La Bibia piemontèisa/Testament Vej/Salm/Salm 86
86. Bass-te e scota mia preghiera![modifiché]
- Ël Salmista a fà n’apel a la misericòrdia ‘d Nosgnor e a-j ciama d’esse liberà dai sò nemis.
1Na preghiera ‘d David. Nosgnor! Bass-te e scota mia preghiera! Rëspond-me, përchè ch’i l’hai pròpi da manca ‘d tò agiut. 2Guern-me, përché i son un dij tò fedej. Mè Dé! Salva ‘l tò servent ch’as fida ‘d ti! 3Nosgnor! Àbie pietà ‘d mi ch’it ciamo tut ël dì. 4Dà costa gòj a tò servent. A ti i elévo l’ànima mìa. 5Nosgnor! ti ‘t ses ansì bon, ansì pront a përdoné, ansì pien d’amor për tuti coj ch’at ciamo agiùt. 6Nosgnor! Scota mia preghiera, scota mia sùplica. 7Anvers ëd ti as eléva mia 'nvocassion ant l’ora dël perìcol: i sai che ti ‘t ëm rëspondras. 8Nosgnor! An tra tùit ij dio a-i é gnun ch’a sia coma ti! A-i é gnun ch’a peuda fé lòn ch’it fas ti!
9Nosgnor! Tùit ij pòpoj ch’it l’has creà a vniran a prostërnesse dëdnans a ti e a daran glòria a tò nòm[1]. 10Përchè ti ‘t ses grand, Nosgnor, e it fas ëd maravije! Mach ti it ses Dé. 11Mostr-me toe vie e mi 'm n'ancaminerai an toa vrità. Acòrd-me la purëssa dël cheur parèj ch’it daga onor!
12Nosgnor, mè Dé! Con tut mè cheur it laudrai, i darai glòria a tò nòm për sèmper. 13L’amor ch’it l’has për mi a l’é bin grand: it l’has salvame da la tèra dij mòrt.
14Nosgnor! Ëd gent malgrassiosa a l’é alvasse contra 'd mi, na banda ‘d sassin a sërca ‘d masseme. Për lor ti ‘t ses un dio da rije. 15Tutun ti, Nosgnor, it ses un Dé ‘d compassion e ‘d bontà, ch’a castìja mai volonté e ch’a l’é fedel e rich d’amor. 16Vard-me e àbie pietà ‘d mi. Dà toa fòrsa a tò servent, salva ‘l fieul ëd toa serventa. 17Dame ‘n segn ëd toa bontà e coj ch’am m’han an òdio a lo vëdran e a saran dësvergognà, përchè ti, Nosgnor, it ses mè agiùt e consolassion.
Nòte[modifiché]
- ↑ Cfr. Arvelassion 15:4.