La Bibia piemontèisa/Testament Neuv/Arvelassion/Arvelassion 15

Da Wikisource.
Jump to navigation Jump to search

Arvelassion ëd Gioann[modifiché]

15[modifiché]

Le piaghe dariere. Càntich ëd trionf.[modifiché]

1Peui i l’hai vëddù an cél n’àutr prodis[1], grand e amirabil: set àngej ch’a portavo le set piaghe ch’a son le dariere, përché con lor l’ira ‘d Nosgnor a riva a sò compiment.

2I l’hai ‘dcò vëddù lòn ch’a më smijava un mar ëd véder mës-cià con ëd feu. Tuti coj ch’a j’ero sortì vincitor da la bataja contra la bestia, soa statua e la cifra ‘d sò nòm, a stasìo drit dzura col mar e a l’avìo an man j’arpe che Nosgnor a l’avìa daje. 3A cantavo ‘l càntich ëd Mosè, servitor ëd Nosgnor, e ‘l càntich dl’Agnel. A l’é sto-sì: “Nosgnor, Dé tut-potent! Grande e amirabij a son toe euvre. Rè dle nassion! Toe vie a son giuste e vere. 4Nosgnor! Chi é-lo ch’at tëmrà nen e ch’a darà nen glòria a tò Nom? Përchè Ti sol it ses sant. Tute le nassion a vniran e at rendran l’adorassion, përchè ti ‘t l’has arvelà toe giuste decision”.

5Antlora i l’hai beicà e vëddù an ël cél ch’as dovertava ‘l Templ, ch’a l’é ‘l Tabernàcol dla Testimoniansa[2]. 6Ij set àngej ch’a portavo le set piaghe a na son seurtì. A l’ero vestì ‘d lin pur e candi con na s-cirpa d’òr d’antorn al pét.

7Un dij quat esse vivent a l’ha dàit ai set àngej set cope d’òr pien-e dl’ra ‘d Nosgnor, ch’a viv për ij sécoj dij sécoj. 8La glòria ‘d Nosgnor e soa potensa a l’ha ampinì ‘l Templ ëd na nivola ‘d fum. L’intrada dël Templ a sarìa stàita sbarà fin-a al compiment complèt dle set piaghe dij set àngej.

Nòte[modifiché]

  1. O “segn”.
  2. O “dl’Aleansa”.