La Bibia piemontèisa/Testament Neuv/Giaco/Giaco 1

←Ebreo 13

La Bibia piemontèisa Litra 'd Giaco

Giaco 2→

La Bìbia piemontèisa - Giaco 01

Giaco

1

Salut

¹Giaco, sërvent ëd Dé e 'd Gesù Crist, a saluta le dódes tribù dësbergiairà për ël mond^[1].

Preuve e tentassion

²Mè frej e seur, considerelo nen d'àutr che 'd gòj cand ch'av càpita 'd tombé 'nt ògni sòrt ëd preuve, ³savend che la preuva 'd vòstra fede a fà chërse la passiensa^[2]. ⁴Contut, lassé che la passiensa a chërsa, përchè, cand ch'a sarà dël tut dësvlupà i sareve përfet e compì, ëd manera ch'av mancherà gnente.

⁵Se cheidun ëd vojàutri a manca 'd saviëssa, ch'a la ciama a Nosgnor, e chiel, ch'a l'é generos cand ch'a fà 'd don, a-j lo darà sensa arproceje nen. ⁶Contut, ch'a la ciama con fiusa, sensa avèj ëd dubi; përchè col ch'a dubita a l'é parèj ëd n'onda dël mar, agità dal vent e campà dëdsà e dëdlà. ⁷Na përson-a parèj ch'a së speta nen d'arsèive cheicòsa da Nosgnor ⁸përchè a l'ha 'l cheur divis^[3], a l'é volùbil^[4] an tut lòn ch'as buta a fé.

⁹Ij frej cristian^[5] ëd bassa condission ch'as na vanto, përchè Nosgnor a l'ha esaltaje, ¹⁰e coj ëd posission elevà ch'as vanto mach ëd lòn che Nosgnor a l'ha sbassaje. Vera, jë sgnor a vniran passì coma le fior dij pra. ¹¹Cand ch'a seurt ël sol, sò calor a fà sëcché la pianta, ij làver ëd le fior a tombo e soa blëssa a va a perdse^[6]. Parèj jë sgnor, con tuta soa blaga^[7], a perdran tut lòn ch'a l'han^[8].

¹²Nosgnor a benediss coj ch'a soporto con passiensa 'd preuve e 'd tentassion. Apress, cand ch'a l'avran passaje, a arseivran la coron-a 'd vita che Nosgnor a l'ha promëttù a coj ch'a-j veulo bin. ¹³Che gnun, cand ch'a l'é provà, a disa: "A l'é Nosgnor ch'am tenta", përchè Nosgnor a l'ha gnun-e tentassion ëd fé 'l mal, e chiel medésim a tenta gnun. ¹⁴Mincadun a l'é tentà mach dai sò desideri, ch'a lo tiro e a lo anciarmo. ¹⁵Apress, costi desideri, cand ch'a son concepì, a fan nasse 'l pecà, e 'l pecà, cand ch'a l'é chërsù an tuta soa fòrsa, a l'é bele pront a massene e dabon a l'ha 'l podèj ëd felo^[9].

¹⁶Pijé nen 'n bàilo, mè car frej e seur. ¹⁷Tut lòn ch'arseivoma 'd bon^[10] e minca don përfet, a ven da l'àut, a cala giù dal Pare dij lum. An chiel a-i é gnun-a variassion nì d'ombra 'd cambiament. ¹⁸A l'é chiel ch'a l'ha decidù 'd dene na vita neuva^[11] për ël mojen ëd la Paròla dla vrità, përchè i fusso tanme le primissie 'd soe creature.

Un mëssagi da vive

¹⁹Pro ch'i lo sapie, mè car frej e seur, che tuti a sio pront a scoté, contut meusi a parlé e a anrabiesse. ²⁰Përchè coj ch'as anrabio, a adempisso nen la giustissia 'd Nosgnor. ²¹A l'é për lòn ch'i l'eve da bandoné tùit ij comportament dësconvenient e ògni sòrt ëd mal.

Arsèive con umiltà^[12] la Paròla piantà an vojàutri, ch'a l'ha 'l podèj ëd salvé vòstre ànime. ²²Buté an pràtica la Paròla; a l'é nen pro dë stela a sente, përchè iv pijerie mach an bàilo da voi midem. ²³Përché se cheidun a la sent mach la Paròla e a la buta nen an pràtica, a l'é parèj 'd col-lì ch'as varda 'nt lë specc për fesse bel ²⁴ma peui as na va dësmentiand-se 'd lòn ch'a l'ha vëddù. ²⁵A l'opòst, col ch'a varda con atension la lege përfeta dla libertà, e ch'a l'é nen un ch'a sent e peui ch'as dësmentia lòn ch'a l'ha sentù^[13], ma ch'as aplica a l'euvra^[14], col-lì a sarà bin content d'avèjla compìa.

²⁶Se cheidun ëd vojàutri a chërd d'esse religios, ma a sà nen dominè soa lenga^[15] (coma s'a fussa 'n caval con le rëdne), e ch'as na lassa tiré dëdsà e dëdlà^[16], la religion ëd col-lì a l'é veuida. ²⁷La religion pura e sensa macia anvers ëd Nosgnor, nòst Pare, a l'é 'd giuté j'orfanin e le vìdoe cand ch'a l'han dabzogn e vardesse da la malissia dël mond.

Nòte

1. Cfr. Maté 13:55; March 6:3; At 15:13; Galat 1:19.
2. L'abilità d'arziste.
3. O "d'ànim dobi", "a stà 'n pò da sì e 'n pò da là", un pò a chërd e 'n pò a chërd nen".
4. Variabil, nen stabil, nen ferm.
5. O “ij frèj”.
6. Cfr. Isaìa 40:6-7.
7. O "con tute soe imprèise".
8. O "a vniran pasì".
9. O "a fan nasse la mòrt".
10. O "tut ël bin ch'a n'é dàit".
11. Vita spiritual, o "generene".
12. O "con dosseur".
13. O "sensa memòria".
14. O "ch'a la buta an pràtica".
15. O "ch'a sa nen ten-e la lenga a pòst"
16. O "lassand-se seduve".