, col ch'a l'ha dame an man a ti, a l'ha fàit un pecà 'ncora pì gròss".

¹²Da col moment Pilat a sërcava la manera 'd liberelo, ma ij cap dij Giudé a crijavo: "S'it mandes lìber col òm, as peudrà pì nen disse ch'it ses n'amis ëd César, l'imperator, përchè chionque ch'as fà rè a va contra dl'imperator". ¹³Cand che Pilat a l'ha sentì lòn, a l'ha mnà fòra Gesù, a l'é setasse an sla cadrega giudissiaria, ant ël leugh ch'as ciama "La stërnìa" (an ebràich: Gabbatà). ⁴A l'era 'l di dla Preparassion ëd la Pasca, apopré mesdì, e Pilat a-j dis a la gent: "Vardé, vòstr rè a l'é 'mbelessì!".

⁵Ma a son butasse a crijé: "Vìa, vìa, butelo 'n cros!". Pilat a l'ha dije: "È-lo ch'i l'hai da buté 'n cros vòst rè?". Ij prinsipaj sacerdòt a l'han rësponduje: "I l'oma gnun d'àutr rè fòra che César!". ¹⁶Anlora donca a l'ha dajlo ant le man përchè a fussa butà 'n cros. A l'han donca pijà Gesù e a l'han ëmnalo vìa.

Gesù a l’é butà 'n cros

¹⁷Le guardie, anlora, a l'han pijà Gesù e a l'han falo andé fòra dla sità obligadlo a porté la cros an sle spale; a son rivà an sël pòst che a l'é dìt "Testa 'd mòrt", che an ebràich as dìs Gòlgota; ¹⁸e a l'han anciodalo a la cros. Con chiel a l'han butane an cros d'àutri doi, un da na part e l'àutr da l'àutra. Gesù a l'era an mes. ¹⁹Pilat a l'ha scrivù 'l cartel e a l'ha fàjlo buté an sla cros. A-i era scrìt: "Gesù 'd Nazareth, ël re dij Giudé". ²⁰Tanti a l'han lesù 'l cartel, përchè 'l pòst andova ch'a l'avìo butà an cros Gesù a l'era aranda 'd Gerusalem, e 'l cartel a l'era scrit an tre lenghe: an ebràich, an latin e an grech. ²¹A l'è për lòn che ij cap dij sacerdòt a l'han dije a Pilat: "Scriv nen: ël re dij Giudé; scriv che chiel a l'é disse: Mi i son ël re dij Giudé". ²²Ma Pilàt a l'ha responduje: "Adess basta! Lòn che i l'hai ëscrivù, i l'hai ëscrivù!".

²³Ij soldà che a l'avìo butà an cros Gesù a son pijasse soa tùnica, che a l'era tëssùa d'un toch sol da 'n ponta an fond, ²⁴e a l'han dìt: "Fasomla nen a tòch!". Parej a l'é compisse la paròla dla Scritura ch' a dis: "A son dividusse ij mè vestì e a son tirasse a sòrt mia tùnica^[1]"'.

²⁵Mentre ij soldà a s'antërtnio an coste còse, dacant a la cros a-i ero dontré fomne: la mare 'd Gesù, soa sorela Maria 'd Cleofa, e Maria 'd Màgdala. ²⁶Gesù a l'ha vëddù soa mare e davzin a chila 'l dissépol che chiel a-j vorìa bin e a dis a soa mare: "Fomna, da adess anans col-lì a sarà tò fieul!". ²⁷Peui a l'ha dije al dissépol: "Varda, cola-lì da adess anans a sarà toa mare!". Da col moment ël dissépol a l'é pijass-la con chiel antëcà.

La mòrt ëd Gesù

²⁸Apress ëd lòn, Gesù, savend che già tut a l'era stàit completà, përchè la Scritura a fussa compìa^[2] a dis: "I l'hai sèj". ²⁹A-i era là 'n vas pien d'asil; a l'han fissà a la ponta 'd na pertia na sponga mojà 'd col asil e a l'han sporzùjla a la boca. ³⁰Cand che Gesù a l'ha pijà l'asil, a dis: "Tut a l'é compì" e, bassand la testa, a l'é spirà^[3].

³¹A l'era 'l dì dla Preparassion e ij cap dij Giudé a vorìo nen ch'ij còrp a stèisso an sle cros ant ël dì ch'a vnisìa e ch'a l'era 'n dì 'd saba (e un saba motobin ëspecial, përchè a l'era la Pasca). Anlora a l'han ciamaje a Pilàt ëd feje meuire pì an pressa an ordinand ch'a-j rompèisso le gambe. Anlora ij còrp a l'avrìo podu esse levà da le cros. ³²Ij soldà, donch, a son ëvnù e a l'han rompù le gambe al prim, e peui a l'àutr, ch'a l'era stàit butà an cros ansem a chiel. ³³A son peui rivà a Gesù, ma a l'han vëddù ch'a l'era già mòrt, e a l'han pì nen s-ciapaje le gambe.

³⁴Contut, un dij soldà a l'ha përtusaje 'l fianch con na lansa, e sùbit a l'é surtìne 'd sangh e d'eva. ³⁵Col ch'a l'ha vëddù lòn a në rend testimoniansa, e soa testimoniansa a l'é degna 'd fiusa. Col-là a sa ch'a dis la vrità, përch' i peusse chërdje 'dcò vojàutri. ³⁶An efet, tut sòn a l'é rivà përchè a l'avìa da compisse lòn ch'a dis la Scritura: "Gnanca un dij sò òss a sarà rompù^[4]", ³⁷e 'ncora n'àutr leugh ëd la Scritura, ch'a dis: "A vëdran col ch'a l'han përtusà^[5]".

La seportura 'd Gesù

³⁸Ora, apress dë ste còse, Giusèp d'Arimatea, ch'a l'era dissépol ëd Gesù, ma an secret përchè a l'avìa tëmma dij cap dij Giudé, a l'ha pregà Pilat ch'a-j dèissa licensa 'd levé 'l còrp ëd Gesù. Dòp d'avèjne arseivù l'autorisassion da Pilat, a l'é vnu e a l'ha pijà 'l còrp ëd Gesù. ³⁹Nicodemo 'dcò, col ch'a l'era vnù a trové Gesù 'd neuit^[6], a l'é vnuje an portant na mës-ciora 'd mira e d'àloe ch'a peisava apopré sent libre. ⁴⁰A l'han pijà 'l còrp ëd Gesù e a l'han anvlupalo ant un linseul, ansema a dë spessie aromàtiche, tal coma ch'a l'é costuma 'd sotré ij mòrt an tra ij Giudé.

⁴¹Ora, ant ël pòst andoa ch'a l'era stàit butà 'n cros, a-i era 'n giardin, e ant ël giardin a-i era na tomba neuva andoa ch'a-i era ancora staie gnun. ⁴²E përchè a l'era 'l dì dla Preparassion dij Giudé, a l'han butaje lì Gesù përchè a l'era la tomba la pì davzin-a ch'a l'avèisso trovà.

Nòte

1. Cfr. Salm 22:18.
2. Cfr. Salm 69:21; 22:15.
3. O "a l'ha rendù l'ànima".
4. Cfr. Surtìa 12:46; Nùmer 9:12; Salm 34:20.
5. Cfr. Sacarìa 12:10; Arvelassion 1:7.
6. Cfr. Gioann 3:1-2.