La Bibia piemontèisa/Testament Neuv/Corint/1Corint 2

←1 Corint 1

La Bibia piemontèisa Litre ai Corint

1 Corint 3→

La Bìbia piemontèisa - 1 Corint 2

1 Corint

2

L’anunsi ch'a riguarda Gesù Crist butà an cros

¹A l’é për lòn, car ij mè frej e seur, che cand ch’i son ëvnù da vojàutri i l’hai nunsiave la testimoniansa^[1]'d Nosgnor sensa fé mostra d’oratòria o 'd sapiensa uman-a. ²Mentre ch’i j’ero an mes a voi, i l’hai proponume 'd lassé da banda tut^[2] meno che Gesù Crist e chiel butà an cros. ³I son ëvnùit a troveve coma n’òm débol, tëmros, fin-a tërmolant^[3]. ⁴Cand ch'iv parlava e predicava, i lo fasìa nen con un lengage mirà a feve impression^[4], col ch’a l’é tipich dij savant ëd cost mond^[5], ma con la potensa persuasiva dlë Spirit, ⁵e lolì përchè vòstra fede a fussa nen fondà an sla sapiensa uman-a, ma an sla potensa 'd Nosgnor.

La sapiensa ‘d Nosgnor

⁶An efet, a coj ch’a son ëd chërdent madur, na sapiensa i l'ha bin proponujla, ma a l’é nen na sapiensa ch’a sia dë sto mond-sì e 'd coj che ambelessì a la fan da padron^[6] (che ancheuj a-i son e doman a saran dësmentià^[7]). ⁷Nò, la sapiensa ch’i na parloma a l’é la sapiensa ‘d Nosgnor, stërmà ant ij sò propòsit etern^[8], cola che chiel a l’avìa destinà, fin da dnans dij sécoj, a esse nòstra glòria. ⁸Contut, ij dominator dë sto mond-sì^[9] a l’han nen capila; përchè s’a l’avèisso capila, a l’avrìo nen butà an cros ël Signor ëd la glòria. ⁹Ma, coma ch’a dis la Scritura^[10]: “A son ëd còse che l’euj a l’ha mai vëdduje, che l’orije a l’ha mai sentije, e ch’a son mai montà dal cheur dj’uman. Cole-lì a son cole che Nosgnor a l’ha prontaje për coj ch’a-j veulo bin”. ¹⁰A l’é a nòjàutri che adess Nosgnor a l’ha arvelaje për ël mojen ëd lë Spirit, përchè ch’a l’é lë Spirit ch’a intra ant le përfondità 'd tute le còse, fin-a ant le còse ancreuse 'd Nosgnor. ¹¹Gnun a peul conòsse ij pensé 'd na përson-a fòra che sò spirit midem; e gnun a peul conòsse ij pensé ‘d Nosgnor, fòra che lë Spìrit midem ëd Nosgnor. ¹²Nojàutri i l’oma pa nen arseivù lë spirit dë sto mond-sì, ma lë Spìrit ch’a ven da Nosgnor, e lolì pròpi përchè nojàutri i peuda conòsse le còse che la grassia ‘d Nosgnor a l’ha dane.

¹³Cand ch’i parloma dë ste còse-sì, i dovroma nen ëd paròle^[11] ch’a ven-o da la sapiensa uman-a, ma cole ch’i l’oma amprenduje da lë Spìrit. A l’é parèj che për dëspieghé 'd verità spirituaj i dovroma le paròle^[12] che lë Spìrit a l’ha mostrane^[13]. ¹⁴Coj ch’a l’han nen arseivù lë Spìrit ëd Nosgnor^[14] a peudo nen comprende le còse ch’a ven-o da chiel; a jë smijo ‘d ròbe sensa sens^[15]. A peudo nen comprendje përchè ch’a l’han da esse giudicà ‘d manera spiritual. ¹⁵A l’opòst, coj ch’a l’han arseivù lë Spìrit ëd Nosgnor^[16] a peudo giudiché^[17] 'd tut, mentre che lor a-j giudica gnun^[18] coma ch’as deuvrìa. ¹⁶An efet, chi é-lo ch’a podrìa conòsse coma ch’as deuv ël pensé 'd Nosgnor, chi mai podrìa-lo mostreje^[19]? Nojàutri i comprendoma ste ròbe-sì përchè ch’i l’oma l'antendiment^[20] dël Crist.

Nòte

1. O “misteri”.
2. O “ëd nen conòsse àutr che”, “ëd parleve mach ëd Gesù Crist e lassé fòra tut ël rest”.   
3. Cfr. At 18:9.
4. O “persuasiv”.
5. O “dla sapiensa uman-a”.
6. Let “ij prinsi dë sto mond”.
7. O “anientà”.
8. O “misteri”.
9. O “ij prinsi ‘d cost sécol”.
10. Cfr. Isaia 64:4.
11. O “ël gergon”.  
12. O “Ij tèrmin”
13. As podrìa ‘dcò volté: “I dovroma ‘d paròle spirituaj për coj ch’a son ëspirituaj” (për coj che le Spirit Sant a l’ha rigenerà i dovroma ‘d paròle che mach lor a san lòn ch’a veulo dì”.  
14. Ës termin (ψυχικός) a peul voltesse an tante manere: “l’òm animal”, “l’òm dla tèra”, “l’òm natural”, “lòm ch’a le nen ëspiritual”, “coj ch’a son nen ëd chërdent”, “coj ch’a l’han nen arseivù lë Spirit ëd Nosgnor”, “Coj ch’a l’han mach la mentalità dë sto mond”. “coj ch’a rason-o conform ai criteri dë sto mond”.   
15. O “ëd folairà”.
16. Ël tèrmin πνευματικός a peul voltesse: “l’om ëspiritual”, “chi ch’a l’ha ‘d disserniment ëspiritual”.   
17. O “valuté”, “dé na valutassion”.
18. A l’é malfé, për coj ch’a son dë sto mond, ëd comprende coj ch’a l’han arseivù lë Spurit ëd Nosgnor përchè ch’a l’han n’àutra mentalità.
19. Cfr. Isaia 40:13.
20. O "la ment".