La Bibia piemontèisa/Testament Neuv/Corint/1Corint 3

←1 Corint 2

La Bibia piemontèisa Litre ai Corint

1 Corint 4→

La Bìbia piemontèisa - 1 Corint 3

1 Corint

3

Colaborator ëd Nosgnor

¹Car ij mè frej e seur, i l’hai nen podù parleve coma a dë “spirituaj”^[1] ma coma a 'd gent carnal^[2] visadì coma a 'd masnà an Crist. ²I l’hai dave 'd làit da bèive, e nen ëd mangé sòlid^[3], dësnò i l’avrìe pa podù digerilo. An efet, ëdcò adess i lo peule ancora nen, ³përchè ch’a l’é ancora vòstra natura carnal ch’a la fà da padron an vojàutri. Le gelosìe ch’a-i son an tra 'd voi e le polémiche ch’i feve, a son la preuva ciàira che ancora i seve sogèt al domini dla carn e ch’iv comporte ancora coma ch’a fà la gent d’ës mond. ⁴É-lo nen vera che cand che un a dis: “Mi i vado dapress a Pàul!”, e n’àutr a dis: “Mi, nompà, i vado dapress a Apollo^[4]!”, i dvente la preuva d’esse carnaj? ⁵Còsa ch’a l’é mai Apollo? Còsa ch’a l’é mai Pàul? A son mach ëd servitor^[5] che për sò mojen i seve ancaminave a chërde, conform ai don che Nosgnor a l’ha dàit a ognidun. ⁶Mi i l’hai piantà^[6], Apollo a l’ha bagnà, ma a l’é Nosgnor ch’a fà chërse. ⁷A l’ha gnun-a importansa chi ch’a sìa col ch’a pianta o col ch’a bagna. Lòn ch’a l’è 'd pèis a l’é che Nosgnor a fassa chërse la smens. ⁸Col ch’a pianta e col ch’a bagna a travajo ansema con l’istess propòsit, e tùit e doi a saran arcompensà për ël travaj ch’a l’han fàit.

⁹Nojàutri i soma 'd colaborator ëd Nosgnor e vojàutri i seve soa coltivassion. I podria bin ëdcò paragoneve a n’edifissi, l’edifissi ‘d Nosgnor. ¹⁰Mi, coma ‘n costrutor dësprucà^[7], con la grassia che Nosgnor a l’ha dame, i l’hai posà le fondassion, e n’àutr a-i fàbrica ansima; ma ciaschëdun ch’a fasa bin atension a coma a-i fàbrica! ¹¹Përchè gnun a peul posé na fondassion diversa da cola ch’a l’é già stàita posà, ch’a l’é Gesù Crist. ¹²Dzura 'd costa fondassion as peul fabrichesse con na granda varietà 'd materiaj, con d’òr, con d’argent, con ëd pere pressiose, ma ‘dcò con ëd bòsch, ëd fen, ëd paja. ¹³Contut, ant ël Di dël Giudissi, a sarà ‘l feu ch’a arvelërà la qualità dël travaj ch’a l’ha fàit minca un costrutor. A sarà 'l feu ch’a sarà la preuva 'd resistensa dël valor ëd minca n’euvra. ¹⁴Se l’euvra a resist, col ch’a l’ha fabricala a n’arseivrà l’arcompensa; ¹⁵ma se l’euvra 'd cheidun a brusa giù, a sarà ‘l costrutor medésim ch’a na patirà la pèrdita. Ël costrutor a sarà bin salvà, ma coma un che a mala pen-a a l’é scapà dal feu.

¹⁶Sevene pa che vojàutri i seve 'l templi 'd Nosgnor e che lë Spìrit ëd Nosgnor a l’ha fàit ëd vojàutri soa abitassion^[8]? ¹⁷Se cheidun a dësbela 'l templi 'd Nosgnor, a sarà Nosgnor a la fin col ch’a dësblerà col-lì, përchè 'l templi 'd Nosgnor a l’é sant, e vojàutri i seve sto templi.

¹⁸Chité d’ambrojeve da voi midem! Se cheidun ëd voi a chërd d’esse savi conform ai criteri dë sto mond-sì, për rivé a esse savi për dabon a l’ha da manca 'd dventé 'n fòl^[9]. ¹⁹Përchè la saviëssa d’ës mond për Nosgnor a l’é ‘d folairà^[10]. Coma ch’a dis la Scritura: “Nosgnor a ciapa ij savi con la tràpola dl’istessa soa astussia 'd lor^[11]”, ²⁰e ancora: “Nosgnor a conòss ij pensé ch’a l’han an testa 'ij savi', e a sà che coj pensé-lì a l’han gnun valor^[12]”. ²¹Che gnun, donca, as daga ‘d blaga d’andeje dapress a d’òm coma s’a fusso chissà chi, përchè tut a l’é 'd vojàutri - ²²ch’a sìa Pàul, o Apollo, o Pero, o 'l mond, o la vita e la mòrt, ël present e l’avnì. Tùt a l’é 'd vojàutri, ²³ma vojàutri i seve dël Crist, e ‘l Crist a l’é 'd Nosgnor Dé.

Nòte

1. O “gent ch’a l’àbia arseivù lë spirit ëd Nosgnor  ”.
2. O “gent ancora tacà a sto mond-sì”.
3. O “ëd carn”. Cfr. Ebréo 5:12-13.
4. Cfr. 1 Corint 1:12.
5. O “minister”
6. Cfr. At 18:4-11.
7. O “architet”.
8. Cfr. 1 Corint 6:19; 2 Corint 6:16.
9. O “gnorant”.
10. O “sensa sens”.
11. Cfr. Giòb 5:13.
12. Cfr. Salm 94:11.