La Bibia piemontèisa/Testament Neuv/Corint/1Corint 6

←1 Corint 5

La Bibia piemontèisa Litre ai Corint

1 Corint 7→

La Bìbia piemontèisa - 1 Corint 6

1 Corint

6

Le denunsie giudissiarie an tra ij cristian

¹Com a l’é possìbil che an tra 'd vojàutri a-i sia cheidun che, cand ch’a l’ha na plenta contra n’àutr, a s’ancala a fé arcors a 'n tribunal dij pagan^[1] e pa nen ai mèmber dël pòpol sant^[2]? ²I seve nen ch’a sarà 'l pòpol sant a giudiché ‘l mond? Ora, se 'l mond a l’ha da esse giudicà da vojàutri, cole-lì a son pròpi còse bin cite d’arsolve! ³I seve nen ch’i giudicheroma fin-a tuti j’àngej? Parèj, i podrìe arsòlve le beghe dë sta vita an tra 'd vojàutri. ⁴Se donca i l’eve 'd beghe da arsòlve, pijé për giùdes coj ch’a son ij men-o considerà dla comunità. ⁵I diso parèj a vòstra onta. Possìbil ch’a-i sia gnun an vòstra comunità ch’a l’àbia pro 'd bon sens për fé da giùdes an tra ij sò frej? ⁶A l’ha pròpi da esse che un frel cristian a l’abia da porté plenta a n’àutr frel cristian e ch’a lo fasa dë 'dnans a 'n tribunal ëd gent ch’a l’ha gnun-a fede^[3]?

⁷A l’é già na granda dësfàita cola d’avèj 'd ruse an tra 'd vojàutri. A sarìa fòrse nen mej d’aceté con passiensa na cheich ingiustissia? Përchè nen patì ch’av faso 'd tòrt? ⁸A l’opòst, i seve vojàutri ch’i feve d’ingiustissie e 'd tòrt, e fin-a an darmagi dij vòstri frej!

⁹I seve nen che coj ch’a son nen giust^[4] a arseivràn pa nen an ardità ël Regn ëd Nosgnor? Feve-be gnun-e ilusion! Nì coj ch’a l’han na condòta libidinosa, nì j’idolatra, nì coj ch’a comëtto d’adulteri, nì ij përvertì, nì ij culatin^[5], nì ij cupio^[6], ¹⁰nì ij làder, nì j’usurari^[7], nì j’ambriacon, nì le malelenghe, nì ij trofador - gnun dë sti sì a arseivrà an ardità 'l Regn ëd Nosgnor. ¹¹Cheidun ëd vojàutri i j’ere pròpi parèj ëd lor, ma i seve stàit netià, i seve stàit santificà, i seve stàit rendù giust^[8] an nòm ëd Gesù Crist, ël Signor, e grassie a lë Spìrit ëd nòst Dé.

Ël valor ëd nòst còrp

¹²Cheidun a dis: “Am m’é consentì 'd fé tut lòn ch'i veuj!”. I sapie, contut che nen tut a conven. “Am m’é consentì 'd fé tut lòn ch'i veuj^[9]!”, contut, im lasserai dominé da gnente^[10]. ¹³I dise: “Le proviande a son fàite për lë stòmi e lë stòmi për le proviande”. Lolì a l’é vera, ma un bel di Nosgnor a dësblerà tant l’un che j’àutre. Contut, i peule nen dì che ‘l còrp a l’é fàit për na vita libidinosa, ma ch’a l’é fàit për Nosgnor e Nosgnor al còrp a l’ha daje 'd régole. ¹⁴Dé, ch’a l’ha arsussità ‘l Signor, a farà arsussité 'dcò nojàutri për soa potensa.

¹⁵I seve nen che ij vòstri còrp a son ëd mèmber ëd Crist? Për lòn, coma podrìa n’òm pijé sò còrp e fene 'l mèmber d’una bagassa? Mai pì! ¹⁶I seve nen che col ch’as uniss a na bagassa a dventa un sol còrp con chila? Përchè la Scritura a dis: “Tuti e doi a saran na sola carn^[11]”. ¹⁷Ma col ch’a l’é unì al Signor a fà un sol ëspìrit con chiel.

¹⁸Scapé via da na vita libidinosa^[12]! Qualonque pecà ch’a fasa l’òm, a l’é fòra dal còrp, ma col ch’a l’ha na condòta libidinosa a fà pecà contra sò còrp midem. ¹⁹I seve nen che vòst còrp a l’é 'l templi dlë Spìrit Sant^[13] ch’a viv an vojàutri e che Nosgnor a l’ha davlo? I peule nen fé lòn ch’i veule con ël còrp: a l’é nen ël vòstr! ²⁰I seve stàit catà a car pressi! Con vòst còrp, donca, glorifiché Nosgnor.

Nòte

1. Let. “andé an giustissia dëdnans a j’ingiust”.
2. O “dëdnans ai sant”, la comunità cristian-a.
3. O “a j’infedej”.
4. O “j’ingiust”.
5. μαλακοὶ, ij giovnòt ch’a l’han ëd relassion sessuaj con dj’òm,“fumlin”, la pederastìa.
6. Ἀρσενοκοῖται: mas-cc ch’as cogio con d’àutri mas-cc për ëd relassion sessuaj, omosessuaj, “coj ch’a comëtto ‘d pecà contra natura”.
7. O “jë strossin”
8. O “giustificà”.
9. Cfr. 1 Corint 10:23.
10. O “i sarai pa në s-ciav” (ëd quaicòsa).  
11. Cfr. Génesi 2:24.
12. Dai pëccà sessual
13. Cfr . 1 Corint 3:16; 2 Corint 6:16.